Read Hmar MARKA 6 Bible Online

MARKA 6 - Hmar bible

MARKA 6

¹Chutaka inthaw chun a suok a, a umna khuo tieng chu a tlung nâwk ta a; inchûktirhai chun an zui pei a.

²Chun, Châwlni a hung na, inkhâwmna inah ân chûktir ta a. Chuongchun, mi tamtak a thu hre hai chun, “Hi mipa hin hieng thu hi khawlaia inthawka a hriet am a na? Hi mipa kuoma pêka um hi ieng varna am a na? A kut ngeiin thil mak tak tak a thaw hi iengtizie am a na?

³Hi mipa hi Mari naupa, Jakob hai, Jose hai, Juda hai, Simon hairawi unaupa, thingrem siemtu kha a ni naw am a nih? A farnuhai khawm hitaka ei kuoma um an ni nâwm a nih?” an ta, mak an ti hle a. Chuongchun, a chungah an lungni ta naw a.

⁴Chun, Isûn an kuomah, “Zâwlnei chu ama khuo tienga dâm, ama laibunghai lai dâm, ama ina hai dâm chau naw chun inpâk lovin a um ngai nawh,” a ta.

⁵Chun, mi damnaw tlâwmte chunga kut innghata a sukdam ti chau naw chu, chu hmuna chun thilmak dang hrim a thaw thei naw a.

⁶An awi nawna chu mak a ti hle a. Chun, inchûktir pum peiin khuohai chu a fang vêl a.

⁷Chun, sâwm le pahni hai chu a ko a, pahni peiin a tir suok ta a; khawhri inthieng nawhai chunga thuneina a pêk bawk a.

⁸Chun, inzinnaa ding chun funghrawl chau naw chu iengkhawm bei khawm, mansa khawm, an kâwngkhiah tangka khawm châwi lo ding a ti tlat a,

⁹kekawk ruok chu bun ding a ti a. “Zakuo pahni hâk naw ro,” a ti bawk a.

¹⁰Chun, ama bawkin an kuomah, “Khawlai khawm in tlungna ina chun chu hmuna inthawka in suok nâwk hmakhat chu, tlung zing pei ro.

¹¹Chun, khâwlai khuo khawmin an lâwm naw cheu a, in thu an ngâi nawna poah, chutaka inthawka in suok pha chun, anni inhriettirna dingin in kepha hnuoia pilvut kai chu thinthla ro,” a ta.

¹²Chuongchun, an fe suok a, mipuihai kuomah simna thu an hril a.

¹³Khawhrihai tamtak an hnawtsuok a, damnaw tamtak khawm sahriek an nâl a, an sukdam bawk a.

¹⁴Chun, lal Herod chun a lo hriet a, a hming chu a lo inthang ta si a, “Baptistu Johan kha mithi laia inthawkin a hung tho nâwk ta a; chuleiin, chuong thilthawtheinahai chun amaa chun sin a thaw a ni chu,” a ta.

¹⁵Mi dang ruok chun, “Elija a ni chu,” an ta; mi dangin, “Zâwlnei a ni chu, zâwlneihai laia pakhat ang kha,” an ta.

¹⁶Herod ruok chun a lo hrietin, “Johan, a lu ka itanpa ngei kha a hung tho nâwk a ni chu,” a ta.

¹⁷Herod ngei chun a unaupa Philip nuhmei Herodi leiin mi a tir suok a, Johan chu ân mantir a, intângna inah phierin a lo khum ta si a; Herodi chu nuhmeiin a lo nei ta leiin;

¹⁸Johan chun Herod kuomah, “I unaupa nuhmei i nei pêk hi a thieng naw a nih,” a lo ti ta bawk a.

¹⁹Chuleichun, Herodi chun ama chu a hmêl huot rieu a, sukhlum a nuom a; nisienlakhawm, a thei si naw a;

²⁰Herodin Johan chu mi fel le mi inthiengtak a nih ti a hriet leiin ama chu a ṭi a, a hum tlat si a, a thu a ngai chun a lunginzîng hle hlak a: nisienlakhawm, lâwm takin a ngai hlak a.

²¹Chun, Herod chun a pieng ni champha phâk nia a mi ropuihai, sipai hotu lienhai dâm, Galili rama mi lienhai rawi ta dinga, zâna ruoi a ṭhe laiin hun remchâng a hung um ta a.

²²Herodi naunu ngei chu a hung lût a, a lâm a, Herod le a thlaithlêng awtpuituhai chu a suklâwm ta a; chuongchun, lal chun naupangnu kuoma chun, “I dit dit mi hni rawh, pêng ka ti che,” a ta.

²³“Iengkhawm i mi hni phawt chu, ka ram chenve rau khawm pêng ka ti che,” tiin a kuomah a lo inkhâm ta bawk a.

²⁴Chun, ama chu a suok a, a nu kuoma chun, “Ieng am hnîng ka ta?” a va ta. Chun, ama chun, “Baptistu Johan lu,” a lo ta.

²⁵Chun, ama chu inhmawtakin lal kuoma chun a va lût nghâl ta a, “Thlêngin Baptistu Johan lu i mi pêk nghâl ka nuom a nih,” tîn a hni a.

²⁶Chun, lal chu a lungngai ta bêk bêk el a; nisienlakhawm, ân khâmnahai le a thlaithlêng awtpuituhai lei chun a sêl nuom naw a.

²⁷Chun, lal chun a vêngtu sipai pakhat a tir nghâl ta a, a lu chu hung lâk ding thu a pêk a. Chun, ama chun intângna ina chun a lu a va tan a,

²⁸a lu chu thlêngin a hung lâk a, naupangnu kuoma chun a pêk a, ama chun a nu kuomah a pêk a.

²⁹Chun, a închûktirhai chun an hriet phingleh a ruong chu an vân hlawm a, thlânah an inzâl ta a.

³⁰Chun, tirkohai chu Isu kuomah an hung inkhâwm a, iengkim an thil thaw tahai, an thu inchûktir tahai po po chu an hril a.

³¹Chun, ama chun an kuomah, “Nangni rawi ngawtin thlalêr hmunah a tumin hung unla, châwl phawt ro,” a ta. (Mi tamtak an insûl zut zut a, bu takngiel khawm an fâk hman nghâl naw a.)

³²Chuongchun, thlalêr tieng lawngin a tumin an va fe ta a.

³³Chun, an va fe lai chu mipuihai chun an hmu a, mi tamtakin anni chu an hriet a, khaw tina inthawkin chu hmuna chun kein an tlân khâwm a, an lo lekhal ta a.

³⁴Chuongchun, ama chu a hung suok chun, mipui nasatak a hmu a, vêngtu nei naw berâmhai ang an ni leiin a lunginsiet bêk bêk a; thu tamtak ân chûktir ta a.

³⁵Chun, khuo chu a hung inhnu ta hle a, a inchûktirhai chu a kuomah an hung a, “Ahi thlalêr hmun a na, khuo khawm ân hnu ta bawk nghâl a.

³⁶Anni rawi hi ei kâwl vêl lova dâm le khuoa dâm an fâk ding ieng amanih bêk an inchâwk theina dingin infetir tâwl ta la,” an ta.

³⁷Ama ruok chun an kuomah, “Nangnîn fâk ding pe ta unla,” tiin a dawn a. Chun, anni chun a kuomah, “Bei duli zahni man vân chawin fâk ding kan pêk ding am a nih?” an ta.

³⁸Chun, ama chun a kuomah, “Beiphêk iengzât am in nei a? hung en ta u,” a ta. Chun, an nei zât an hriet phingleh, “Panga, ngatê pahni leh,” an ta.

³⁹Chun, ama chun, an rêngin hlo hring chunga chun apâwl peia inṭhungtir dingin an kuomah thu a pêk a.

⁴⁰Chun, atlarin za khat dâm, sâwmnga dâm peiin an ṭhung tâwl a.

⁴¹Chun, ama chun bei panga le ngatê pahni chu a lâk a, vân tieng nghain mal a sâwm a, beiphêkhai chu a khawi a, mipui chu infâktir dingin a inchûktirhai kuomah a pêk a, ngate pahni khawm chu mi po po lai chun a sem a.

⁴²Chun, an rêngin an fâk a, an khawp tâwl ta a.

⁴³Chun, bei nâwi le nga nâwihai chu bâwm sâwm le pahni an rût sip a.

⁴⁴Bei fatuhai chu patling ruok khawm sâng nga hiel an nih.

⁴⁵Chun, ama ngeiin mipui chu ân ṭintir sûngin râl khing tienga Bethsaidaa lo fe hmasa dingin a inchûktirhai chu lawngah ân chuong tir nghâl ta a.

⁴⁶Chun, anni ân ṭintir hnung chun ṭawngṭai dingin tlangah a fe ta a.

⁴⁷Chun, zântieng inhnu deu a hung ni chun lawng chu dîl lai taka chun a lo um a, ama chu a khât chauin khawmuola chun a um a.

⁴⁸Chun, an lawng kar chu an lung a zîng hlein a hmu a, thliin a ni naw tieng panga a mût leiin. Vârṭien ding lai vêlin dil chunga kea lâwnin anni tieng a hung pan a, anni chu fe khêl a tum a.

⁴⁹Nisienlakhawm, anni chun ama chu dîl chunga kea lâwn an hang hmu chun thlâ amani an sâwn a, an khêk ta rak el a; an rêngin ama an hmu a, an thlaphâng hle a.

⁵⁰Nisienlakhawm, ama chun anni chu a biek nghâl ta a, an kuomah, “Lungmuongtakin um ro, keima ka nih annâwm, ṭi naw ro,” a ti ta a.

⁵¹Chun, lawnga chun an kuomah a hang chuong ve a, thli hrang chu a ma ta a; chuongchun, an lungril chun mak an ti hle a,

⁵²bei thu kha a ngaina an hrietthiem si naw a, an lungril a ngar leiin.

⁵³Chun, râl khingtieng an kai chun Gennesaret ram, khawmuol an tlung a, vapanga chun lawng chu an thlung a.

⁵⁴Chun, lawnga inthawka an suok chun, mihai chun ama chu an lo hriet nghâl ta a;

⁵⁵chu ram vêla chun an tlân vêl ta sup sup a, a um ti an hrietna taphawta chun damnawhai dâm an zâlphaa zâl pum zingin an zâwn vêl ta ruoi el a.

⁵⁶Chun, khaw chînhaia dâm, khaw lienhaia dâm, lohaia dâm, khawlai a lûtna taphawta chun damnawhai chu dâwr hmuna dâm an inzâltir tâwl a; a puon hmawr bêk khawm them thei an hni a. Chuongchun, ama tâwk po chu an dam pei ta a.