Read Hmar MARKA 13 Bible Online

MARKA 13 - Hmar bible

MARKA 13

¹Chun, Pathien biekina inthawka a fe suok lai chun, a închûktirhai laia mi pakhatin a kuomah, “Inchûktirtu, en ta, a lung le inhai hi a ropui hle a nih,” a ta.

²Chun, Isûn a kuomah, “Hieng in nasatak hi in hmu maw? Sukchim lova lung inthuo hrim hrim hitaka hin um naw ni,” a ta.

³Chun, Oliv tlâng Pathien biekin zâwna a ṭhung laiin Peter hai, Jakob hai, Johan hai, Andri hai chun a kuomah, “Chuong chu iengtik am hung um a ta?

⁴Chuonghai po po a hung tlung ding pha inchikna ieng am um a ta? mi hril rawh,” tîn inrûkin an indawn a.

⁵Chun, Isûn an kuomah, “Tukhawmin an hlêm nawna ding cheuin fimkhur ro.

⁶Mi tamtakin, ‘Krista chu ka nih,’ tîn keia hming sâlin hung an ta, mi tamtak hlêm an tih.

⁷Chun, indo thu le indo thuthang dâm in hriet pha leh lunginzing naw ro; chuongchu hung tlung ding hrim a nih; nisienlakhawm, tâwpna chu la ni hri naw ni.

⁸Hnam dang le hnam dang indo an ta; ram tum le ram tum indo an ta; hmun dang dangah simkhawleihai inhnîng a ta, ṭâmhai tlâng a ta. Chuong chu nauhase phut ang hi nîng a tih.

⁹“Nisienlakhawm, fimkhur ro, rorêltuhai an inmantir ding cheu a nih; inkhâwmna inhaiah vuong an ti cheu a, keia leiin hotuhai le lalhai hmaah anni inhriettirna dingin la ngîr bawk in tih.

¹⁰Chun, Chanchin Ṭha hi hnam po po laia hril hmasak ding a nih.

¹¹Chun, an ṭhuoi cheua an inmantir phâ cheu chun, ‘Ieng am ka hril ding a na?’ tiin ngaituo lâwk naw ro, a hun taka inhriettira in um chu, chu ngei chu hril lem ro; a hriltu chu nangni in ni âwm si naw a. Thlarau Inthieng ni lem a tih.

¹²Chun, sukhlum dingin unau khawm inmantir an ta, pa khawmin a nau inmantir bawk a ta, nauhai khawmin an nu le pahai do an ta, insukhlumtir bawk an tih.

¹³Ka hming leiin mi po po theida nîng in ta; nisienlakhawm, a tâwp chena tuor pei chu, chu ngei chu sandamin um a tih.

¹⁴“Nisienlakhawm, sukrêmtu tirdakum chu a ngîr nawna dinga ngîr in hmu phâleh, (a tiem taphawt chun a umzie hre raw se); chu phâ chun Judai rama umhai chu tlânga dâm tlân hmang raw se;

¹⁵chun in chunga um chu ṭum naw raw se, a in sûnga thuomhnaw inchu ding khawmin lût naw raw se;

¹⁶Chun, loa um chu a puon inchu dingin kîr nâwk naw raw se.

¹⁷Chuong nia chun inrai le naute pawm laihai chu an chung rik a tih.

¹⁸Chun, chuong chu phalbi laia a tlung nawna dingin ṭawngṭai ro.

¹⁹Chuong ni chu rimsik ni a ni ding a ni si a; chuong anga nasa hrim hrim chu Pathien isiem leilung insieng tîra inthawk tu chen hin a la um ngai naw a, iengtika khawm hung um nâwk ta naw bawk a tih.

²⁰Chun, Lalpân chuong nihai chu suktawi naw sien chu mihriem hrim hrim damin suok naw ni hai; nisienlakhawm, mi thlang a iruothai leiin nihai chu a suktawi a.

²¹“Chun, chu phâle chun, tûkhawmin in kuomah, ‘En ta, Krista chu hiva hin a um,’ amanih, ‘En ta, sawva saw,’ amanih an ti chun awi naw ro.

²²Krista tehlêm le zâwlnei tehlêmhai an hung suok ding a ni si a; chuonghai chun inchikna le thilmak tak tak thâwng an tih, thei hai sienla, thlanghai rau khawm an hlêm theina dingin.

²³Nangni ruok chu fimkhur ro, ngai ta u, iengkim ka hril lâwk ta cheu hi.

²⁴“Nisienlakhawm, chuong nia chuong rimsikna hnunga chun nisa sukthimin um a ta, thla var ta naw ni a,

²⁵vâna inthawkin arasihai hung tlâng a ta, vâna thilthawtheina umhai chu sukhnîngin um a tih.

²⁶Chu phâ le chun Mihriem Naupa hi thilthawtheina nasatak leh sûm laia hung hmûng an tih.

²⁷Chun, vântirko chu tir suok a ta, a thlanghai chu kâwl kil lia inthawkin, hnuoi tâwpa inthawka vân tawp chenin lâwr khawm a tih.

²⁸“Chuongchun, theichang kûnga hin chu tekhithu chu inchûk ro; a kau a hung indâwn a, a hna a hung inder chun nipui a ni ding a ni tah ti in hriet hlak.

²⁹Chuong ang bawkin nangni khawmin, chuong chu a hung tlung in hmu phâ chun ama chu a hung hnai ta a, kawtkhâr bul ngeiah a um tah ti hre ro.

³⁰Titakzetin ka hril cheu hi, chuong po po chu a tlung hmakhat chu, tulaia ruoltharhai hi bo naw nihai.

³¹Hnuoi le vân bo a ta, ka thu ruok chu bo naw ni.

³²“Nisienlakhawm, chu ni le a dâr thu chu Pa chau naw chun tukhawmin, vâna vântirkohai khawmin, Naupa khawmin, an hriet nawh.

³³Fimkhur unla, inring zinga umin ṭawngṭai ro, a hun chu in hriet si naw a.

³⁴Mîn a in mâksana, a suokhai chu thu inneitira, an sin thaw ding pe seng a, kawtkhâr vêngtu khawm chu inring zinga um ding thu a pêk zet a, ram hlataka inzin ta dai ang a nih.

³⁵Chuongchun, inring zingin um ro, in neitupa hung ding phâ chu zântienga manih, zâna manih, ârkhuona manih, zîngkara mani ding in hriet si naw a;

³⁶chuong naw chun hung phut a ta, inin hung hmu hlau rawi a ti cheu.

³⁷Chun, in kuoma ka hril hi mi po po kuoma hril ka nih, inring zingin um ro,” a ti ta a.