Read Hmar MARKA 8 Bible Online

MARKA 8 - Hmar bible

MARKA 8

¹Chuong lai chun mipui tamtak an hung um nâwk a, chuonga fâk ding iengkhawm an nei naw lai chun, ama chun a închûktirhai chu a ko a, an kuomah,

²“Tûn mipuihai hi ka kuomah ni thum an um ta a, fâk ding iengkhawm an nei naw leiin ka lunginsiet bêk bêk a nih.

³Bu ngheia an in tieng kân fetir el chun, lam kâr lakah an châu ding a ni si a, a ṭhen lem chu an hungna a hla hle si a,” a ta.

⁴Chun, a închuktirhai chun, “Tuin am hienghai rawi hi sukkhawp thei an ta?” tiin ama an dawn a.

⁵Chun, ama chun, “Beiphêk iengzât am in nei a?” tiin anni chu ân dawn a. Chun, anni chun, “Phêk sari,” an ta.

⁶Chun, mipuihai chu hnuoia ṭhung dingin thu a pêk a, chuongchun, bei phêk sari chu a lâk a, lâwmthu a hril zoin a khawi a; anni laia sem dingin a închûktirhai a pêk a; chuongchun, mipui lai chun an sem ta a.

⁷Ngatê tlâwmte an nei bawk a, ama chun chu khawm chu mal a sâwm a, chuonghai khawm chu mipui laia sem ding thu a pêk a.

⁸Chuongchun, an fâk a, an khawp tâwl ta a; an fâk mahla nawi khawm chu bâwmrâng sari zet an rût sip a.

⁹Anni rawi chu sâng li lai an na; ama chun anni chu ân ṭintir ta a.

¹⁰Chun, ama chu a închûktirhai lai lawngah a chuong nghâl ta a. Dalmanutha[8] ram chu a tlung ta a.

¹¹Chun, Pharisaihai an hung a, ama fiena dingin amaa vâna inthawka inchikna zawngin ama chu an sêl ta a.

¹²Chun, ama chu a lungrilah nasatakin ân rûm a, “Iengdinga tulaia ruoltharhai hin inchikna an zawng am a na? Titakzetin ka hril cheu, tulai ruoltharhai kuoma hin inchikna hrim hrim pêk ni naw ni,” a ta.

¹³Chun, anni chu a mâksan a, râl khing tieng a fe ta a.

¹⁴Chun, a închûktirhai chun bei an chawi theinghil a, bei phêk khat chau naw chu lawnga chun bei dang hrim hrim an nei si naw a.

¹⁵Chun, ama chun, “Pharisaihai chawl le Herod chawla chun invêng ṭha unla, ṭi dêkin um ro,” a ti tlat a.

¹⁶Chun, anni chun, “Bei ei nei dêr naw a,” tîn an in ngaituo a.

¹⁷Chun, Isûn chu chu a lo hriet a, an kuomah, “Bei in nei naw leisek chun iengdinga in inngaituo am? Tu khawm hin in lungrilin in la hriet rawp naw maw? In lungril chu in sukngar ta am a nih?

¹⁸Mit nei zing siin in hmu nâwm a nih? Na nei zing siin in hriet nâwm a nih? In hriet zing ta naw a ni maw?

¹⁹Sâng nga laia bei phêk nga ka khawi lai khan a nâwi kha bâwm iengzât am in rût sip kha? In la hriet zing naw maw?” a ta. Anni chun a kuomah, “Sâwm le pahni,” an ta.

²⁰Chun, “Sâng li laia pasari ka khawi khan a nâwi kha bâwmrâng iengzât am in rût sip a?” a ta. Anni chun a kuomah, “Bâwmrâng sari,” an ta.

²¹Chun, ama chun an kuomah, “Tu khawm hin a ngaina in la hriet rawp naw maw?” a ti ta a.

²²Chun, Bethsaida chu an hung tlung a. Chun, a kuomah mitdel an hung ṭhuoi a, ama chu them dingin Isu an ngên a.

²³Chun, ama chun mitdel kut chu a chel a, khaw kâwl tieng a fepui a; chun, a mita chun chil a sâk a, a chungah a kut ân nghat zoin, “I hmu thei ta?” tîn ân dawn a.

²⁴Chun, a hang tang a, “Mihriem chu ka hmu a, anachu thing lâwn angin ka hmu,” a ta.

²⁵Chun, a mita chun a kut ân nghat nawk a, chuongchun, ama chun a en zing a, a hung dam el ta a, iengkim chiengtakin a hmu thei ta a.

²⁶Chun, Isu chun, “Khuoa khawm hin lût ta naw la,” tîn a in tieng ân fetir ta a.

²⁷Chun, Isu le a închûktirhai chu an fe suok a, Philip Kaisari khawperhaia chun an fe a; chun, fe malamin a închûktirhai kuomah, “Mihaiin tu am a nih an mi ti a?” tiin ân dawn a.

²⁸Anni chun, “ ‘Baptistu Johan an ti che a’; mi dangin ‘Elija,’ a ṭhen ruok chun, ‘Zâwlnei tu amanih’ an ti che a,” tiin an hril a.

²⁹Chun, ama chun an kuomah, “Anleh, nangnîn tu am a nih in mi ti a?” tîn ân dawn a; Peter chun a kuomah, “Krista chu i nih,” tîn a dawn a.

³⁰Chun, ama chun a chanchin thu chu tukhawm hril lo ding a ti tlat a.

³¹Chun, Mihriem Naupa chun thil tamtak a tuor dingzie dâm, upahai, thiempu lalhai le, Dân inchûktirtuhai dit nawa a um ding dâm, sukhluma a la um ding dâm, ni thum hnunga a thonâwk dingzie dâm anni ân chûktir ṭan ta a.

³²Chuong thu chu chiengtakin a hril a. Chun, Peter chun ama chu a tumin a ṭhuoi a, a kâwk a.

³³Ama ruok chu a ngha kîr a, a închûktirhai chu a en a, “Setan, ka hnungah fe rawh. Pathien thilhai ngaituo lovin, mihriem thilhai i ngaituo a ni hi,” tîn Peter chu a kâwk ta a.

³⁴Chun, mipuihai chu a închûktirhai le chun a ko a, an kuomah, “Tukhawm a mi zui nuom chun mâni inhnâwlin, a kraws putin mi zui raw se.

³⁵Tukhawm ama hringna sanhim nuom chun chân a tih. Tukhawm keia lei le Chanchin Ṭha leia hringna chân chun sanhim a tih.

³⁶Mîn khawvêl hi a pumin nei sienla, a hringna chân si sienla, ieng am ṭhahnem a ta?

³⁷Mîn a hringna sikin ieng am pe thei a ta?

³⁸Tukhawm tulai ruolthar uire le suksuol hmanghai laia kei le ka thu inzapuihai po chu, Mihriem Naupa hin vântirko inthienghai le a Pa ropuinaa inthuoma a hung pha chun, ama chu hung inzapui ve thung a tih,” a ta