Read Hmar MARKA 5 Bible Online

MARKA 5 - Hmar bible

MARKA 5

¹Chun, dîl râl, Gerasin[3] mihai ram chu an hung tlung a.

²Chun, lawnga inthawka a suok chau chun mi pakhat, khawhri inthieng naw iman thlâna inthawka hung suok chun ân tuokpui ta a;

³chu mipa chun thlâna dâm chun umna a nei hlak a, tukhawmin khaidiet khawmin an khit thei ta naw a;

⁴kawlhai le khaidiethai khawmin an khit rawp ta hlak a, anachu khaidiethai dâm chu a keitan a, kawlhai dâm khawm chu a sukbawng pei hlak a; tukhawmin an sukdawl zo naw a.

⁵A sûn a zânin thlânahai le tlângahai chun a khêk hlak a, lung dâm khawmin ân ât rawp hlak a.

⁶Chun, hlataka inthawkin Isu chu a hei hmu phingleh a tlân a, chibai a va bûk a.

⁷Chun, râwl inringtaka khêkin, “Isu, Pathien Chunghnungtak Naupa, kei le nang ieng am ei inzâwlna a um a? Mi sawisa naw hrâm dingin Pathien hmingin ka ngên ṭal che a nih,” a ta.

⁸(Isu chun a kuomah, “Nang khawhri inthieng naw, mihriem sûnga hi suok rawh,” a lo ti nghâl ta a.)

⁹Chun, Isu[4] chun, “I hming ieng am a na?” tîn ân dawn a. Ama chun a kuomah, “Ka hming chu Legion[5] a nih, tamtak kan ni si a,” a ta.

¹⁰Chun, chu rama inthawk chun anni tir hmang lo dingin Isu kuomah a ngên ṭal ta a.

¹¹Chun, chutaka tlâng panga chun vawk ruol tamtak an tla a.

¹²Chun, khawhri inthieng nawhai chun, “Vawkhai kuoma sawn mîn fêtir rawh; an sûnga kan lût theina dingin,” tiin a kuomah an ngên a.

¹³Ama chun a phal pêk a. Chuongchun, khawhri inthieng nawhai chu an suok a, vawkhai sûnga chun an lût a, chuongchun, vawk ruol chu (sâng hni lai an na) rawlah an tlân thla a, dîlah an tlân lût a; chuongchun, dîla chun tui an inhâk hlum ta a.

¹⁴Chun, a vâituhai chu an tlân a, khuo le lohaia dâm chun an hril a. Chun, “Ieng am a ni ta leh?” tia en dingin an hung khâwm tâwl a.

¹⁵Chun, Isu kuom an hung tlung a, khawhri iman, Legion iman kha, puon sila, lungril ngai puta ṭhung an hmu a, chuongchun, an ṭi ta a.

¹⁶Chun, a hretuhai chun khawhri imanpa chunga thil hung tlung zie le, vawk chanchinhai chu chuonghai kuoma chun an lo hril a.

¹⁷Chun, chuonghai chun Isu chu an rama inthawka suok dingin an ngên ta a.

¹⁸Chun, lawnga a chuong ding lai takin, khawhri imanpa khan Isu kuoma um zing a ngên a.

¹⁹Nisienlakhawm, Isûn a phal naw a, a kuomah, “I ina i ruolhai kuomah fe la, Lalpain thil a thawpêk che hi a ropuizie le a lunginsietzie che hi va hril rawh,” a ti ta lem a.

²⁰Chuongchun, a fe a, Dekapoli khuohaia chun Isûn a ta dinga thil a thawpêkhai ropuizie chu a khêk vêlpui ta a; chun, mi po po chun mak an ti hle a.

²¹Chun, Isu chu lawnga râl khing tieng a hung kai nâwk chun, mipui nasatak a kuomah an hung khâwm a, ama chu dîl panga chun a um a.

²²Chun, inkhâwmna hotuhai laia mi pakhat, a hming Jaira chu a hung a, Isu a hmu phingleh a ke bulah a bawkkhup a,

²³“Ka naunu naupangte a thi vâng vâng a, a hung hara, a hung dam theina dingin, hunga a chunga i kut innghat dingin ka ngên che,” tiin a ngên ṭal a.

²⁴Chuongchun, Isu chu ama le chun an va fe a, chun, mipui nasatakin an zui a, an hneng sup sup a.

²⁵Chun, nuhmei pakhat kum sâwmpahni thipûtin a damnaw a,

²⁶dâktawr tamtak kuomah nasatakin a tuor ta a, a nei po po khawm chu a sêng zo ta a, ṭhathnem nêkin a zuol deu deu lem a.

²⁷Chu minu chun Isu chanchin a lo hriet a, a hnungah mipui lai chun a hung a, a puon chu a them a,

²⁸“A puon chau khawm them lang sukdamin um el ka tih,” a ti lungril a nih.

²⁹Chuongchun, kârlovin a thipût chu a hung bo nghâl ta a, a natna chu sukdam a ni tah ti a taksa chun ân hriet ta a.

³⁰Chun, Isu chun a sûnga thilthawtheina chu a suok ti a lo hriet a, mipui lai chun a ngha vêl nghâl ta a, “Tu am a na ka puon them kha?” a ta.

³¹Chun, a inchûktirhai chun a kuomah, “Mipuiin an hneng sup sup che hi i hmu nghâl a, ‘Tu am a na a mi them,?’ iengtiziea ti am i na?” an ta.

³²Chun, ama chun a themtu chu hmu tumin a en vêl a.

³³Chuongchun, nuhmei chun a chunga Isu thil thawzie chu hrein ṭi le inthin pumin a hung a, a hmaah a bawkkhup a, a kuomah thu indiktakin a hril vawng ta a.

³⁴Chun, ama chun a kuomah, “Ka naunu, i ringna hi i dampui a nih, lungmuongtakin fe la, i natna chu lo dam sawng ta raw se,” a ta.

³⁵A la ṭawng zing laiin inkhâwmna in hotu ina inthawkin mi an hung a, “I naunu a thi tah, iengdingin am inchûktirtu hi la suksâwl rawp i ta?” an ta.

³⁶Isu ruok chun, an thu hril chu ngaisak lovin inkhâwmna in hotu kuoma chun, “Ṭi naw, awi el rawh,” a ta.

³⁷Chun, Peter hai, Jakob hai, Jakob unau Johan hai chau naw chu tukhawm ama zui ve a phal ta naw a.

³⁸Chun, inkhâwmna in hotu in chu an va tlung a, Isu chun an lo buoi mur mur le, an lo ṭap veng vung a, an khêk tuor tuor chu a va hmu a.

³⁹Chun, a va lût chun, an kuomah, “Iengdinga inri veng vunga ṭap am in na? naupang chu a thi nawh, a in lem a nih,” a ta.

⁴⁰Anni hlak chun an nuisan el a; ama hlak chun an rêngin a hnawt dawk a, naupang nu le pa le a kuoma umhai chu a ṭhuoi a, naupang umnaa chun a va lût a.

⁴¹Chun, naupang kut chu a chel a, a kuoma chun,“Talitha kumi,” a ta. Chu chu, “Bawinu tho rawh ka ti che,” tina a nih.

⁴²Chun, naupangnu chu a hung tho a, a fe thei nghâl ta a; ama chu kum sâwmpahni mi a ni hrim ta a. Chun, anni chun namênin mak an ti naw a.

⁴³Chun, amân an kuomah, “Hi hi tukhawmin hre naw raw hai se,” a ti tlat a, chun fâk ding pêk ding thu a pêk ta a.