Read Hmar MARKA 11 Bible Online

MARKA 11 - Hmar bible

MARKA 11

¹Chun, Jerusalem an tlung tâwm a, Oliv tlânga Bethphage le Bethani khuo kâwl an tlungin, a închûktirhai laia mi pahni a tir a,

²an kuomah, “In hma zâwn khuoa sawn fe unla; chun, in hei lût hlimin sabengtungte thlung, tukhawm la chuongna ngainaw va hmûng in ta; chu chu sût unla hung kei ro.

³Chun, tûkhawmin, ‘A kha iengding am in ti a?’ an ti cheu chun, ‘Lalpain a mamaw a nih, ahin hung insietir nâwk vak a tih,’ ti ro,” a ta.

⁴Chuongchun, an fe ta a, kawtthlêra kawtkhâr puotienga sabengtungte inthlung an va hmu a. Chun, chu chu an sût ta a.

⁵Chun, chutaka ngîr tuhai amani chun an kuomah, “Sabengtungte kha iengdinga in sût?” an ta.

⁶Chun, anni chun, Isu hril ang tak khan an kuoma chun an hril a; chuongchun, an fe an phal ta a.

⁷Chun, sabengtungte chu Isu kuomah an hung kei a, a chunga chun puonhai an pha a; chuongchun, a chungah a chuong ta a.

⁸Chun, mi tamtakin lampuia chun an puon an pha a; mi dangin lova sâwlhna an va sât a, an pha bawk a.

⁹Chun, a hma tienga fehai le a hnunga hung zuituhai chun, “Hosanna, Lalpa hminga hung chu inpâkin um raw se;

¹⁰Ram hung tlung ding ei Pa David ram chu, inpâkin um raw se; A chunghnungtaka khin Hosanna,” tiin an khêk a.

¹¹Chun, Jerusalema Pathien biekina chun a va lût a; iengkim a en vêl zo chun; zântieng khawm a lo ni ta a, a suok a, sâwm le pahnihai leh Bethaniah an fe ta a.

¹²Chun, azîng Bethania inthawka a suok hnungin a phîng a ṭâm ta a.

¹³Chun, theichang kûng hna nei hlataka hin a hei hmu a, “A ra ka hmu duoiin,” tiin a va fe a; a va tlung chun a hna chau naw chu iengkhawm a hmu naw a; theichang ra pha a ni naw hrim a.

¹⁴Chuongchun, Isûn thing chu a biek a, “Tuta hnung kumkhawtluongin i ra hrim hrim tukhawmin fa ta naw raw hai se,” a ta. A închûtirhai rawi chun chu chu an hriet a.

¹⁵Chun, Jerusalem chu a tlung a, Pathien biekinah a va lût a, biekina iengkhat zawrtuhai le ân chawtuhai chu a hnawt suok ta a. Tangka thlengtuhai dawkânhai le, vaṭhu zawrtuhai ṭhungphahai khawm chu a nam thlûk pêk bawk a.

¹⁶Chun, Pathien biekina chun tukhawmin thuomhnaw an chawi thleng chu a phal ta bawk naw a.

¹⁷Chun, an kuoma chun, “ ‘Ka in chu hnam tin ta dinga ṭawngṭaina in tîng an tih,’ ti ziek a ni naw am a nih? Nangni ruok chun suomhmanghai pûkin in siem lem hi,” tiin ân chûktir ta a.

¹⁸Chun, thiempu lalhai le Dân inchûktirtuhai chun chu chu an hriet a, a sukbo theina ding zie an zawng a. Mipuihai po po chun a închûktirna chu mak an ti hle leiin ama an ṭi bawk si.

¹⁹Chun, zântieng a hung ni chun, Isu le a inchûktirhai chu khawpuia inthawk chun an fe suok a.

²⁰Chun, zîngkâra an fe malam chun theichang kûng chu a zung chena thêm zo vawngin an hmu ta a.

²¹Chuongchun, Peterin a hriet suok nâwk a, a kuomah, “Rabbi en ta, theichang kûng ṭawngsie în phur kha a lo thêm vawng tah,” a ta.

²²Chun, Isu chun an kuomah, “Pathienah ringna nei ro.

²³Titakzetin ka hril cheu hi, tûkhawm hi tlâng kuoma hin, ‘Insawn la, tuisuorietah dehâwnin um rawh,’ tia a lungrila ringhla lova a iti chu tlung ngei a tih ti ring taphawtin an hril ang phawt chu hmûng an tih.

²⁴Chuleichun, ka ti cheu hi, iengkim ṭawngṭaia in hni taphawt chu, hmusain inngai unla, chuongchun, hmûng in tih.

²⁵Chun, ṭawngṭai dinga in ngîr pha po leh tu chunga khawm thupawi ieng am a nih in nei chun ngaidam ro; vâna in Pa khawmin in bawsietnahai chu a ngaidam theina ding cheu in.

²⁶[nisienlakhawm, in ngaidam naw chun, in Pa vâna mi khawmin ngaidam bîk naw ni cheu,][15]” a ta, a dawn a.

²⁷Chun, Jerusalem chu an tlung nâwk a; chun, Pathien biekina a lêng laiin thiempu lalhai, Dân inchûktirtuhai, upahai chu a kuomah an hung a,

²⁸a kuoma chun, “Tu thuin am hieng hi i thaw a na? Hienghai hi thaw dingin tuin am thu a pêk che a?” an ta.

²⁹Isûn an kuomah, “Kei khawmin thu bau khat indawn vêng ka ti cheu; mi dawn unla, chuongchun, tu thuin am hieng hi ka thaw hril ka ti cheu.

³⁰Johan baptisma kha vâna mi thu amani, mihriem thu? mi dawn ro,” a ta.

³¹Chun, an inngaituo a, “ ‘Vâna mi thu,’ ei ti chun, ‘Ieng dinga a thu in awi naw?’ a mi ti âwm si a.

³²‘Mihriem thu,’ ei ti el ding am a ni chu?” an ta. Nisienlakhawm, mipui chu an ṭi a, mi po poin Johan chu zâwlnei takin an ngai tâwl si a.

³³Chuongchun, Isu chu an dawn a, “Kan hriet nawh,” an ta. Chun, Isûn an kuomah, “Kei khawmin tu thuin am hieng hi ka thaw a, hril bîk naw ning cheuah,” a ta.