Read Hmar MARKA 12 Bible Online

MARKA 12 - Hmar bible

MARKA 12

¹Chun, tekhithuin an kuomah a hril ta a, “Tuin amanih grêp huon a siem a, palin ân huon a, grêp sâwrna ding khur a cho a, in insâng a bâwl a, lo enkawltuhai kuomah thlo hlaw dingin a pêk a, ram dangah a fe ta a.

²Chun, a lo pha chun huona ra chu a chanâi lo enkawltuhai kuoma va la dingin lo enkawltuhai kuoma chun suok pakhat a tir a.

³Chun, chu mipa chu an lo man a, an vuok a, kut ruokin an infetir ta a.

⁴Chun, suok dang an kuoma chun a tir nâwk a; chu khawm chu a lu an lo sukpawp a, inzakumtakin an lo sawisa a.

⁵Chun, suok dang a tir nâwk pei a, chu mipa chu an lo sukhlum a. Suok dang tamtak khawm aṭhen an lo vuok a, aṭhen an lo sukhlum a.

⁶Chun, pakhat, naupa dittak chu a la nei a, ‘Ka naupa hi chu inza êm naw ni hai am,’ tiin ama chu a nuhnungtakah an kuomah a tir a.

⁷Nisienlakhawm, chuong lo enkawltuhai chun, ‘Hi mipa hi rohluotu ding chu a nih; that ei tiu khai; chuongchun, a ro hluo dinghai hi ei ta a ni el ding a nih,’ an in ti a.

⁸Chuongchun, ama chu an lo man a, an sukhlum a, grêp huona inthawk chun an the suok ta a.

⁹Chuongchun, huon neitu chun iengtin am hung thâwng a ta? Lo enkawltuhai chu hung sukbo a ta, huon chu mi danghai pêng a tih.

¹⁰Hi Pathien Lekha Thu hi in tiem naw am a nih? ‘In bâwltuhai lung dit naw kha, Chu ngei chu a kia lung ṭhangkaitak a lo ni tah.

¹¹Chu chu Lalpa thaw a na, Ei mithmua hin a mak a nih,’ ti hi,” a ta.

¹²Chun, ama chu man an tum ta a, nisienlakhawm, mipui an ṭi si a, chu tekhithu chu anni demin a hril a nih ti an hriet si a. Chuongchun, ama chu an mâksan a, an fe hmang ta a.

¹³Chun, a thu hrila inthawka man dingin Pharisaihai le Herod pâwla tuhai amanih a kuomah an tir a.

¹⁴Chun, anni chu an hung tlung chun a kuomah, “Inchûktirtu, mi indiktak i na, tukhawm pawisak chuong i nei nawh ti kan hriet a, tukhawm thlier bîk nei lovin, theipatâwpin Pathien thu în chûktir hlak a. Kaisar kuoma sie chawi hi a thieng am a ni a thieng naw? kan pêk ding am a ni, kan pêk naw ding?” an ta.

¹⁵Ama ruok chun an vervêkziehai chu hre zingin, an kuomah, “Iengdinga in mi fie am a na? Duli[16] hung la tu, lo en ka tih,” a ta.

¹⁶Chuongchun, an hung lâk a. Ama chun an kuomah, “Hi hi tu lim le tu hming am a na?” a ta. Anni chun, “Kaisar,” an ta.

¹⁷Chuongchun, Isûn an kuomah, “Kaisar thilhai chu Kaisar kuomah pe unla, Pathien thilhai chu Pathien kuomah pe ta unla,” a ta. Chuongchun, mak an ti bêk bêk a.

¹⁸Chun, Saddukaihai, thonâwkna a um nawh tituhai chu a kuomah an hung a,

¹⁹a kuomah, “Inchûktirtu, Mosiein ‘Tûkhawm a unaupân nau nei lovin a nuhmei thisan sienla, a unaupa chun a nuhmei chu hluong a ta, a unaupa ta dingin suon a thla pêk ding a nih,’ tiin a mi ziekpêk a nih.

²⁰Awle, Sal sari hi an um a, a upatakin nuhmei a nei a, suonmawngin a thi a .

²¹Chuongchun, a pahnina chun a nuhmei chu a hluo a, suon mawngin a thi nâwk bawk a; pathumna khawmin chuong bawk chun.

²²Chuongchun, sal sarihai chu suon hrim hrim nei lovin suon mawngin an thi vawng el ta a. A nuhnungtaka chun nuhmei khawm chu a thi ta a.

²³Thonâwk phaleh a tu tak nuhmei am nîng a ta? An pasari chun nuhmeiin an nei seng si a,” tiin an indawn a.

²⁴Isûn an kuomah, “Hi lei hin a nih in ngai suol rawp hlak, Pathien Lekha Thu le Pathien thil thaw theizie in hriet naw leiin.

²⁵Mithi laia an tho nâwk hnungin nuhmei pasal innei ta naw nihai a, vâna vântirkohai ang an ni lem ta ding a nih.

²⁶Chun, mithihai keithoa an um ding thu chu, Mosie lekhabua chîmbuk thua khan Pathienin ‘Kei Abraham Pathien, Isak Pathien, Jakob Pathien ka nih,’ tia a biekzie kha in tiem naw am a nih?

²⁷Ama chu mithi Pathien a ni naw a, mi hring Pathien a ni lem; in ngai suol nasa hle a nih,” a ta.

²⁸Chun, Dân inchûktirtuhai laia mi pakhat a hung a, an insêl chu a lo ngai zing a, Isûn annirawi chu ṭhatakin a dawn ti a hriet a, a kuomah, “Thupêk po po lai ieng him a ropui[17] tak a?” tîn ân dawn a.

²⁹Isun “A ropui tak chu hi hi a nih, ‘Israelhai, ngai ta u, Lalpa ei Pathien chu Lalpa pakhat chau a nih,

³⁰Lalpa i Pathien chu i lungvar po poin, i thlarau po poin, i lungril po poin, i hrâtna po poin i hmangai ding a nih,’ ti hi.

³¹A dawttu chu hi hi a nih, ‘Nang le nang în hmangai angin i vênghai khawm i hmangai ding a nih,’ ti hi. Hieng nêka thupêk ropui lem hrim hrim hi a um nawh,” tiin a dawn a.

³²Chun, Dân inchûktirtu chun a kuomah, “A ni luo ie, inchûktirtu, Ama chu pakhat chau a na, ama naw chu tukhawm dang an um nawh,

³³ama chu lungril po poa, hrietna po poa, hrâtna po poa hmangai a, mâni inhmangai anga vênghai hmangai chu pumrawhmang ser pêk po po le inthawina po po nêkin a ṭha lem bêk bêk ti hi i hril dik ngawt el,” a ta.

³⁴Chun, vartakin a dawn ti Isûn a hrietin a kuomah, “Pathien ram i hlat naw hi” a ta. Chu hnunga chun tukhawmin thu hrim hrim an indawn ngam naw a.

³⁵Chun, Isûn Pathien biekina ân chûktir laiin an kuomah, “Krista chu David naupa a nih ti Dân inchûktirtuhaiin iengti ziea hril hlak am an ni a?

³⁶David ngeiin, Thlarau Inthiengin, ‘Lalpa chun ka Lalpa kuomah, Ka changtieng ṭhung rawh, I hmêlmahai i kepha hnuoia ka sie hmakhat chu,’ a ti a,

³⁷“David ngei chun ama chu, ‘Lalpa,’ a ti si a, khâwlai am a naupa ni hlak a ta?” tîn a dawn a. Chun, vântlânghai chun a thu chu lâwmtakin an ngai a.

³⁸Chun, a închûktirnaa chun, “Dân inchûktirtuhai lai hin fimkhur ro, anni chun zakuo fuol hâka lêng an nuom hlak a, dâwr hmuna chibai bûk dâm,

³⁹inkhâwmna ina ṭhungpha ṭhatak dâm, thlaithlêng awtnaa dâm hmun ṭhatak an ngiet hlak a.

⁴⁰Hmeithai sum an fâk a, vântlâng hlêmna dingin sâwt tak tak an ṭawngṭai hlak a, chuonghai chun thiemnaw chang nasa zuol an tih,” a ta.

⁴¹Chun, thawlâwm bâwm zâwna chun a ṭhung a, thawlâwm bâwma mipuihai tangka thlâkzie chu a en a, mihausa tamtakin tamtak an thlâk a.

⁴²Chun, hmeithai pasetak a hung a, dâr tangka dere[18] pahni a thlâk a, (chu chu pawisa khat[19] hu a nih.)

⁴³Isu chun a închûktirhai chu a ko a, an kuomah, “Titakzetin ka hril cheu hi, thawlâwm bâwma thlâktu po po hai nêkin hi hmeithai pasetak hin a thlâk tam lem.

⁴⁴Hienghai po po hin an nei chuongliem an thlâk a na, ama ruok hin chu a ditlai tak, a neisun tak, a întodelna ding po chu a thlâk a nih,” a ta.