Read Hmar MATTHAI 25 Bible Online

MATTHAI 25 - Hmar bible

MATTHAI 25

¹“Chu pha chun, vân ram chu nunghâk inthieng sâwm, an khâwnvar chawia, mo neitu tuok dinga suokhai le chun, tekhi ni tâng a tih.

²Anni lai chun panga an var a, panga an invêt a.

³Ân vêthai chun an khâwnvarhai an chawiin a tui an chawisa si naw a.

⁴A varhai ruok chun an khâwnvartui bûrhaiah a tui thunin, khâwnvarhai leh an chawi a.

⁵Chun, mo neitu chu a hung intak leiin, an rêngin an lo inlusu a, an lo in ta a.

⁶Chun, zân rila chun, ‘Ngai ta u, mo neitu chu a hung ie! a tuok dingin hung suok ro khai,’ tiin khêkri a hung um ta a.

⁷Chu phingle chun nunghâk inthienghai chu an tho vawng a, an khâwnvarhai chu an siemrêl a.

⁸Chun, ân vêthai chun a varhai kuomah, ‘In khâwnvartui kha mi pe ro, kan khâwnvarhai a thi ding a nih,’ an ta.

⁹Nisienlakhawm, a varhai chun, ‘Keini le nangni ta dingin indai naw ni; a zawrtuhai kuomah fe unla, inchaw lem ro,’ tiin an dawn a.

¹⁰Chun, inchaw dinga an fe hmang kâr chun, mo neitu chu a hung tlung ta a; chuongchun, ân zohai chu ama le chun inneina ruoi fa dingin an lût a; chun, kawt chu an khâr ta a.

¹¹Chu hnunga chun, nunghâk inthieng danghai khawm chu an hung tlung a, ‘Pu, pu, mi hawngpêk rawh,’ an ta.

¹²Ama ruok chun, ‘Titakzetin ka hril cheu hi, ka hriet naw cheu a nih,’ a ta, a dawn a.

¹³Chuongchun, ngaiven ro, a ni le a hun chu in hriet si naw a.

¹⁴“Vân ram chu mi ram danga fe tâwma, ama suokhai koa, a sumhai an kuoma inkawltir ang chu a ni si a.

¹⁵Suok pakhat kuomah talent nga a pêk a, suok dang kuomah talent hni, suok dang kuomah talent khat: an thaw thei tâwk ding ang sengin a pêk a; chuongchun, a fe ta a.

¹⁶Chun, talent nga dawngtu chu chuonghai chun a va sumdâwng nghâl ta a, talent nga dang a sukdawk ta a.

¹⁷Chuong ang bawkin talent hni dawngtu khawm chun talent hni dang a sukdawk ta a.

¹⁸Talent khat dawngtu ruok chu a va fe a, hnuoi a cho a, a pu tangka chu a thup hmang ta lem a.

¹⁹“Chun, sâwttak hnungah chuong suokhai pu chu a hung a, an kuomah a sum chanchin a sukfel a.

²⁰Chuongchun, talent nga dawngtu chu a hung a, talent nga dang a hung chawi a, ‘Pu, nangin talent nga i mîn kawltir kha en ta, talent nga dang ka sukdawk,’ a ta.

²¹A pu chun a kuomah, ‘Suok ṭha le ringum, i thaw ṭha ie! tlâwmte chungah ring i um a, tamtak chungah inumtir ka ti che, i pu lâwmnaah lût rawh,’ a ta.

²²Chun, talent hni dawngtu khawm chu a hung a, ‘Pu, nangin talent hni i mîn kawltir kha, en ta, talent hni dang ka sukdawk,’ a ta.

²³A pu chun a kuomah, ‘Suok ṭha le ringum, i thaw ṭha ie! tlâwmte chungah ring i um a, tamtak chungah inumtir ka ti che; i pu lâwmnaah lût rawh,’ a ta.

²⁴“Chun, talent khat kawltu khawm chu a hung a, ‘Pu, mi ti kher kher i nih ti ka hriet che; i tu nawnaa khawm i sîk hlak a, i the dar nawnaa khawm în khâwm hlak a nih;

²⁵Chuongchun, ka ṭi a, ka fe a, i talent kha hnuoiah ka thup hmang a, en ta, i ta ngai kha i hmu nâwk hi,’ a ta.

²⁶A pu chun a kuomah, ‘Suok suol le zawmthawpa, ka itu nawnaa khawm ka sîka, ka the dar nawnaa khawm kân khâwm ti i hriet maw?

²⁷Chuong a ni sa chun, ka tangka chu sumdâwngtuhai kuomah lo sie ding i ni ta an nâwm; chuongchun, ka hung nâwk hin ka ta hi a pung leh ka hmu nâwk ding a nih.

²⁸Chuongchun, a talent khat kha lâkpêk unla, talent sâwm neitu kuomah pe ro.

²⁹Tukhawm a nei taphawt chu pe sâng an ta, chuongchun, hau a tih, tukhawm, a nei naw phawt chu a nei sun khawm chu lâkpêk an tih.

³⁰Chun, suok ṭhahnem naw kha tuol tieng inthima chun pei dawk ro; chutaka chun ṭap le harâwt chu um a tih,’ a ta, a dawn a.

³¹“Mihriem naupa ruok chu a vântirkohai po po leh a ropuinaa inthuoma a hung phâ chun, a ropuina ṭhungphaah ṭhung a ta;

³²a hmaa chun hnam tin inkhâwm an tih; berâm chingtuin kêl laia a berâmhai a ṭhe angin anni rawi chu ṭhêng a ta;

³³berâmhai chu a changtieng sieng a ta, kêlhai ruok chu a vawi tieng sieng a tih.

³⁴“Chu phâ chun, Laltak chun a changtienga mihai kuomah, ‘Ka Pa vochuomhai, hung unla, khawvêl siem tîra inthawka, in ta dinga ram buotsai chu chang ro;

³⁵ka phîng a ṭâmin nangnîn fâk ding in mi pêk a, ka dang a chârin dâwn ding in mi pêk a; mikhuol ka niin in mîn tlung tir a;

³⁶saruok ka niin puon in mîn siltir a; ka damnaw a, in mi kan a, intâng inah ka umin in hung si a,’ la tîng a tih.

³⁷“Chu phâ chun, mi felhai chun, ‘Lalpa, iengtik âm phîngṭâmin kan hmu che a, fâk ding kan pêk che? dangchârin kan hmu chea dâwn ding kan pêk che?

³⁸Iengtik âm mikhuolin kan hmu che a kan intlungtir che? saruokin kan hmu chea puon kan insiltir che?

³⁹Iengtik âm damnawin amanih, intâng ina manih kan hmu chea i kuomah kan hung?’ tiin la dawn an tih.

⁴⁰Chun, Laltak chun an kuomah, ‘Titakzetin ka hril cheu hi, hieng ka unau chîntakhai laia mi pakhat chunga in thaw chu, ka chunga thaw in nih,’ tîn la dawn a tih.”

⁴¹“Chu zoa chun a vawitienga mihai kuoma khawm chun, ‘ṭawngsephurhai, kumkhuo mei diebol le a tirkohai ta dinga an buotsaia chun mi fe hmangsan ro;

⁴²ka phîng a ṭâmin nangnîn fâk ding in mi pêk naw a; ka dang a chârin nangnîn dâwn ding in mi pêk naw a,

⁴³mikhuol ka niin in mîn tlungtir naw a, saruok ka niin puon in mîn siltir naw a; damnaw le intâng ina ka umin in mi kan si naw a,’ la tîng a tih.

⁴⁴Chu phâ chun, anni khawmin, ‘Lalpa, iengtik âm phîngṭâmin amanih, dangchârin amanih, mikhuolin amanih, intâng ina manih kan hmu che a, i rawng kan bâwlpêk naw che?’ tiin la dawn an tih.

⁴⁵Chun, ama chun an kuomah, ‘Titakzetin ka hril cheu hi, hieng mi chîntak laia mi pakhat chunga in thaw naw chu ka chunga thaw naw in nih,’ tiin la dawn a tih.

⁴⁶Chun, chuonghai chu kumkhaw hremnaah fêng an ta, mi felhai ruok chu kumkhaw hringnaah fêng an tih,” a ta.