Read Hmar MARKA 3 Bible Online

MARKA 3 - Hmar bible

MARKA 3

¹Chun, inkhâwmna ina chun a lût nâwk a, chutaka chun mi pakhat kutzeng hi a lo um a.

²Chun, ama an hêk theina dingin Châwlnin a sukdam ding le sukdam naw ding an enthlit a.

³Ama chun kutzeng kuoma chun, “Hung ngîr dawk rawh,” a ta.

⁴Chun, an kuoma chun, “Châwlni hin sukṭhat am a thieng, suksiet? sandam am a thieng sukhlum?” tiin ân dawn a. Nisienlakhawm, an to zing a.

⁵Chun, an lungril ngar zie chu pawitipêk bêk bêkin, lungsen puma anni a en vêl hnungin, chu mipa kuoma chun, “I kut phar rawh,” a ta. Chun, a hang phar dawk a, a kut chu a dam ta a.

⁶Chun, Pharisaihai chu an suok a, ama an sukhlum thei dân ding ngaituoin Herod pâwla mihai le chun an inrâwn nghâl ta a.

⁷Chun, Isu chu a inchûktirhai le chun dîl tieng an fe hmang ta a, chuongchun, Galili rama inthawkin mipui nasatakin an zui ta a.

⁸Chun, a thil thaw ropuizie chu an hrietin, Judai rama inthawk dâmin, Jerusalema inthawk dâmin, Idumai rama inthawk dâmin, Tura le Sidon khuo vêla inthawk dâmin mipui nasatak a kuomah an hung ve a.

⁹Chun, mipui lei chun a ta dinga lawnglêng pakhat lo siemrêlpêk dingin a închûktirhai a hril a. “Chuong naw chun mi hneng hut hut rawi an tih,” a ta.

¹⁰Mi tamtak a sukdam nghâl ta a; chuongchun, natna nei po po chun ama an them theina dingin an bûm tul tul a.

¹¹Khawhri inthieng nawhai khawmin ama an hmu po leh a hmaa bawkkhupin, “Nang Pathien Naupa chu i nih,” tiin an khêk hlak a.

¹²Chun, ama chun a chanchin chu puong lo dingin an kuomah a ti tlat pei a.

¹³Chun, tlânga chun a hang fe a, amain a dit pohai chu a ko a, chuongchun, anni chu a kuomah an hang fe a.

¹⁴Chun, sâwm le pahni a ruot a[1], a kuoma an um theina dingin le thu hril dinga a tir dawk theina ding le,

¹⁵khawhrihai hnawt dawkna thu nei dinga a tir dawk theina dingin.

¹⁶Chuonghai chu, Simon, Peter a înbûk hai;

¹⁷Zebedai naupa Jakob le Jakob unaupa Johan hai dâm, (chuonghai chu “Boanerges” ân bûk a, chu chu “Vâninrûm Nauhai,” tina a nih.)

¹⁸Andri hai, Philip hai, Bartholomai hai, Matthai hai, Thoma hai, Alphai naupa Jakob hai, Thaddai hai, Kanaana Simon hai;

¹⁹a înmantirtu Juda Iskariot hai dâm kha an nih.

²⁰Chun, inah a va lût a. Chun, mipui chu an hung khâwm nâwk a, chuongchun, bei takngiel khawm an fâk thei ta naw a.

²¹Chun, a sûnghai chun chu chu an hriet a, “ân vêt a ni chu tie,” tiin, ama man tumin an inthawk a.

²²Chun, Dân Inchûktirtuhai Jerusalema inthawka hung thlahai chun, “Beelzebub[2] a zâwl a ni hi,” an ti a. “Khawhri lal lei annâwm khawhrihai a hnawt dawk hlak hi,” an ti bawk a.

²³Chun, Isu chun Dân inchûktirtuhai chu a ko a, tekhithuin an kuomah, “Setanin Setan bawk iengtin am hnawt dawk thei a ta?

²⁴Ram khawm ama le ama ân do chun, chu ram chu ngîr suok thei naw ni.

²⁵Sûng khat khawm anni le anni an indo chun, chuhai sûng chu ngîr suok thei naw ni hai.

²⁶Setan khawm ama le ama indo a, ân khing si chun, ngîr suok thei naw ni a, bohmang el lem a tih.

²⁷Tukhawm mi hrât ina lûtin a sum chu a lâkpêk thei ngai nawh, mi hrât chu an phier hmasa zet naw chun; chu hnunga ruok chun a in chu inrampêk el an tih.

²⁸Titakzetin ka hril cheu hi, mihriem nauhai hi an suolna po poa le, Pathien an hrilsietna kawng tinrênga khawm chun ngaidam nîng an tih;

²⁹tukhawm Thlarau Inthieng meu hrilsetu ruok chun ienglai khawmin ngaidamna hmu naw ni, chatuona thiemnaw changna suol maw chu phur lem a tih,” a ti a.

³⁰(“Khawhri inthieng naw a zâwl a nih,” an ti lei khan chu chu a hril a nih.)

³¹Chun, a nu le a unauhai chu an hung a, tuolah an ngîr a, ama ko dingin mi an tir a.

³²Chun, a sîr vêl lai chun mipui an lo ṭhung tâwl a; chun, a kuoma chun, “Ngai ta, tuola sawn i nu le i unauhaiin an zawng che,” an ta.

³³Chun, ama chun an kuomah, “Ka nu le ka unauhai chu tuhai am an na?” tiin an dawn a.

³⁴Chun, a kâwla ṭhunghai chu a hei en vêl a, “En ta u, ka nu le ka unauhai hi!

³⁵Tukhawm Pathien dit zâwng thawtu phawt chu, chuonghai ngei chu ka unauhai, ka farnuhai, ka nuhai an nih annâwm,” a ta.