Read Hmar MATTHAI 27 Bible Online

MATTHAI 27 - Hmar bible

MATTHAI 27

¹Chun, zîngkâr a hung ni chun, thiempu lalhai le vântlâng upahai po po chu Isu sukhlum dingin a chungthuah an inrâwn a;

²chun, an khuop a, an ṭhuoi a, Bawrsâp Pilat kuomah an pêk ta a.

³Chun, Juda ân mantîrtu khan Isu thiemnaw an inchangtir ti a hriet phingleh ân sîr a; tangka sâwmthum kha thiempu lalhai kuoma chun a hung chawi nâwk a,

⁴“Mi thiem thisen kân mantir kha thil ka suksuol a nih,” a ta. Anni ruok chun, “Chu chu kan ta dingin ieng am pawi a ta? Nangin i thaw thawin thaw rawh,” an ti san a.

⁵Chun, ama chun tangka chu hmun inthienga chun a pei lût a; a fe hmang a, a vân âwkhlum ta a.

⁶Chun, thiempu lalhai chun tangka chu an lâk a, “Hi hi thawlâwm bâwma sie a thieng naw ie, thisen man a ni si a,” an ta.

⁷Chuongchun, an inrâwn a, mikhuolhai phûmna dingin bêlhemtu hmun chu an inchâwk ta a.

⁸Chu lei chun a nih, chu hmun chu tu chena, “Thisen Hmun,” an ti chu.

⁹Chu lai chun, zâwlnei Jeremiain hieng thu a hril hi a hung tlung ta a: “Chun, tangka sâwmthum, An isak man, Israel thla tuhaiin amanih an isak man chu, An lâk a;

¹⁰Lalpain a mi tiem angin, Belhemtu hmun man dingin an pêk a,” ti hi.

¹¹Chun, Isu chu Bawrsâp hmaa chun a ngîr a. Chun, Bawrsâp chun, “Judahai lal i ni?” tîn ân dawn a. Chun, Isûn, “I hril ang chun ka nih,” a ta.

¹²Chun, thiempu lalhai le upahaiin an hêk laiin iengkhawmin a dawn naw a.

¹³Chuongchun, Pilatin a kuomah, “An hêkna zozai che hi i hriet naw am a nih?” a ta.

¹⁴Chun, bau khat khawmin a dawn naw a; chuongchun, Bawrsâp chun mak a ti hle a.

¹⁵Chun, Bawrsâpin ruoiṭhe ni chun, mi intâng pakhat an dit taphawt mipuihai chu ân suopêk hlak a.

¹⁶Chun, chu lai chun, mi intâng hming inthangtak Barabba an ti chu an nei a.

¹⁷Chuongchun, an hung inkhâwm chun, Pilatin an kuomah “Tu am insuopêk lang cheu in nuom a? Barabba am, Isu, Krista an ti chu?” a ta.

¹⁸Thîkna leiin ama chu an inmantir ti a hriet si a.

¹⁹Chun, rorêlna ṭhungphaa ân ṭhung lai chun, a nuhmeiin, “Kha mi feltak chunga khan iengkhawm thaw naw rawh; vawisûn hin ama leiin mangah thil tamtak ka tuor a nih,” tiin ân cha a.

²⁰Chun, thiempu lalhai le upahaiin Barabba hnia, Isu sukhlum dingin mipuihai chu an thlêm a.

²¹Bawrsâp ruok chun anni chu a biek a, “Anni pahni chu a tu lem am insuopêk lang cheu in nuom a?” a ti nâwk a. Anni chun, “Barabba” an ti a.

²²Pilatin an kuomah, “Isu, Krista an ti hi iengtin am thâwng ka ti leh?” a ta. An rêngin, “Krawsah inhemdêtir rawh,” an ti a.

²³Chun, ama chun, “Iengdingin am ie? Ieng am a suksuol leh?” a ta. Nisienlakhawm, anni rawi chun “Krawsah inhemdêtir rawh,” tiin an khêk rak rak a.

²⁴Chuongchun, Pilatin iengkhawm thaw thei loa buoi tieu tieu ding a nih ti a hrietin, tui a lâk a, mipui hmaa chun a kut a sâwp a, “Hi mi fel thisena hin kân thieng; nangnîn in thaw thawin thaw ro,” a ta.

²⁵Chun, vântlâng po po chun, “A thisen chu keini chunga le, kan nauhai chungah um raw se,” tiin an dawn a.

²⁶Chu zoa chun Barabba chu ân suopêk ta a; Isu ruok chu a vuok a, krawsa hemde dingin a pêk ta a.

²⁷Chu zoa chun, Bawrsâp sipaihai chun Isu chu lal inah an ṭhuoi lût a, an pâwla mi po po a kuomah an ko khâwm a.

²⁸Chuongchun, a puonhai dâm an hlîppêk a, puon sen an insiltir a.

²⁹Chun, hling lukhum an phier a, an inkhumtir a, a kut changtieng luong an inchawitir a; a hmaah an dingṭhaṭhuon a, “Chibai, Judahai lal,” tiin nuiza siemnain an hmang a.

³⁰Chun, chil an sâk khum a, luong chu an lâkpêk a, a lua chun an vuok a.

³¹Chun, nuiza siemnaa an hmang zoin, puon chu an hlîppêk a, ama puonhai chu an insiltir nâwk a; krawsa hemde dingin an ṭhuoi ta a.

³²Chun, an fe suok laiin Kurini khuoa mi, a hming Simon an hmu a; chu mipa chu a kraws put dingin an man a.

³³Chun, Golgotha an ti hmun an hung tlung a, (chu chu, “Luru hmun,” tina a nih)

³⁴uoin thûr, thil kha le pawl, a dâwn dingin an pêk a, nisienlakhawm ân tem phingin a dâwn nuom ta naw a.

³⁵Chun, krawsah an hemde zoin, ṭhum vâwrin a silfênhai chu an insem a.

³⁶Chun, chutaka chun an ṭhung a, an vêng a, a hêkna

³⁷“HI MIPA HI ISU JUDAHAI LAL A NIH,” tia ziek a lu chungah an bel a.

³⁸Chun, ama ruol chun, suomhmang pahni an hemde ve a, a changtieng pakhat a vawitieng pakhat.

³⁹Chun, mi inlawn taphawt chun an lu thinin, an tiel a,

⁴⁰“Nang Pathien biekin ṭhiek a, ni thuma bâwl nâwktu, insukdam rawh, Pathien Naupa i ni chun, krawsa kha hung ṭum ta la,” tiin.

⁴¹Chuong ang bawkin thiempu lalhai chun, Dân inchûktirtuhai le upahai leh tielin,

⁴²“Mi dang hman a sukdam hlak a; ama le ama ân sukdam thei si naw a. Israel lal a nih annâwm, tuhin krawsa inthawkin hung ṭum ta sien la, chuongchun, ama awi nâwm ei ni!

⁴³Pathien a awi annâwm, ama hi a nuom chun tuhin sandam raw se, ‘Pathien Naupa ka nih,’ a ti si a,” an ta.

⁴⁴Suomhmang an hemde vehai khawm chun, chuong ang bawkin an ti el ve a.

⁴⁵Chun, nisa indinga inthawka zânbu suong pha chenin khawvêl a hung inthim ta vawng a.

⁴⁶Chun, zânbu suong pha vêl chun, Isu chu râwl inringtakin, “Eli, Eli lama sabakthani” tiin a khêk suok a. (Chu chu, “Ka Pathien, ka Pathien, iengdinga i mi mâksan?” tina a nih.)

⁴⁷Chun, a kâwla ngîr ṭhenkhathai chun chu chu an hrietin, “Hi mipa hin Elija a ko a nih,” an ta.

⁴⁸Chun, an laia mi pakhat a tlân nghâl ta a, sponj a lâk a, uoin thûr ân chie sip a, hmawlah a târ a, a hang indâwntir a.

⁴⁹Chun, mi danghai chun, “Um raw se, ama la dingin Elija a hung am en ei tiu,” an ta.

⁵⁰Chun, Isu chu râwl inringtakin a khêk nâwk a, a thlarau ân thla ta a.

⁵¹Chun, ngai ta, Pathien biekina puonzâr chu a chung tienga inthawkin a hnuoi tieng chenin, a lo tlêr suok ta a; chun, simkhawleihnuoi dâm ân hnîng a, lungpuihai an hung kawi a;

⁵²thlânhai an hung inhawng a; mi inthieng in tahai taksa tamtak khawm keithoin an um ta a;

⁵³chuonghai chu a thonâwk hnunga chun, thlâna inthawka hung suokin khaw inthienga chun an lût a, mi tamtak kuomah an inlâr ta a.

⁵⁴Chun, sipai za hotu le a kuoma Isu vênga um vehai chun, simkhawleihnuoi inhnîng le thil umziehai chu an hmu chun an ṭi ta bêk bêk a, “Hi mipa hi Pathien Naupa a ni ngei el,” an ta.

⁵⁵Chun, chutaka chun nuhmei tamtak, a rawngbâwlpêk pum peia Galili rama inthawka Isu hung zuitu- hai chu an um a; hlatakah an thlîr a;

⁵⁶chuonghai lai chun Mari Magdalin hai, Jakob le Josef nu Mari hai, Zebedai naupahai nu hai an ṭhang a.

⁵⁷Chun, zântieng a hung ni chun, mi hausa, a hming Josef, Arimathaia mi a hung a, ama ngei khawm chu Isu inchûktir a ni bawk a.

⁵⁸Chu mipa chu Pilat kuomah a va fe a; Isu ruong chu a hni a. Chun, Pilatin pêk din gin thu a pêk a.

⁵⁹Chuongchun, Josef chun ruong chu a lâk a, puon zai inhmi fâitakin a tuom a;

⁶⁰ama thlân thar, lung a iverkuoa chun ân zâl a, thlân kawtkhâr chu lung lientakin ân del a, a fe ta a.

⁶¹Chun, chutaka chun, Mari Magdalin le Mari dang chu an um a, thlân hma zâwna chun an ṭhung a.

⁶²Chun, a zînga chun (chu chu Inringlâwk ni zo tûk a nih) thiempu lalhai le Pharisaihai chu Pilat kuomah an um khâwm dup a,

⁶³“Pu, chu hlêmtu chun, a dam lai khan ‘Ni thum chenah thonâwk ka tih,’ a ti kan hriet zing a.

⁶⁴Chuongchun, thlân chu ni thum ni chen vêng ṭha dingin thu pe rawh, chuong naw chun a inchûktirhai chu hungin, ama chu inru hlau an ta, vântlâng kuomah, ‘Mithi laia inthawkin a thonâwk ta a nih,’ ti rawi an tih; chuongchun, hlêmna nuhnung lem chu a hmasa nêk khan ṭha naw nâwk zuol a tih,” an ta.

⁶⁵Pilatin an kuomah, “Vêngtu sipaihai in nei annâwm, fe unla in thei ang angin invêngṭhattir ta unla,” a ta.

⁶⁶Chuongchun, vêngtu sipaihai leh an fe a, thlân chu an invêng ṭhattir a, lung chu an inchik a.