Read Hmar MARKA 15 Bible Online

MARKA 15 - Hmar bible

MARKA 15

¹Chun, zîngkâr a hung ni phingleh thiempuhai chu upahai le Dân inchûktirtuhai le rorêltuhai po po leh an inrâwn a, Isu chu an phier a, an ṭhuoi a, Pilat kuomah an pêk nghâl ta a.

²Chun, Pilat chun a kuomah, “Judahai lal i ni am a nih?” tiin ân dawn a; ama chun, “I hril ang chun ka nih,” tiin a dawn a.

³Chun, thiempuhai chun kawng tamtakin an hêk a.

⁴Chuongchun, Pilatin ân dawn nâwk a, a kuomah, “Iengkhawmin i dawn naw maw? Ngai ta, an hêkna zozai che hi,” a ta.

⁵Isu ruok chun iengkhawmin a dawn ta naw a: chuleichun, Pilat chun mak a ti hle a.

⁶Chun, Pilatin Ruoiṭhe ni chun mi intâng pakhat an ngên taphawt chu ân suopêk hlak a.

⁷Chun, mi pakhat Barabba an ti chu, helhai laia phiera intâng ve zing a na, chuonghai chun an helnaa chun tuol an that a nih.

⁸Chun, mipuihai chu an hang fe a, an ta dinga a thawpêk hlak anga thaw dingin an ngên ta a.

⁹Chuongchun, Pilatin an kuomah, “Judahai lal hi insuopêk lang cheu in nuom am?” a ta.

¹⁰(Thiempu lalhaiin an îtsîk leiin an hung ṭhuoi a ni ti a hriet si a).

¹¹Nisienlakhawm, Thiempu lalhai chun mipuihai chu Barabba chu insuopêk lem dinga hni dingin an infui a.

¹²Chun, Pilat chun an kuomah, “Anleh Judahai lal in ti hi iengtin am thaw tâng ka ta?” tiin a dawn nâwk a.

¹³Anni chun, “Krawsah hemde rawh,” tiin an khêk nâwk a.

¹⁴Pilat chun an kuomah, “Iengdingin am ie? Ieng am a suksuol leh?” a ta. Nisienlakhawm, anni chu, “Krawsah hemde rawh,” tiin an khêk zuol sau a!

¹⁵Chuongchun, Pilatin mipuihai suklungawi a nuom a, Barabba chu ân suopêk ta a. Chun, Isu chu a vuok zoin krawsa hemde dingin a pêk ta a.

¹⁶Chun, sipaihai chun in inhuonna sûng tuollai Praitorion an tia chun ama chu an ṭhuoi lût a, an pâwla mi po po an ko khâwm a.

¹⁷Chuongchun, puon sen duk an insiltir a, hlingin lukhum an phier a, an inkhumtir a.

¹⁸Chuongchun, “Chibai, Judahai Lal,” tiin chibai an bûk a.

¹⁹Chun, a lua chun luongin an vuok a, chil an sâk khum a, dingṭhaṭhuonin chibai an bûk a.

²⁰Chun, nuiza siemnaa an hmang zo chun, puon sen duk chu an hlîp a, ama puon an insiltir nâwk a. Krawsah hemde dingin an ṭhuoi suok ta a.

²¹Chun, mi invâk mei mei pakhat, rama inthawka hung, Simon Kurinia um, Alexander le Rufa pa chu a kraws puttu dingin an man a.

²²Chun, Isu chu Golgotha hmunah an ṭhuoi a, (chu chu “Luru hmun” tina a nih).

²³Chun, uoin murra le pawl an pêk a, nisienlakhawm, a lâk nuom naw a.

²⁴Chun, krawsah an hemde a, an chang ding hrietna dingin, ṭhum vâwrin a silfênhai chu an insem a.

²⁵Chun, Isu an hemde hun chu vairik lai a nih.

²⁶Chun, a hêkna lekha a chungah an ziek a, “JUDAHAI LAL,” tiin.

²⁷Chun, ama ruol chun suomhmang pahni an hemde ve a, a changtieng pakhat, a vawitieng pakhat.

²⁸[Pathien Lekhathu, “Bawsetuhai leh tiemsain a um tah” ti kha a hung tlung ta a.][22]

²⁹Chun, mi fe vêl po chun an lu thinin, “A hei! nang Pathien biekin ṭhiek a, ni thum kâra bâwl nâwktu,

³⁰insukdam la kraws lêra kha hung ṭum ta la,” tiin an ti el a.

³¹Chuong ang bawkin thiempu lalhai chun, Dân inchûktirtuhai leh, anni lai chun ti elin, “Mi dang hman a sukdam hlak a, ama ân sukdam thei si naw a.

³²Ei hma a, ei awi theina dingin Krista, Israelhai lal chu, tuhin kraws lêra inthawkin hung ṭum ta sienla,” an ta. Chun, ama ruola an hemde vehai khawm chun ama chu an hal a.

³³Chun, nisa inding huna chun, zânbu suong pha chenin khawvêl a hung inthim ta vawng a.

³⁴Chun, zânbu suong phâ chun Isu chu râwl inringtakin, “Eloi, Eloi, lama sabakthani?” tiin a khêk suok a. (Chu chu “Ka Pathien, ka Pathien, iengdinga i mi mâksan?” tina a nih).

³⁵Chun, a kuoma ngîr ṭhenkhat chun chu chu an hrietin, “Ngai ta u, Elija a ko a nih,” an ta.

³⁶Chun, mi pakhat a tlân a, sponj uoin thûra inchie sipin, hmawl lêrah a târ a, a hang indâwntir a. “Hun raw se, ama la thla dingin Elija a hung am en ei tiu,” an ta.

³⁷Chun, Isu chu râwl inringtakin a khêk a, a thlarau ân thla ta a.

³⁸Chun, Pathien biekina puonzâr chu a chungtienga inthawkin a mawng tlung rakin a lo inthlêr suo ta a.

³⁹Chun, a hmaa sipai za hotu ngîr chun, a thlarau chuonga ân thla a hmu chun, “Hi mipa hi Pathien Naupa a ni ngei el,” a ta.

⁴⁰Chun, nuhmeihai khawm hlataka thlîrin an um a; chuhai lai chun, Mari Magdalin hai, Mari, Jakob chîn le Jose nu hai dâm, le Salomi hai an ṭhang a, (chuonghai chu Galili rama a um laia ama zuia a rawng bâwlpêk hlak hai chu an nih);

⁴¹nuhmei dang tamtak Jerusalema ama ruola hang fe vehai chu an ṭhang bawk a.

⁴²Chun, zântieng a hung ni chun Inringlâwk ni a ni leiin (chu chu Châwlni hmaa ni hi a nih),

⁴³Josef Arimathaia mi, rorêltu inzaum, Pathien ram beisei ve mi bawk, a hung a, huoitakin Pilat kuomah a lût a, Isu ruong chu a hni ta a.

⁴⁴Chuongchun, Pilatin a thi vak chu mak a ti hle a; sipai za hotu chu a ko a, a thina a sâwt ta amanih ti ân dawn a.

⁴⁵Chun, sipai za hotu baua thu a hriet phing chun a ruong chu Josef kuomah a pêk a.

⁴⁶Chun, ama chun puon innêm ân châwk a, ama chu a lâk thlâk a, puon innêm chun a tuom a, thlân, lung inkerkuoah ân zâl a, thlân kawtkhâr chu lungin ân del a.

⁴⁷Chun, Mari Magdalin le Josef nu Mari chun an inzâlna chu an hmu zing a.