Read Hmar MARKA 14 Bible Online

MARKA 14 - Hmar bible

MARKA 14

¹Chun, ni hni hnung chun Fekân Ruoiṭhe le Chawlṭhanglo bei Ruoiṭhe a um ding a na; Thiempu lalhai le Dân inchûktirtuhai chun ama chu zâwra, mana sukhlum theina dingzie an zawng an zawng a.

²Nisienlakhawm, “Ruoiṭhe sûng chu ni naw sienla, chuong naw chun vântlâng lai buoina hung um hlau rawi a tih,” an ta.

³Chun, Bethania phâr Simon ina bu a fâk a, a um laiin nuhmei pakhat alabastar bûra spiknard hriek riminhnik totak chawiin a hung a, a bûr chu a sukkawi a, a lu a buok khum a.

⁴Nisienlakhawm, a ṭhen chu an lung a sen tâwla, “Iengdinga hriek rim inhnik hi a sukriral mei mei am a na?

⁵Hi hriek hi duli[20] zathum nêka tama zawr a, pasiehai kuoma pêk thei a ni si a,” an ta. Chuongchun, a chunga chun an chier ta a.

⁶Isu ruok chun, an kuomah, “To san ro, iengdinga ama in sukbuoi am a na? ka chunga hin thil mawi tak a thaw a nih.

⁷Pasiehai chu kumkhuoa in kuoma um an na, in nuom phâ phâ anni chu in lunginsiet thei annâwm, kei ruok chu kumkhuoa in kuoma um ding ka ni nawh hi.

⁸A thaw thei ang tâwk a thaw a nih; ka taksa hi phûm dingin a lo nâl lâwk a ni hi.

⁹Chuongchun, titakzetin ka hril cheu hi, khawvêl po poah, khâwlai khawm Chanchin Ṭha an hrilna taphawta chun hi nuhmei thil thaw hi ama hriet zingna dingin hril sa pei an tih,” a ta.

¹⁰Chun, Juda Iskariot, sâwm le pahni laia mi pakhat khan, Isu chu an kuoma ân mantir theina dingin thiempu lalhai kuomah a va fe a.

¹¹Chun, anni chun an hriet phingleh an lâwm hle a, a kuoma tangka pêk an tiem a, chuongchun, ân mantir dân ding remchâng a zawng ta a.

¹²Chun, Chawlṭhanglo bei Ruoiṭhe ni hmasatak Fekan Ruoiṭhena berâmte an thatna hlak nia chun a închûktirhaiin a kuomah, “Fekân Ruoi bu i fâk theina dingin khâwlai am va siem inlang i nuom a?” an ta.

¹³Chuongchun, a închûktirhai laia mi pahni a tir a, an kuomah, “Khawpuiah va lût unla, pasal bêla tui putin intuokpui a ti cheu a, ama chu zui lût ro.

¹⁴Chun, a lûtna naa chun, chu in neitupa kuoma chun, ‘Inchûktirtu chun, ka închûktirhai le Fekân Ruoi bu kan fâkna ding ka mikhuol pindan chu khâwlai am a na? a tih’ ti unla.

¹⁵Chuongchun, ama ngei chun pindan chunghnung lientak, thuomhnaw umsa, inrêlsa diem, inentir a ti cheu a, chu hmuna chun ei ta dingin va siem ro,” a ta.

¹⁶Chun, inchûktirhai chu an fe a, khawpuia chun an va lût a; an kuoma a hril ang khan an va hmu a, chun, Fekân Ruoi bu chu an siem ta a.

¹⁷Chun, zântieng a hung ni chun, ama chu sâwm le pahnihai le chun an va fe ta a.

¹⁸Chun, an awt a, an fâk laiin Isûn, “Titakzetin ka hril cheu hi, nangni laia mi pakhat ka kuoma fa ve ngei hin mîn mantir a tih,” a ta.

¹⁹Chun, an lungngai ta hle a, pakhat khatin a kuomah, “Kei am ka nih?” an ti seng a.

²⁰Ama chun an kuomah, “Sâwm le pahni laia mi pakhat thlênga a mîn chiepuitu hi a nih.

²¹Mihriem Naupa hi a chanchin an ziek ang tak khan a fe ding a nih; nisienlakhawm, Mihriem Naupa inmantirtu ding mihriem chung chu a rik; chu mipa chu lo insieng naw sienla a ta dingin ṭha lem a tih,” a ta.

²²Chun, an fâk laiin Isûn bei a lâk a, mal a sâwm zoin a khawi a, an kuomah a pêk a, “La ro, hi hi ka taksa a nih,” a ta.

²³Chun, no a lâk a, lâwmthu a hril zoin anni a pêk a, chuongchun, an rêngin an dâwn ta seng a.

²⁴Chun, ama chun, an kuomah, “Hi hi ka thisen, mi tamtak ta dinga suok ding thu thlungna[21] chu a nih.

²⁵Titakzetin ka hril cheu hi, Pathien rama a thar ka dâwn ni a tlung hmâkhat chu, grêp hrui raa hi dâwn nâwk ta naw ning,” a ta.

²⁶Chuongchun, hla an sak zo chun an fe suok a, Oliv tlânga chun an fe ta a.

²⁷Chun, Isûn an kuomah, “In rêngin lungnilovin la um vawng in tih, ‘Berâmpu vuong ka ta, berâmhai chu indar an tih,’ ti ziek a ni si a.

²⁸Nisienlakhawm, ka thonâwk hnungin Galili ramah in hmaah fêng ka tih,” a ta.

²⁹Peter ruok chun a kuomah, “An rêngin lungnilovin um hai sienla khawm, kei chu um naw ning,” a ta.

³⁰Nisienlakhawm, Isûn a kuomah, “Titakzetin ka hril che, vawisûn hin, vawizân la la hin âr vawi hni a khuong hmâin nangin vawi thum mîn phat i tih,” a ta.

³¹Ama ruok chun nasatakin, “I thinaa chun thi ve ding ni lang khawm, inphat naw tawp ka ti che,” a ta. Chuongchun, ama ang chun an ti ta seng a.

³²Chun, Gethsemane an ti hmun chu an tlung a; chuongchun, ama chun a închûktirhai kuomah, “Ka ṭawngṭai sûng po hitaka hin lo ṭhung ro,” a ta.

³³Chun, Peter hai, Jakob hai, Johan hai chu a ṭhuoi a; nasatakin a thlaphângin a lunginzing ta bêk bêk a.

³⁴Chuongchun, an kuomah, “Ka lungril a lungngai bêk bêk a, thipui khawp rau a nih, hitaka hin um unla inring zing ro,” a ta.

³⁵Chun, hmatieng chun a va fe met a, hnuoia chun a bawkkhup a, thaw thei ni sien chu chu hun chun ama khêl dingin a ṭawngṭai a.

³⁶“Abba, (Pa,) iengkim i thaw thei a, hi no hi ka kuoma inthawkin la sawn rawh; nisienlakhawm, keia thu ni lovin, nangma thu thu ni lem raw se,” a ta.

³⁷Chun, a hung a, annirawi chu inin a hung hmu a; chuongchun, Peter kuomah, “Simon, i in a ni maw? Dâr kâr khat khawm inring zingin i um thei naw maw?

³⁸Thlêmnaa in lût nawna dingin inring zingin ṭawngṭai ro. Thlarau chun chu a pei a, taksa ruok chu a hrât naw a nih,” a ta.

³⁹Chun, a va fe nâwk a, a thu hril ngai bawk chu hrilin a ṭawngṭai nâwk a.

⁴⁰Chun, a hung kîr nâwk chun annirawi chu inin a hung hmu nâwk a, an îmu a suok hle si a, ama dawn ngaina an hriet naw a.

⁴¹Chun, a hung a, a vawi thumnaa chun an kuomah, “Tuhin chu in unla châwl ta ro, a hun tâwk tah! a hun chu a tlung a ni ta hi! Ngai ta u, Mihriem Naupa hi mi suolhai kutah an inmantir ding a ni hi.

⁴²Tho unla fêng ei tiu, en ta u, a mîn mantirtu ding chu a hung hnai ta hi,” a ta.

⁴³Chun, a la hril lai zingin, Juda, sâwm le pahnihai laia mi pakhat chu a hung tlung nghâl el ta a, ama ruol chun thiempu lalhai le Dân inchûktirtuhai le upahai kuoma inthawk, mipui chu, kâwlhnâm le hembâwk dâm chawiin an hung tlung bawk a.

⁴⁴Chun, a înmantirtu ding chun, “Ka ifâwp chu ama nîng a ta, man unla feltakin ṭhuoi hmang el ro,” tîn a hmân inchikna dâm a lo hril vawng ta sa a na.

⁴⁵Chuongchun, a tlung phingleh ama a va pan nghâl ta a, “Rabbi,” tiin a fâwp ngâwi ngâwi a.

⁴⁶Chun, ama chu an chel a, an man ta a.

⁴⁷Chun, a kuoma ngirhai laia tuin amanih a kâwlhnâm a phawi a. Thiempu Laltak suokpa chu a sât a, a nakâwr a sât thlâkpêk a.

⁴⁸Chun, Isûn anni chu a biek a, an kuomah, “Kâwlhnâmhai, hembâwkhai chawiin suomhmang man ding ang elin, mi man dingin in hung a ni maw?

⁴⁹Pathien biekinah ni tin inchûktirin ka um hlak a, in mi man si naw a. Nisienlakhawm, Pathien Lekha Thu chu a hung tlung theina ding a ni hi,” a ta.

⁵⁰Chun, an rêngin ama chu an zâmsan a, an tlân hmang vawng ta a.

⁵¹Chun, tlangvâl tu amanih puon zai inhmi chaua inbelin, ama chu a zui a; chuongchun, ama chu an lo man a.

⁵²Nisienlakhawm, a puon zai inhmi chu a mâksan a, ruokin a tlân hmang ta a.

⁵³Chun, Isu chu Thiempu Laltak kuomah an ṭhuoi a; ama ruol chun thiempu lalhai, upahai, Dân inchûktirtuhai po po an hung khâwm a.

⁵⁴Chun, Peterin hlataka hin ama chu, Thiempu Laltak in inhuonna sûng tuol chen chun a zui a; chuongchun, manmihai lai chun mei lum awiin a ṭhung ve a.

⁵⁵Chuongchun, Isu chu an sukhlum theina dingin thiempu lalhai le rorêltuhai po po chun ama hêkna an zawng a; an hmu si naw a.

⁵⁶Mi tamtakin khêlin an hêk a; nisienlakhawm, an hêkna thuhai chu ân hmu thei si naw a.

⁵⁷Chun, tuhai amanih an ngîr a, khêlin an hêk a,

⁵⁸“Hi mipa hin, ‘Hi Pathien biekin kuta bâwl hi ṭhiek ka ta, ni thum sûng chauin biekin dang, kuta bâwl naw mi bâwl ka tih,’ a ti kan hriet,” an ta.

⁵⁹Chuong khawm chun an hêkna thu ân hmu thei chuong naw a.

⁶⁰Chun, Thiempu Laltak chu a ngîr suok a, Isu kuomah, “Iengkhawmin i dawn naw maw? Hienghaiin an hêkna che hi ieng tizie am a na?” tiin ân dawn a.

⁶¹Ama ruok chu a to zing a, iengkhawmin a dawn naw a. Thiempu Laltak chun a kuomah, “Krista, Inpâk tlâk Naupa chu i ni maw?” tiin ân dawn a.

⁶²Chun, Isûn, “Ni e, Mihriem Naupa hi thilthawtheina chang tienga ṭhunga, vân sûm laia hung la hmûng in tih,” a ta.

⁶³Chun, Thiempu laltak chun a silfênhai a keithlêr a, “Hretu dang ieng dingin am ngai tâng ei ta?

⁶⁴Pathien a hrilsietzie hlak chu in hriet ta a; iengtin am in ngai?” a ta. Chun, an rêngin ama chu thi tlâkah an ruot tâwl ta a.

⁶⁵Chuongchun, ṭhenkhat lem chun chil an sâk khum ṭan ta nghâl a, a hmai an tuom a, an vuok a, a kuomah,“Hril rawh!” an ti a. Chun, manmihai khawm chun chel pumin an ben sawk sawk a.

⁶⁶Chun, Peter chu hnuoi tienga in inhuonna sûng tuollaia a um laiin, Thiempu Laltak rawngbâwltu nunghâkhai laia pakhat a hung a.

⁶⁷Peter mei lum awi chu a hma a, a en zing a, “Nang khawm hi Isu Nazareth mi kuoma um kha i ni hi,” a ta.

⁶⁸Ama ruok chun, “I thu hril chu ka hriet naw tawp el, a ngaina hrim hrim khawm ka hriet naw tawp el,” tîn ân pha a. Chun, tuolkawt bula chun a va suok a, chuongchun, âr a khuong ta a.

⁶⁹Chun, nunghâk chun a hma a, a kâwla ngîrhai kuoma chun, “Hi mipa hi anni laia mi a nih,” a ti nâwk a. Nisienlakhawm, ân pha nâwk a.

⁷⁰Chun, a nakie deu chun a kâwla ngîrhai chun Peter kuomah, “Anni laia mi i ni ngei hi maw, Galili rama mi i ni si a,” an ti a.

⁷¹Ama ruok chun, “Chu mihriem in hril chu ka hriet naw tawp,” tiin ṭawngsie inphurin ân khâm a.

⁷²Chun, âr khuong vawi hnina chu a khuong nghâl ta a; chun, Peter chun Isûn a kuoma, “Âr vawi hni a khuong hmain nangin vawi thum mîn phat i tih, ” a ti thu kha a hung hriet suok ta a. Chuongchun, chu thu chu a ngaituoin a ṭap ta a.