Read Hmar MARKA 16 Bible Online

MARKA 16 - Hmar bible

MARKA 16

¹Chun, Châwlni a hung bo chun Mari Magdalin hai, Mari Jakob nu hai, Salomi hai chun ama nâl dinga an va fe theina ding chun thil riminhnik an inchâwk a.

²Chuongchun, ni saria ni hmasataka, zîngkâr nisa suok hnungin, thlân chu an va tlung a.

³Chun, “Thlân kawta lung chu tuin am mîn hlum hmangpêk a ta?” an inti lai zingin,

⁴an hang ngha a, lung chu inhlum hmang sain an hang hmu ta a, a lien hle si a.

⁵Chun, thlân sûngah an lût a, tlangvâl pakhat puon vâr silin changtieng panga ṭhung an hmu a; an lunginzîng ta a.

⁶Chuongchun, ama chun an kuomah, “Lunginzing naw ro, Isu Nazareth mi, an hemde kha in zawng a ni âwm a, a thonâwk ta a, hi hin a um ta nawh; en ta u, an inzâlna hi.

⁷Nisienlakhawm, fe unla a închûktirhai le Peter kuoma chun, ‘Galili ramah in hmaa a fe ding a na; in kuoma a hril ang ngei khan chu chun hmûng in tih,’ tiin hril ro,” a ta.

⁸Chuongchun, an inthin a, an lunginzîng hle lai chun, an suok a, thlâna inthawk chun an tlân ta vang vang a, an ṭi luotin tu kuoma khawm iengkhawm an hril naw a.

⁹[Chun, ni saria ni hmasatak, zîngkâra a thonâwk chun, Mari Magdalin, a sûnga inthawka khawhri pasari a hnawt suokpêk kuoma khan ân lâr hmasatak a.

¹⁰Chun, ama chu Isu umpui hlakhai kuomah a va fe a, mithi ngaia an ṭaplai chu a hril ta a.

¹¹Nisienlakhawm, anni chun, a hring nâwk a, hmu khawm a hmu ti chu an hriet dea chu an awi si naw a.

¹²Chun, chu hnunga chun anni laia pahni ram tieng pana an fe laiin hmêl danglam putin an kuomah ân lâr nâwk a.

¹³Chun, anni chun inchûktir danghai kuomah an va hril a, anni thu khawm chu an awi chuong naw a.

¹⁴Chun, chu hnung nâwka chun buthlêng an awt laiin sâwm le pakhat hai kuom ngeiah ân lâr nâwk a, a thonâwk hnunga a hmutuhai thu chu an awi naw leiin an awi nawna le an lungril ngar kawnga chun a kâwk tâwl a.

¹⁵Chun, an kuomah, “Khawvêl po poah fe unla, thilsiemhai po po kuomah Chanchin Ṭha hi hril ro.

¹⁶Awia, baptisma chang chu sandamin um an tih; a awi naw ruok chu thiemnaw changin um an tih.

¹⁷Chun, hieng inchiknahai hin a awituhai chu zui pei a tih: Ka hmingin khawhrihai hnawt dawk an ta, ṭawng tharhaiin ṭawng an tih.

¹⁸Rûlhai kut chungah dawm an ta, thina tûr iengang khawm dâwn hai sienla iengkhawm ti naw ni hai; damnawhai chungah an kut innghat an ta, dam pei an tih,” a ta.

¹⁹Chuongchun, Lal Isu chu an kuoma thu a hril zo chun vâna zuk ṭhuoiin a um ta a, Pathien changtieng a hang ṭhung ta a.

²⁰Chuongchun, anni chu an fe suok a, ram tinah thu an hril ta a; Lalpain anni ân thlawppui a, a zuitu inchiknahai chun an thu chu a sukdet pei a, Amen][23].