Read Hmar MARKA 2 Bible Online

MARKA 2 - Hmar bible

MARKA 2

¹Chun, ni ieng zât amani hnunga Kapernaum a hung lût nâwkin, inah ama a um ti thu ân thang ta a.

²Chuongchun, kawt bula khawm umna um naw khawp rakin, mi tamtak an hung khâwm a; an kuoma chun thu a hril ta a.

³Chun, mi zeng pakhat, mi palia zâwn a kuomah an hung ṭhuoi a.

⁴Chun, mipui leia Isu kâwl hnai an tlung thei naw leiin, a umna in chung chu an ṭhiek ta a; chuonga an ṭhiek zo phing chun mi zeng chu a puonpha pum chun an zuk thlâk ta a.

⁵Chuongchun, Isûn an ringzie chu a lo hmu a, mi zeng kuoma chun, “Naupa, i suolhai ngaidam a ni tah,” a ta.

⁶Chun, Dân inchûktirtu ṭhenkhat chutaka chun an ṭhung a, an lungril chun hieng hin an ngaituo a,

⁷“Hi mipa hin ieng dinga hieng thu hi hril am a ni leh? Pathien a hrilsiet a ni hi. Mi pakhat, Pathien chau naw chun tuin am suolhai a ngaidam thei a?” tiin.

⁸Chun, chuong thu chu an ngaituo a ni ti Isûn a lungrilin a hriet nghâl ta a, an kuomah, “Chuong thu chu iengdinga in lungrila in ngaituo am a na?

⁹Zeng kuoma chun, ‘I suol ngaidam a ni tah,’ ti le, ‘I puonpha la la, kein fe ta rawh,’ ti hi a ieng am hril a awl lem a?

¹⁰Iengkhawm ni sienla, khawvêla hin, Mihriem Naupain suol ngaidam theina a nei ti in hrietna dingin,” (Zeng kuoma chun)

¹¹“Tho la, i puonpha la la, i inah fe ta rawh, ka ti che,” a ta.

¹²Chuongchun, ama chu a tho a, a puonpha chu a lâk a, an rênga mithmu ngei chun a suok ta a; chuongchun, an rêngin mak an ti hle a, “Hieng ang hrim hrim hi ei la hmu ngai nawh,” tîn Pathien an inpâk ta a.

¹³Chun, a suok nâwk a, dîl panga chun a fe ta a; chun mipui po po chu a kuomah an va fe a, a lo inchûktir ta a.

¹⁴Chun, a fe malamin, Levi, Alphai naupa chu siechawina hmuna ṭhung a hmu a, a kuomah, “Mi hung zui rawh,” a ta. Ama chu a tho a, a zui ta a.

¹⁵Chun, Isu chun Levi inah thlaithlêng a awt a; siedâwltuhai le mi suol tamtakin a închûktirhai chu an awtpui tâwl a, tamtak el an na, ama chu an zui ve bawk hlak.

¹⁶Chun, Pharisaihai laia Dân inchûktirtuhaiin Isûn mi suol le siedâwltuhai a awtpui an hmuin, a închûktirhai kuoma chun, “Iengtiziea siedâwltuhai lai a fâkin a dâwn am a na?” an ta.

¹⁷Chun, Isûn chu chu a lo hriet a, “Mi hrâthai chun dâktawr an ngai naw a, mi hrivawisiehai lemin an ngai a nih; mi feltakhai indawn ding a hung ka ni naw a, mi suolhai lem indawn ding a hung ka nih,” a ta.

¹⁸Chun, Pharisai le Johan inchûktirhai chun bu an nghei a; chun, “Ieng dinga Johan inchûktirhai le Pharisai inchûktir haiin bu an nghei hlak a, i închûktirhai hlakin an nghei ve ngai naw?” an ta.

¹⁹Isûn an kuomah, “Mo ṭhuoituhai kuoma a pasal ding chu a um sûng po chu mo ṭhuoituhai chun bu nghei thei naw ni hai,

²⁰nisienlakhawm, a pasal ding chu an kuoma inthawka ṭhuoi hmang ni la hung tlung a ta, chu nia ruok chun la nghei an tih.

²¹Tukhawmin puon hlui puon thar hlekin an phâwk ngai nawh; phâwk ang sienla, a phâwkna chun keiek lem a tih, a thar chun a hlui chu keiek a ta, inek nasa det lem a tih.

²²Chun, tukhawmin uoin thar savun uoin peng hluiahai an thun ngai nawh; thun ang sienla, uoin chun savun peng chu mawrdar a ta, uoin le savun peng chu bo hmang ve vêng a tih, uoin thar chu savun uoin peng tharahai an thun lem hlak a nih,” a ta.

²³Chun, Isu chu châwlniin bu bilahai a fe thleng a, chuongchun, a închûktirhai chun an fe malamin buvûihai chu an thliek ta a.

²⁴Chun, Pharisaihai chun a kuomah, “En ta, iengdinga châwlnia thaw thieng naw chu an thaw am a na?” an ta.

²⁵Chun, ama chun an kuomah, “David le a ruolhai an tlâksama, an phîng a ṭâm laia an thil thaw kha in tiem naw am a nih?

²⁶Khânga Abiathar Thiempu Laltak a ni laia Pathien inah a lût a, Thiempuhai chau naw chun fâk thieng lo bei chu a fâk a, a ruolhai khawm a pêk ve thu kha?” a ta.

²⁷Chun, ama bâwkin an kuoma chun, “Châwlni hi mihriem ta dinga siem a na, mihriem hi Châwlni ta dinga siem a ni nawh;

²⁸chuongchun, Mihriem Naupa hi Châwlni chunga chen khawm Lal a nih,” a ta.