Read Hmar MARKA 1 Bible Online

MARKA 1 - Hmar bible

MARKA 1

¹Pathien Naupa Isu Krista Chanchin Ṭha hung tlung phutna chu.

²Zâwlnei Isai lekhabua, “Ngai ta, ka tirko i hmaah ka tir a, Ama chun i lampui siem a tih,”

³Thlalêra mi khêk râwl chun, ‘Lalpa lamlien buotsai unla, A lampuihai suktlûn ro,’ a tih,” tia inziek ang khan.

⁴Johan, thlalêra Baptistu kha suksuolnahai ngaidamna dingin simna baptisma thu hrilin a hung suok a.

⁵Chun, Judai rama mi po po le Jerusalema mi po pohai chu a kuomah an fe a, an suolhai thupha chawiin Jordan vadungah a kuomah baptisma an chang tâwl a.

⁶Chun, Johan chu sanghâwngsei hmul puonin ân thuom a, a kâwngah savun kâwngkhiin ân khit a, rama khuoizu le khâuṭhikṭhi buin a ring a.

⁷Chun, “Ka hnungah keia nêka ropui lem a hung zing a nih; kûna a kekawk hrui sût tlâk khawm ka ni nawh.

⁸Kei chun tuiin ka baptis hlak cheu a; ama ruok chun chu Thlarau Inthiengin a baptis ding cheu a nih,” tiin a hril a.

⁹Chuong nihaia chun Isu Galili rama Nazaretha inthawkin a hung a, Jordan vadungah Johan kuomah baptisma a chang ta a.

¹⁰Chuongchun, tuia inthawka a hung suok phingle chun, vân inhawnga Thlarau vâṭhu angin ama chunga hung ṭum a hmu ta a.

¹¹Chun, “Nang ka Naupa dittak i nih, i chungah ka lungni bêk bêk a nih,” tiin vâna inthawkin râwl a hung suok a.

¹²Chu phingleh Thlarau chun thlalêrah ama a tir suok ta a.

¹³Chuongchun, Setan ithlêmin ni sâwmli zet thlalêra chun a um a, ramsahai lai a um a, vântirkohai chun a rawng an bâwlpêk a.

¹⁴Chun, Johan an man hnungin Isu, Pathien Chanchin Ṭha hrilin Galili ramah a hung a;

¹⁵“Hun chu a hung tlung ta a, Pathien ram khawm a hung hnai ta a, sim unla Chanchin ṭha hi ring ro,” a ti pei a.

¹⁶Chun, Galili dîl panghrûla a fe laiin Simon le Simon unaupa Andri chu dîla chun lên dêngin a hmu a; nga mantu an ni hrim a.

¹⁷Chun, Isûn an kuomah, “Mi zui ro, chuongchun, mihriem mantu dingin siem ka ti cheu,” a ta.

¹⁸Chuongchun, lênhai chu mâksanin an zui ta a.

¹⁹Chun, tâwite a hei fe chun, Zebedai naupa Jakob le a unau Johan chu a hmu a, anni khawm chu an lênhai siemṭhain lawnga bawk an um a.

²⁰Chun, anni khawm chu a ko nghâl ta a: chuongchun, an pa Zebedai chu inhlawfa an iruoihai kuoma chun lawngah an mâksan a, an zui ta a.

²¹Chun, Kapernaumah an va fe a, chun Châwlni chun inkhâwmna inah a lût a, ân chûktir nghâl ta a.

²²A thu inchûktir chu mak an ti hle a, Dân inchûktirtuhai ang lova, thuneina nei taka anni ân chûktir leiin.

²³Chun, an inkhawmna ina chun khawhri inthieng naw nei mi pakhat a lo um a;

²⁴ama chun, “Nazareth Isu, keini le nang ieng am ei inzâwlna a um a? Mi sukbohmang dingin i hung am a nih? Nang ka hriet che, Pathien mi inthieng i nih,” tiin a khêk suok nghâl ta a.

²⁵Chun, Isûn a hal a, “To la, a sûnga inthawkin hung suok rawh,” a ta.

²⁶Chun, khawhri inthieng naw chun ama a sawisa a, inringtakin a khêk a, a sûnga chu a hung suok ta a.

²⁷Chun, an rêngin mak an ti ta bêk bêk a, chuongchun, “Ahi ieng am a ni ta leh, inchûktirna thar a ni hi tên! Khawhri inthieng naw khawm thuneitakin thu a pêk a, a thu an awi pei el hi,” tiin an insêl a.

²⁸Chun, Galili ram vêl po poah, ram tinah a chanchin ân thang nghâl ta a.

²⁹Chun, inkhâwmna ina inthawka an suok chun, Simon le Andri inah Jakob leh Johan leh an lût a.

³⁰Chun, Simon tarpinu khawsikin a na a, a lo zâl a; chuongchun, a umzie chu Isu an hril nghâl ta a;

³¹chun, ama chun, a kut a va chel a, a keitho ta a. Chuongchun, a khawsik chu a bo ta a, an rawng a bâwlpêk ta a.

³²Chun, zântienga nisa tlâk hnung chun, damnaw po po le khawhri iman dâm a kuomah an hung ṭhuoi a.

³³A khuo chun kawtkhâr bulah an hung inkhâwm mup el ta a.

³⁴Chuongchun, mi tamtak natna tinrêng invawihai chu a sukdam a, khawhri tamtak a hnawt suok bawk a; khawhrihai chun ama an hriet leiin an ṭawng a phal naw a.

³⁵Chun, zîngkâr inhmatakin, khawvar hma daiin a tho a, a suok a, hmun fienrielah a va fe a, chutaka chun a ṭawngṭai a.

³⁶Chun, Simon le a ruolhai chun an hnawtzui a;

³⁷ama an va hmu chun, a kuomah, “Mi po poin an zawng che i sawnnâwm ie,” an ta.

³⁸Ama chun an kuomah, “Hmun danga khaw hnaiahai dâm chun fêng ei tiu, chuonga hai khawm chun thu ka hril theina dingin, hi lei taka hung ka ni si a,” a ta.

³⁹Chuongchun, thu hrila, khawhrihai khawm hnawt suok peiin Galili ram po poa an inkhâwmna inahai chun a lût pei a.

⁴⁰Chun, a kuomah phâr a hung a, “I nuom chun i mi sukthieng thei,” a ta, a hmaah a dingṭhaṭhuon a, a ngên rak el a.

⁴¹Ama chun a lo lunginsiet bêk bêk a; a hei ban a, a them a, “Ka nuom ie, sukthiengin lo um ta rawh,” a ta.

⁴²Chuongchun, kârlovin ân phârna chu a bo nghâl el ta a, a hung inthieng ta a.

⁴³Chun, ama chu hril lo dingin thu a pêk tlat a, ân fetir ta a;

⁴⁴a kuomah, “Tu kuoma khawm iengkhawm va hril dêr naw raw kha; nisienlakhawm, thiempu kuomah vân entir la, an hriet fel theina dingin Mosie thil ruothai kha i înthienna dingin vân hlân rawh,” a ta.

⁴⁵Nisienlakhawm, ama chu a suok a, tlânginsamin chu thu chu a puong dar phut el ta a; chuongchun, Isu chu uolautakin khuo a lût thei ta naw a; thlalêr hmunahai a um lem ta a; chun hmun tina mi a kuomah an hung hlak a.