Read Hmar MATTHAI 26 Bible Online

MATTHAI 26 - Hmar bible

MATTHAI 26

¹Chun, Isûn chuong thu po po chu a hril zoin, a închûktir hai kuomah,

²“Ni hni chenah Fekân ruoi a hung um ding a nih ti in hriet a, Mihriem Naupa hi hemde dingin an inmantir ding a nih,” a ta.

³Chu lai chun, Thiempu laltak Kaiapha an ti in inhuon sûnga chun thiempu lalhai le vântlâng upahai an inkhâwm a;

⁴Isu chu zâwra mana, an sukhlum theina dingin an inrâwn a.

⁵Nisienlakhawm, “Ruoiṭhe sûng chu ni naw sien la, chuong naw chun vântlâng lai buoina hung um rawi a tih,” an ta.

⁶Chun, Isu Bethaniah inphâr Simon inah a um lai chun,

⁷nuhmei pakhat alabastar bûra hriek rim inhnik totak chawiin a kuomah a hung a, a buthlêng awt laiin a luah a buok a.

⁸Nisienlakhawm, inchûktirhaiin chu chu an hmu chun an lunginsen a.

⁹“Iengdinga hienga a sukrîral mei mei am a na? Hi hriek hi man tamtaka zawra, pasiehai kuoma pêk thei a ni si a,” an ta.

¹⁰Isu ruok chun chu chu a hrietin an kuomah, “Nuhmei hi iengdinga in sukbuoi am a na? Ka chunga hin thil ṭhatak a thaw a nih.

¹¹Pasiehai chu kumkhuoa in kuoma um an nih annâwm, kei ruok chu kumkhuoa in kuoma um ding ka ni nawh.

¹²Hi hriek rim inhnik ka taksaa a ibuok hi, phûm dinga mi buotsai dingin a thaw a ni hi.

¹³Titakzetin ka hril cheu hi, khawvêl po poah khâwlai khawm hi Chanchin Ṭha hi an hrilna poah, hi nuhmei thil thaw khawm hi ama hriet zingna dingin hril ve pei an tih,” a ta.

¹⁴Chu hnunga chun sâwm le pahni laia mi pakhat, Juda Iskariot an ti chu, thiempu lalhai kuomah a fe a,

¹⁵“Ama chu inmantir ka ti cheu a ieng am mi pêng in ta?” a ta. Chun, tangka sâwmthum an bûkpêk ta a.

¹⁶Chu chena inthawk chun inmantirna remchâng a zawng ta a.

¹⁷Chun, Chawlṭhanglo Bei Ruoiṭhe ni, ni hmasataka chun, inchûktirhai chu Isu kuomah an hung a, “Fekân ruoi bu fâkna dingin khâwlai am buotsai pêk inlang che i nuom a?” an ta.

¹⁸Ama chun, “Khawpuiah tu amani kuomah fe unla, a kuomah, ‘Inchûktirtu chun, ka hun a hnai ta a; ka închûktirhai leh Fekân ruoi i inah ṭhêng kan tih, a tih,’ va ti ro,” a ta.

¹⁹Chun, Isûn an kuoma a ti ang chun inchûktirhai chun an thaw a, Fekân ruoi ding chu an buotsai ta a.

²⁰Chun, khuo a hung inhnu chun, inchûktir sâwm le pahnihai leh buthlêng an awt a;

²¹chun, an fâk laiin ama chun, “Titakzetin ka ti cheu hi, in laia mi pakhat hin mîn mantir a tih,” a ta.

²²Chun, an lungngai ta bêk bêk a, a kuomah, “Lalpa, kei am ka nih?” an ti ta seng a.

²³Ama chun, “Thlênga mi purpuitu ngei chun mîn mantir a tih.

²⁴Mihriem Naupa hi a chanchin an ziek angtak khan a fe ding a nih, nisienlakhawm, Mihriem Naupa inmantirtu ding mipa chung chu a rik! chu mihriem chu insieng naw sien la, a ta dingin ṭha lem a tih,” tiin a dawn a.

²⁵Chun, ân mantirtu ding Juda chun a dawn a, “Rabbi, kei am ka nih?” a ta. Ama chun a kuomah, “în ti zing chu teh,” a ta.

²⁶Chun, an fâk laiin Isûn bei a lâk a, mal a sâwmpêk a, a khawi a; chun, inchûktirhai kuomah a pêk a, “La unla, fa ro, hi hi ka taksa a nih,” a ta.

²⁷Chun, no a lâk a, lâwmthu a hril a, an kuomah a pêk a, “In rêngin dâwn ro;

²⁸hi hi ka thisen, suolhai ngaidamna dinga mi tamtak ta dinga suok ding, thuthlungna[16] chu a nih

²⁹Nisienlakhawm, ka hril cheu hi, ka Pa rama nangni le a thar ka dâwn ni a tlung hmakhat chun tuta inthawkin grêp hrui raa hi dâwn nâwk ta naw ning,” a ta.

³⁰Chun, hla an sak zoin an suok a, Oliv tlânga chun an fe ta a.

³¹Chun, Isûn an kuomah, “Vawizân hin in rêngin ka chungthuah lungnilovin um vawng in tih, ‘Berâm vêngtu chu vuong ka ta, berâm ruol chu indar an tih,’ ti ziek a ni si a.

³²Nisienlakhawm, ka thonâwk hnungin Galili ramah in hmaah fêng ka tih,” a ta.

³³Peter ruok chun a kuomah, “An rêngin i chungthuah lungnilovin umhai sien khawm, kei chu lungnilovin um nâw tawp ka tih,” tiin a dawn a.

³⁴Isûn a kuomah, “Titakzetin ka hril che, vawizân hin âr a khuong hmain, nangin vawithum mîn phat i tih,” a ta.

³⁵Peterin a kuomah, “I thinaa chun thi ve ding ni lang khawm inphat naw tawp ka ti che,” a ta. Chuong ang bawk chun, inchûktirhai po po chun an ti ta seng a.

³⁶Chu zoa chun Isu annihai le chun, hmun pakhat Gethsemane an ti chu an tlung a, chun, ama chun a închûktirhai kuomah, “Sawtaka ka va ṭawngṭai sûng po hitaka hin lo ṭhung ro,” a ta.

³⁷Chun, Peter le Zebedai nauhai pahni chu a ṭhuoi a, a lungngaiin a lunginzîng ta bêk bêk a.

³⁸Chun, an kuomah, “Ka lungril a lungngai bêk bêk a; thina khawp rau a nih. Hitaka hin um unla mi vêngpui ro,” a ta.

³⁹Chun, tlâwmtên hma tieng a va fe dep a, a bawkkhup a, “Aw Pa, a thei chun, hi no hin mi khêl hrâm raw se; nisienlakhawm, keima thu ni lovin, nangma thu thu ni lem raw se,” tiin a ṭawngṭai a.

⁴⁰Chun, inchûktirhai kuoma chun a hung a, anni chu inin a hung hmu a, Peter kuomah, “E khai! nangnîn dârkâr khat khawm in mi vêngpui thei naw a ni maw?

⁴¹Thlêmnaa in lût nawna dingin inring zingin ṭawngṭai ro; thlarau chun chu a pei a, taksa ruok chu a hrât naw a nih,” a ta.

⁴²Chun, vawi hninaah a va fe a, a ṭawngṭai nâwk a, “Aw Pa, ka dâwn lova hi no hin a mi khêl thei lul naw chun, nangma thu thu ni raw se,” a ta.

⁴³Chun, a hung nâwk a, anni chu inin a hung hmu nâwk a, an îmu a suok hle si a.

⁴⁴Chun, a fe san nâwk a, a vawi thumnaah a thu hril ngai hrilin a ṭawngṭai nâwk a.

⁴⁵Chu zoa chun, inchûktirhai kuomah a hung nâwk a, an kuomah, “Tuhin chu in unla châwl ta ro! Ngai ta u; a hun chu a hung tlung ta a, Mihriem Naupa hi mi suolhai kutah an inmantir ding a ni hi.

⁴⁶Tho unla, fêng ei tiu, a mîn man-tirtu ding chu a hung hnai ta hi,” a ta.

⁴⁷Chun, a la hril lai zingin Juda, sâwmpahni hai laia mi pakhat chu, a hung tlung ta a, ama ruol chun thiempu lalhai le upahai kuoma inthawkin mipui nasatak, kâwlhnâm le hembâwk chawiin an hung tlung bawk a.

⁴⁸Chun, ân mantirtu ding chun inchikna ding a lo hrillâwk hieu a, “Ka ifâwp taphawt chu ama nîng a tih, man el ro,” tiin.

⁴⁹Chuongchun, Isu chu a va pan nghâl ta a. “Chibai, Rabbi,” tiin a fâwp ta ngâwi ngâwi a.

⁵⁰Chun, Isûn a kuomah, “Ruola, i hungna san chu thaw rawh,” a ta. Chu phingleh Isu chu an chel a, an man ta a.

⁵¹Chun, ngai ta, Isu rawihai laia pakhat chun a kutin a ban a, a kâwlhnâm a phawi a, Thiempu Laltak suok chu a sât a; a nakâwr a sât thlâkpêk a.

⁵²Chun, Isûn a kuomah, “I kâwlhnâm kha a sienaah sie nâwk rawh, kâwlhnâm ruoituhai po po chu kâwlhnâm bawkin an thi ding a ni si a.

⁵³Tukhawm hin vântirko sâng ruk[17] hmun sâwm le hmun hni nêka tam lem mi hung tirpêk dingin ka Pa kuomah ngên thei naw dingin in mi ring am a nih?

⁵⁴Nisienlakhawm, ngên ang lang, iengtin am Pathien Lekha Thu-hieng anga hung um ding thu hi-tlung thei a ti leh?” a ta.

⁵⁵Chu lai chun, Isûn mipuihai kuoma chun, “Kâwlhnâmhai, hembâwkhai châwiin suomhmang man ding ang elin a mi man dingin in hung suok a ni maw? Pathien biekinah ni tin inchûktirin ka ṭhung hlak a, in mi man si naw a.

⁵⁶Nisienlakhawm, zâwlnei lekha thuhai a tlung theina dingin hieng po po hi a hung tlung tah a ni hi,” a ta. Chu lai chun, inchûktirhai po po chun ama an thlathlam a, an tlân hmang ta vawng a.

⁵⁷Chun, Isu mantuhai chun, Thiempu Laltak Kaiapha ina Dân Inchûktirtuhai le upahai um khâwmnaa chun ama chu an ṭhuoi ta a.

⁵⁸Nisienlakhawm, Peterin hlataka inthawkin ama chu a zui a, Thiempu laltak in inhuonna sûng tuol chenin; chun, a va lût a, a tâwpna hmu dingin siehlawhai lai chun a ṭhung ve a.

⁵⁹Chun, ama an sukhlum theina dingin thiempu lalhai le rorêltuhai po po chun Isu hêkna an zawng a;

⁶⁰hretu tehlêm tamtak hung hai sien khawm an hmu si naw a. A nakie ruok chun mi pahni an hung a,

⁶¹“Hi mipa hin, ‘Pathien biekin hi ṭhiek a, ni thum sûnga bâwl nâwk thei ka nih,’ a tih,” an ta.

⁶²Chuongchun, Thiempu Laltak chu a ngîr suok a, a kuomah, “Iengkhawmin i dawn naw maw? Hienghaiin an hêkna che hi iengtizie am a na?” a ta. Isu ruok chu a to zing a.

⁶³Chun, Thiempu Laltak chun a kuomah, “Pathien hring hmingin ka vau che, Krista, Pathien Naupa chu i ni am a nih? mi hril rawh,” a ta.

⁶⁴Isûn a kuomah, “I hril ang chun ka nih; chu nawa khawm, ka hril cheu hi, hi hnung leh Mihriem Naupa hi thilthawtheina changtienga ṭhunga, vân sûm chunga hung in la hmu ding a nih,” a ta.

⁶⁵Chun, Thiempu Laltak chun a silfênhai a keithlêr a, “Pathien a hrilsiet tah; hretu dang iengdingin am ngai tâng ei ta? Ngai ta u, Pathien a hrilsietzie chu tuhin in hriet tah. Iengtin am in ngai a?” a ta.

⁶⁶Anni chun, “Thi tlâk a nih,” tiin an dawn a.

⁶⁷Chun, a hmaiah chil an sâk a, kutin an hnek a; a ṭhenin an ben a,

⁶⁸“Nang Krista, tuin am a ben che a? mi hril rawh,” an ta.

⁶⁹Chun, Peter chu in inhuon sûng tuollaia chun a ṭhung a; chun, nunghâk pakhat a kuomah a hung a, “Nang khawm, Isu, Galili rama mi kuoma um kha i ni hi,” a ta.

⁷⁰Ama ruok chun, “I thu hril chu ka hriet dêr nawh,” tiin an rênga hmaah ân phat a.

⁷¹Chun, tuol kawt bula chun a va suok phingleh nunghâk dangin ama chu a hmu a, chutaka umhai kuoma chun, “Hi mipa khawm hi Isu Nazareth mi kuoma um kha a ni hi,” a ta.

⁷²Chun, “Chu mihriem chu ka hriet nawh,” tiin inkhâmin ân phat nâwk a.

⁷³Chun, sâwt nawte hnungah a kâwla ngîrhai chun Peter kuomah, “Nang khawm an laia mi i ni ngei el, i ṭawngah ân hriet annâwm,” an ta.

⁷⁴Ama chun, “Chu mihriem chu ka hriet nawh” tîn ṭawngsie inphur rauin ân khâm ta a. Chun âr a khuong nghâl ta a.

⁷⁵Chun, Peter chun, Isûn “âr a khuong hmain nangin vawi thum mîn phat i tih,” a ti kha a hung hriet nâwk ta a. Chun, a suok a, a ṭap ta ngâwi ngâwi a.