Read Hmar MATTHAI 7 Bible Online

MATTHAI 7 - Hmar bible

MATTHAI 7

¹“Sawisêl naw ro, sawisêla in um nawna dingin.

²In sawisêl ang bawkin sawisêlin um in tih, in inkhina ngai bawka inkhipêk ni nâwk in tih.

³Chun, iengdinga mâni mita tlung- pûm um ngaituo si loa; i unau mita hmawl hlek um chu i hmu am a na?

⁴Iengtin am i unau kuomah, ‘I mita hmawl hlek kha mîn lâk dawktir rawh,’ ti thei i ta? Ngai ta, nanga mit ngeiah tlungpûm chu a um zing si a.

⁵Mi vervêk! I mita inthawkin tlungpûm kha la suok hmasa rawh; chuongchun, i unau mita inthawka hmawl hlek lâk suok ding chu feltakin hmu thei i tih.

⁶“Ui kuoma dâm thil inthieng chu pe naw ro; vawk hmaa dâm in lunghlu pei bawk naw ro; chîl se hlau rawi an ta; ngha lêtin phirthlêr rawi an ti cheu.”

⁷“Hni ro, chuongchun, pêkin um in tih; zawng ro, chuongchun, hmûng in tih;

⁸nawk ro, hawngpêkin um in tih; tukhawm a hni taphawt chun an hmu hlak; tukhawm a zawng chun an hmu hlak; tukhawm a nawk chu hawngpêk ning an tih.

⁹“Anleh, nangni rawi tukhawm, in naupain bei hni sienla cheu, tuin am lung pêng in ta?

¹⁰Annawleh, nga hni sienla tuin am rûl pêng in ta?

¹¹Chuongchun, nangni mi suol hmanin in nauhai thil ṭha pêk nachang in hriet chun, in Pa vâna mi chun a hnituhai chu thil ṭha a pêk lem hman hman naw ding am a nih?

¹²“Chuongchun, thil tinrêng mîn in chunga an thaw dinga in dit ding ang peiin, mi chunga khawm thaw ve ro; chu chu Dân le zâwlneihai thu a ni hrim a nih.

¹³“Kawtkhâr chîna chun lût ro; bohmangnaa fena kawtkhâr chu a lien a, a lampui khawm a lien bawk a, chu tienga lût chu tam khawm an tam hle a nih.

¹⁴Hringnaa fena kawtkhâr chu a chîn a, a lampui khawm ân têp bawk a, a hmutuhai khawm tlâwmte an nih.

¹⁵“Zâwlnei tehlêmhai lai chun fîmkhur ro; chuonghai chu berâm vun silin in kuomah an hung hlak a; an sûng tienga ruok chu satene hnukinrâwltakhai an ni si a.

¹⁶Anni chu an raah hre el in tih. Hrui hlingnei kûngah grêp an lo hlak am a nih? Lênhlinga khawm theichang an lo hlak am a nih?

¹⁷Chuong ang bawkin thing ṭha taphawt chu a ra ṭha hlak; thing ṭha naw ruok chu a ra se hlak.

¹⁸Thing ṭha a ra se thei naw a, thing ṭha naw hlak a ra ṭha thei bawk nawh.

¹⁹Thing tin a ra ṭha naw chu an phûr a, meiah an pei hlak.

²⁰Chuleiin, anni chu an raah hrieng in tih.

²¹“ ‘Lalpa, Lalpa,’ a mi ti nazawng chu vân ramah lût naw ni hai, ka Pa vâna mi dit zâwng thawtuhai ruok chu lût an tih.

²²Chu nia chun mi tamtakin, ‘Lalpa, Lalpa, i hmingin thu kan hrilin, i hmingin khawhri dâm kan hnawtdawkin, i hmingin thilmak tamtak kan thaw hlak a ni naw am a nih?’ la tîng an tih.

²³Chu pha chun, ‘Nangni thil suol thawhai, ka hriet ngai naw cheu, ka kuoma inthawkin fe hmang ro,’ tiin la hril ka tih.

²⁴“Chuongchun, mi tin hieng ka thu hrea zâwm taphawt chu, mi var lungpui chunga in bâwltu leh hrilkhi ding a nih.

²⁵Ruo dâm a hung sûr a, tui dâm a hung lien a, thli dâm a hung hrâng a, chu in chu a hung nam sawk sawk a; nisienlakhawm, a chim naw a; lungpui chunga rem tlat a ni leiin.

²⁶Chun, mi tin hieng ka thu hrea zâwm naw taphawt chu mi invêt phaiphin chung ela in bâwltu leh hrilkhi ding a nih.

²⁷Ruo dâm a hung sûr a; tui dâm a hung lien a, thli dâm a hung hrâng a, chu in chu a hung nam sawk sawk a; a chim ta a; a chim chu nasatak a nih,” a ta.

²⁸Chun, Isûn chuong thil chu a hril zo phingleh, mipuihaiin a thu inchûk tir chu mak an ti hle a;

²⁹Dân inchûktirtuhai ang loa, thuneina neitaka anni ân chûktir leiin.