Read Hmar MATTHAI 28 Bible Online

MATTHAI 28 - Hmar bible

MATTHAI 28

¹Chun, Châwlni zo, ni saria ni hmasatak dinga khuo a var tâwmin, Mari Magdalin le Mari dang chu thlân en dingin an fe a.

²Chun, ngai ta, simkhawleihnuoi nasatakin a hung inhnîng a, Lalpa vântirko vâna inthawkin a hung ṭum a, lung chu a hung inhlum a, a chungah a ṭhung ta a.

³A hmêl umzie chu kâwlinlep ang a na, a silfên chu vûr angin a vâr a.

⁴Ama an ṭi leiin vêngtuhai chu an inthin a, mithi ang elin an hung um ta a.

⁵Chun, vântirko chun nuhmeihai chu a biek a, an kuomah, “Nangni chu ṭi naw ro! Isu an hemde kha in zawng ti ka hriet!

⁶Hitaka hin a um ta nawh; a hril ang ngeiin a thonâwk ta a nih. A zâlna hi hung en hman ta u.

⁷Chun, fe vak unla, a inchûktirhai kuomah, ‘Mithi laia inthawkin a thonâwk ta a nih, ngai ta u, Galili ramah in hmaah a fe, chutaka chun ama chu hmûng in tih,’ tiin hril ro. Ngai ta u, ka hril ta cheu hi,” a ta.

⁸Chun, ṭi le lâwm bêk bêk pumin thlâna inthawk chun an fe vat vat a, a închûktirhai hril dingin an tlân ta a.

⁹Chun, ngai ta, Isûn anni chu ân tuokpui a, “Chibai” a ti tâwl a. Chuongchun, anni chun a ke chu an va chel a, chibai an bûk a.

¹⁰Chun, Isûn an kuomah “Ṭi naw ro, fe unla, Galili rama fe dingin ka unauhai va hril ro; chutaka chun mi hmûng an tih,” a ta.

¹¹Chun, an va fe lai chun vêngtu sipai ṭhenkhat chu khawpuiah an va lût a, thil umzie po po chu thiempu lalhai kuomah an va hril a.

¹²Chun, upahai leh an inkhâwma an inrâwn zoin sipaihai kuoma chun tangka tamtak an pêk a,

¹³“ ‘Zânah kan in kârin a închûktirhai chu an hung a, ama an inrûk a nih,’ ti ro.

¹⁴Chun, Bawrsâpin chu chu a hriet chun ama chu thlêm kan ta, lunginhâng lovin siem kan ti cheu,” an ta.

¹⁵Chuongchun, tangka chu an lâk a, an iti ang pei chun an ti ta a; chuongchun, tu chen hin chu thu chu Judahai laiah an la hril ta pei a nih.

¹⁶Nisienlakhawm, inchûktir sâwm le pakhat hai chu Galili ramah, Isûn tlâng a iruot pêka chun an fe a.

¹⁷Chun, ama an hmu chun chibai an bûk a, ṭhenkhat ruok chun an ringhla a.

¹⁸Chuongchun Isu chu an kuomah a hung a, anni rawi chu a biek a, “Hnuoi le vâna thuneina po po ka kuomah pêk a ni tah.

¹⁹“Chuongchun, fe unla, hnam tina mi inchûktirin siem unla, Pa le, Naupa le, Thlarau Inthieng hming chun baptist unla;

²⁰thu ka ipêk po po cheu pawm dingin inchûktir ro. Chun, ngai ta u, kei kumkhuoin khawvêl tâwp chen khawmin in kuomah um pei ka tih,” a ta.