Read Hmar MARKA 4 Bible Online

MARKA 4 - Hmar bible

MARKA 4

¹Chun, dîl panga chun ân chûktir nâwk ta a. Chun, mipui nasatak el a kuomah an hung inkhâwm a; chuongchun, dîla chun lawngah a chuong a, a ṭhung a; mipuihai po po chu dîl panga khawmuola chun an um a.

²Chun, tekhithuin thu tamtak ân chûktir a, ân chûktirnaa chun,

³“Ngai unla en ta u, bu chi thetu bu chi thein a fe a,

⁴chun, a the laiin a ṭhen lampui sîrah a tla a, vatehaiin an hung tlân zo ta a.

⁵Chun, a ṭhen chu pielthlêng chung, hnuoi inphânna lai a tla a, hnuoi a sa naw leiin a mâwng nghâl ta a,

⁶nisienlakhawm, nisa a hung insâng pha em vuoiin a um a, zung a nei naw leiin a rawp ta el a.

⁷Chun, a ṭhen chu hlohlingnei lai a tla a, hlo chu a hung mâwng sâng a, a dîp hmang ta a, ra hrim hrim a ra ta naw a.

⁸Chun, a ṭhen hnuoiṭhaah a tla a, a mâwng a, ân ṭhang lien a, a ra ta a; sâwmthum dâm, sâwmruk dâm, za dâmin a pung tâwl ta a,” a ta.

⁹Chun, ama bawkin, “Tukhawm hrietna dinga na nei chun hre raw se,” a ta.

¹⁰Chun, fienriela a um laiin a kuoma sâwm le pahnihai le um mi danghai chun tekhithuhai chu an indawn fel a.

¹¹Chun, ama chun an kuomah, “Pathien ram thurûk chu nangni hai hriet chu phal a na, puotienga mihai ta ding ruok chun iengkim tekhithua hril a nih;

¹²chuongchun, ‘Hmu chu an hmu thei de a, hriet ruok chu an hriet thei nawna ding le na ruok chun an hriet thei de a, a ngaina ruok chu an hriet thei nawna dingin, chuong naw chun ngha kîr nawk an ta, ngaidam hung ni hlau rawi an tih,’ ” a ta.

¹³Chun, ama bawkin, an kuoma chun, “Hi tekhithu hi in hriet thei naw maw? Chuongchu a ni chun iengtin am tekhithu danghai po po chu hre hrim in ta?

¹⁴Bu chi thetu chun thu chu a the a nih.

¹⁵Chun, lampui sîra thu thênahai chu hieng hi an nih; thu an hriet phingleh Setan chun an lungrila thu thea um chu a lâkpêk nghâl hlak.

¹⁶Chun, chuong ang bawk chun pielthlêng chunga the chu hieng hi an nih: thu chu an hriet phinga lâwmtaka pawm nghâl el hlakhai hi;

¹⁷nisienlakhawm, annia chun zung hrim an nei naw a, sâwt nâwte chau an um a, thu leia rinumna amanih, suknawmnatna amanih a hung um phing leh an tlu nghâl el hlak a nih.

¹⁸Chun, mi danghai chu hlohlingnei laia the chu an nih, chuonghai chun thu chu an hriet ta a;

¹⁹nisienlakhawm, khawvêl lungkhamnahai, hausakna hlêmnahai, thil dang châknahai chu a hung lût a, thu chu a dîp a, ra lovin a lo um hlak.

²⁰Chun, hnuoi ṭhaa thehai chu hieng hi an nih: thu chu hrea, pawm a, a lêt sâwmthum dâm, a lêt sâwmruk dâm, a lêt za dâma rahai hi,” a ta.

²¹Chun, ama bawkin an kuomah, “Khâwnvar chu a sienaa sie lova leikhâwr hnuoia manih, khum hnuoia manih sie dingin an hung lâk hlak am a nih?

²²Inphuong naw dinga ip iengkhawm a um nghâl naw a, inlang lo dinga thuphmang iengkhawm a um bawk nawh.

²³Tukhawmin hrietna dinga na nei chun hre raw se,” a ta.

²⁴Chun, ama bawkin an kuoma chun, “In thu ngai chu nguntakin ngaituo ro, in inkhîna ngai bawkin inkhi pêk an ti cheu a, pe tam lem hman hman an ti cheu.

²⁵Tukhawm a nei chu pe sâng an ta, tukhawm a nei naw chu a nei sun khawm lâkpêk an tih,” a ta.

²⁶Chun, ama bawkin, “Pathien ram chu hieng ang hi a nih; mîn hnuoia hin chi the sienla, zâna inin sûnah tho hlak sienla;

²⁷a umzie a hriet lovin hung mâwngin hung inṭhang sienla, chuong ang chu a nih.

²⁸Hnuoi hin amain ra a hung insuo hlak, a phut chun a kûng, chu zoa chun a ra, chun chu zo nâwka chun a vûia bu mal kim chu.

²⁹Chun, ra chu a hung hmin pha, bu lâk a lo hun ta leiin kâwite a kei suok nghâl hlak a nih,” a ta.

³⁰Chun, ama bawkin, “Pathien ram chu ieng lêm hrilkhîng ei tih aw? annawleh, ieng tekhithu lêm hrilkhîng ei ta?

³¹Anṭam chi mal khat hnuoia an thein, hnuoi chunga thlai chi po po nêkin chîntak sienla khawm;

³²the zo hnung ruok chun a hung mâwng a, thlâi po po nêkin a hung lien lem ta a, zâr lientak tak dâm a hung nei a, chuongchun, chunglêng vatehai chu a buka chun an riek thei hlak; chuong ang chu a nih,” a ta.

³³Chuong ang tekhithu tamtakin, an ihriet thei tâwk tâwkin, thu chu an kuomah a hril hlak.

³⁴Tekhithu naw chun an kuomah thu a hril ngai nawh; ama inchûktirhai kuoma ruok chun fienrielah iengkim a hrilfie hlak a.

³⁵Chun, chu ni ma, zântieng chun ama chun an kuomah, “Râlkhing tieng sawn kai ei tiu,” a ta.

³⁶Chuongchun, mipui chu mâksanin, ama chu a um ngai chun lawnga chun an fepui nghâl ta a. Lawng dang dâm khawm a kuomah a um a.

³⁷Chun, thlipui nasatak a hung hrâng a, tuifâwnhai dâm chu lawnga chun a hung insawk lût hlawp hlawp a; chuongchun, lawng chu a hung sip vâng vâng el ta a.

³⁸Chun, ama chu lukham chu khamin lawng mei tieng chun a lo in a; chun, an keitho a, a kuoma chun, “Inchûktirtu, kan bohmang hi pawi i ti nâwm a nih?” an ta.

³⁹Chun, ama chu a hung har a, thli chu a hal a, dîl kuoma khawm chun, “To la, um ṭawk ṭawk rawh,” a ta. Chun, thli chu a ma a, a hung re ta ṭhup el a.

⁴⁰Chun, ama chun an kuomah, “Iengdinga chuong bêk bêka ṭi am in na? Ringna hrim in la nei naw a ni maw?” a ta.

⁴¹Chuongchun, an ṭi ta bêk bêk a, “Hi mipa hi tu am a ni lie? thli le dîl chen khawmin a thu an awi hi,” an inti tâwl a.