Read Hmar MARKA 10 Bible Online

MARKA 10 - Hmar bible

MARKA 10

¹Chun, a tho a, chutaka inthawk chu Judai ram le Jordan râlah a fe ta a; chun, mipuihai chu a kuomah an hung inkhâwm nâwk a, chuongchun, a thaw dân pângngaiin a lo inchûktir nâwk a.

²Chun, Pharisaihai ṭhenkhat a kuomah an hung a, ama fiena dingin “Mîn a nuhmei a mâk a thieng am?” tiin an indawn a.

³Ama chun an kuomah, “Mosien iengtin am thu a pêk cheu a?” tîn a dawn a.

⁴Chun, anni chun, “Mosie chun inmâkna lekha inziekin mâk a phal hlak a nih,” an ti a.

⁵Nisienlakhawm, Isûn an kuomah, “In lungril ngar leiin a nih in sawnnaw chu thu chu ân ziekpêk cheu chu.

⁶Nisienlakhawm, leilung insîeng tîra inthawk chun, ‘Anni chu nuhmei le pasalin a siem a nih,’

⁷‘Chuleichun, pasalin a nu le pa mâksan a ta, a nuhmei chel a ta;

⁸chuongchun, an pahni chun tisa pumkhat lo ni tâng an tih, chuongchun, pahni an ni ta naw a, tisa pumkhat an lo ni ta lem a nih’.

⁹Chuleiin, Pathienin a izawm ta hnung chu mihriemin ṭhe naw raw se,” a ta.

¹⁰Chun, ina chun, a închûktirhaiin chuong thu chu an indawn nâwk a.

¹¹Ama chun an kuomah, “Tûkhawm a nuhmei ma a, mi dang nei taphawt chun a nuhmei chu a retsan a nih;

¹²ama khawm chun a pasal inṭhepuia mi dang a nei chun a uire a ni bawk,” a ta.

¹³Chun, a ithem dingin naupangtehai an hung ṭhuoi a; chun, inchûktirhai chun an lo hal a.

¹⁴Nisienlakhawm, Isûn chu chu a hmuin a lung a ni naw bêk bêk a, an kuoma chun, “Naupangtêhai ka kuomah inhungtir unla, khap naw ro; Pathien ram chu hieng ang mihai ta a ni si a.

¹⁵Titakzetin ka hril cheu, tûkhawm Pathien ram chu naupangtêin a lâwm anga lâwm naw phawt chu a sûngah lût naw tawp an tih,” a ta.

¹⁶Chun, annirawi chu a hang kuo a, an chungah kut innghatin mal a sâwmpêk ta a.

¹⁷Chun, fe dinga a suok laitakin mi pakhat a kuom tieng a hung tlân a, a hmaah a dingṭhaṭhuon a, a kuomah, “Inchûktirtu ṭha, kumkhuoa hringna ka nei theina dingin ieng am thâwng ka ta?” tiin ân dawn a.

¹⁸Chun, Isu chun a kuomah, “Iengdinga ṭha i mi ti? Mi pakhat chau naw chu tukhawm ṭha an um nawh, chu chu Pathien a nih.

¹⁹Thupêkhai chu i hriet annâwm: ‘Tuol that naw, Uire naw, Inru naw, Hrietpuina inkhêl pe naw, Hlêm naw, I nu le pa chawimawi rawh,’ tihai hi,” a ta.

²⁰Chun, ama chun a kuomah, “Inchûktirtu, chuong thu po po chu naupang chîte ka ni laia inthawkin ka zâwm hlak,” a ta.

²¹Chun, Isûn ama chu a en a, a hmangai ta a, a kuomah, “Kawng khat i la bâk, fe la, i nei taphawt zawr la, pasiehai kuomah pe rawh, chuongchun, vânah ro nei i tih; chun, hung la mi hung zui rawh,” a ta.

²²Nisienlakhawm, chuong thu lei chun a hmêl chu a hung inthim khup el a, lungzîngtakin a fe hmang ta a, sum tamtak nei mi a ni si a.

²³Chun, Isûn a en vêl a, a închûktirhai kuoma chun, “Sumhauhai chu Pathien rama lût a vân tak âwm de e,” a ta.

²⁴Chun, inchûktirhai chun, a thu hril chu mak an ti hle a, Isu ruok chun a dawn nâwk a, an kuomah, “Nauhai, sum ringhai ta ding chun Pathien rama lût a vân tak hlak de aw;

²⁵Mihausa Pathien rama a lût nêkin sanghâwngsei ṭhim naa a lût thleng awl lem a tih,” a ta.

²⁶Chun, anni chun mak an ti nasa bêk bêk a, a kuomah, “Anleh, tu am sandam ni thei an ti leh?” an ta.

²⁷Isûn anni chu a en a, “Chu chu mihriem ta dingin thaw ruol a ni naw a, Pathien ta ding ruok chun thaw ruol lo a ni nawh; Pathien ta dingin iengkim thaw thei a ni si a,” a ta.

²⁸Peterin a kuomah, “Ngai ta, keinîn iengkim mâksanin kan zui che a,” tiin a hang hril phut a.

²⁹Isu chun, “Titakzetin ka hril cheu, tûkhawm keia lei le Chanchin Ṭha leia in amanih, unaupahai amanih, farnuhai amanih, nu amanih, pa amanih, nauhai amanih, ram dâm khawm amanih fe san taphawt chu,

³⁰hi dam sûng ngei khawm hin, inhai, unaupahai, farnuhai, nuhai, nauhai, ramhai dâm a lêt zain, suknawmnatnahai leh, hmu naw ding tukhawm an um nawh, hun la hung tlung dinga chatuona hringna leh.

³¹Nisienlakhawm, mi tamtak a hmasataka umhai chu a nuhnungtakah la um an ta, a nuhnungtakhai khawm chu a hmasatakah la um an tih,” a ta.

³²Chun, Jerusalema hang fe dingin lampuiah an um a; Isu chu a hmasa a. Anni chun mak an ti hle a, a hung zuituhai chun an ṭi a. Chun, ama chun sâwm le pahnihai chu a tumin a ṭhuoi nâwk a,

³³“Ngai ta u, Jerusalemah ei hang fe nâwk ding a ni hi; Mihriem Naupa hi thiempu lalhai le Dân inchûktirtuhai kuoma inmantirin a la um ding a nih. Anni chun thi dingin a chungah thu rêlthlûng an ta, Jentailhai kuomah pêng an tih.

³⁴Chun, nuizat siemnân hmang an ta, chil sâk khum an ta, vuong an ta, sukhlum an tih; chun, ni thum chenah thonâwk a tih,” tiin a chunga thil hung tlung dinghai chu an kuomah a hril ta a.

³⁵Chun, Zebedai naupahai Jakob le Johan chun ama chu an hung hnai a, a kuomah,“Inchûktirtu, i kuomah kan hni dinghai hi i mi thawpêk kan nuom,” an ta.

³⁶Chun, ama chun an kuomah, “In ta dingin ieng am thawpêk inla cheu in nuom a?” a ta.

³⁷Anni chun a kuomah, “I ropuinaa chun i changtieng pakhat, i vawitieng pakhat mîn ṭhungtir raw aw?” an ta.

³⁸Isu ruok chun an kuomah, “In hni chu in hriet naw a nih. Ka no dâwn ding chu in dâwn thei am a nih? Ka baptisma chang ding khawm chu in chang thei am a nih?” a ta.

³⁹Chun, anni chun a kuomah, “Thei e,” an ti a. Chun, Isûn an kuomah, “Ka no dâwn ding chu dâwn in ta, ka baptisma chang ding khawm chu chang vêng in tih;

⁴⁰Nisienlakhawm, ka changtienga manih ka vawitienga manih, ṭhung ding thu chu keia pêk ding a ni naw a, an[14] ibuotsaipêkhai ta ding ni lem a tih,” a ta.

⁴¹Chun, sâwmhai chun chu chu an lo hrietin Jakob le Johan chunga chun an lungninaw ta bêk bêk a.

⁴²Isu ruok chun annihai chu a ko a, an kuomah, “Jentailhai chunga rorêltua an iruothai chu an chungah an inlal bêk bêk hlak a, an mi lienhai chun an chungah thu an nei nasa hle ti in hriet a.

⁴³Nangni lai ruok chun chuong chu ni naw nih, tukhawm in laia mi lien ni nuom phawt chu in rawngbâwltuin a um lem ding a nih!

⁴⁴Tukhawm nangni laia a hmasatak ni nuom phawt chu mi po po rawng bâwltuin a um bawk ding a nih.

⁴⁵Mihriem Naupa meu khawm rawngbâwlpêka um dinga hung a ni naw a, mi tamtak intlanna dinga a hringna pe ding lema hung a ni si a,” a ta.

⁴⁶Chun, Jeriko an hung tlung a; chun, Isu Jerikoa inthawk chun a închûktirhai leh, mipui nasatak leh a suok laiin kutdaw mitdel, Timai naupa Bartimai chu lampui sîrah a lo ṭhung a.

⁴⁷Chuongchun, Nazareth Isu a nih ti a hriet phingin, “Isu David naupa, mi lunginsiet rawh,” tiin a khêk ta a.

⁴⁸Mi tamtakin to dingin an hal a; nisienlakhawm, ama chun, “David naupa, mi lunginsiet rawh,” tiin a khêk zuol det a.

⁴⁹Isu chu a lo ngîr a, “Ama chu hung ko ta u,” a ta. Chun, mitdel chu an ko a, a kuomah, “Lungmuongtakin um rawh, a ko che,” an ta.

⁵⁰Chun, ama chun a puon a pei a, ân châwm tho a, Isu kuomah a fe a.

⁵¹Chun, Isûn ama chu a lo biek a, “I chungah ieng ang am ka thaw i nuom a?” a ta. Chun, mitdel chun a kuomah, “Rabboni, hmu thei ka nuom,” a ta.

⁵²Chun, Isûn, “Fe ta rawh, i ringna hi i dampui a nih,” a ta. Chuongchun, a hmu thei nghâl ta a, lampuia chun Isu a zui ta a.