Read Hmar MARKA 9 Bible Online

MARKA 9 - Hmar bible

MARKA 9

¹Chun, ama bawkin an kuomah, “Titakzetin ka hril cheu hi, hitaka ngîr aṭhenhai hi Pathien ram chu thilthawtheina le a hung tlung an hmu hmâkhat chu thina intem tawp naw ding an um,” a ta.

²Chun, ni ruk hnungin Isûn Peter hai, Jakob hai, Johan hai, chu a ṭhuoi a, a tumin tlâng insângtakah anni chau chu a hang fepui a, an hmaa chun a hmêl umzie chu a hung danglam ta a.

³Chuongchun, a silfênhai chu hnuoia puon sâwptu hrim hrimin an sâwp vâr thei naw ding khawp rakin a hung vâr a, a hung tle ta sur el a.

⁴Chun, Elija le Mosie chu an kuomah an hung inlâr a, Isu le chun an inbiek ta a.

⁵Chun, Peterin Isu a biek a, “Rabbi, ei ta dingin hitaka um hi a ṭha; bâwkte pathum khâwng ei ta, I ta dingin pakhat, Mosie ta dingin pakhat, Elija ta dingin pakhat,” a ta.

⁶An ṭi bêk bêk leiin hril ding mumal a hriet si naw a.

⁷Chun, anni chu hliein sûm a hung suok a, “Ahi ka Naupa dittak a nih, ama thu ngai ro,” a ta.

⁸Chun, an hang en vêl vat a, Isu chau naw chu tukhawm an kuomah chun an hmu ta naw a.

⁹Chun, tlânga inthawk an ṭum laiin, Mihriem Naupa mithi laia a thonâwk hnunga chau naw chu an thil hmu chu tukhawm hril naw ding a ti tlat a.

¹⁰Chuongchun, chu thu chu an vawng zing a, “Mithi laia a thonâwk chu ieng tina am nîng a ta?” tiin anni rawi chu an indawn tuo hlak a.

¹¹Chun, anni chun a kuomah, “Iengdinga Dân inchûktirtuhaiin ‘Elija a hung hmasa ding a nih,’ ti am an na?” tîn an indawn a.

¹²Ama chun an kuomah, “Elija chu hung hmasa hrim a ta, iengkim a siem ṭha ding a nih: thil tamtak tuorin, mi hmusitin a um ding a nih ti Mihriem Naupa chanchin iengtiziea ziek am an na?

¹³Nisienlakhawm, ka hril cheu hi: Elija chu a hung ta a nih. Chun, a chanchin an ziek ang ngei khan, a chungah an nuom nuomin an thaw ta hrim bawk a,” a ta.

¹⁴Chun, inchûktirhai kuom an zuk tlung chun, an vêla mipui nasatakhai le Dân inchûktirtuhaiin an lo sêl lai an zu hmu a.

¹⁵Chun, mipui po po chun ama an hmu phing chun mak an ti hle a, a kuom tieng an tlân tâwl a, chibai an va bûk a.

¹⁶Chun, ama chun an kuomah, “Annihai rawi leh ieng thu am a na in insêl?” tîn ân dawn a.

¹⁷Mipui laia mi pakhatin an kuomah, “Inchuktirtu, ka naupa khawhri ṭawng thei naw iman chu i kuomah ka hung ṭhuoi a.

¹⁸A manna taphawtah a the thlûk hlak a, chuongchun, a chilhuomhai a tla a, a hahai a rawt a, a hung khawng hlak a. Hnawt dawk dingin i închûktirhai ka ngên a, an thei si naw a,” tiin a dawn a.

¹⁹Chun, ama chun an kuomah, “Ruolthar ringna nei nawhai, ieng chen am in kuomah um ka ta? Ieng chen am ngai thei ka ti cheu a? Ama chu ka kuomah hung ṭhuoi ro,” tiin a dawn a.

²⁰Chun, ama chu Isu kuomah an hung ṭhuoi a; chuongchun, khawhri chun ama a hmu phingleh, naupang chu nasatakin a sawisa nghâl ta a; chuongchun, hnuoiah a tlu a, chilhuom tla reiruiin ân tleng ta tawp tawp a.

²¹Chun, ama chun a pa kuomah, “Hienga a um phutna hi ieng chen am a ni ta a?” tiin ân dawn a. Ama chun, “A naupang laia inthawkin a ni tah;

²²hieng hin ama sukbohmang dingin vawi tamtak meia dâm, tuia dâm a nam thlûk ta a; nisienlakhawm, nangin iengtin amanih bêk i thaw thei chun mi lunginsiet la, mi ṭhangpui rawh,” a ta.

²³Chun, Isûn, a kuomah “ ‘I thei chun’ i ti maw? Awitu ta ding chun iengkim thaw thei a nih i sawnnaw,” a ta.

²⁴Chuongchun, naupang pa chun, “Ka awi, ka awinawnaa hin mi ṭhangpui rawh,” tîn a khêk suok nghâl ta a.

²⁵Chun, Isûn mipui an hung tlân khâwm chu a hmuin khawhri inthieng naw chu a hal a, a kuomah, “Nang thlarau ṭawng thei naw le nasêt, thu ka pêk che hi, a sûnga inthawk hung suok la, lût nâwk ta naw rawh,” a ta.

²⁶Chuongchun, a khêk suok a, nasataka a sawisak zo chun a hung suok ta a, chun, naupang chu thi ang elin a um a, chuongchun, mi tam lem chun, “A thi a nih,” an ti a.

²⁷Isu ruok chun a kutah a chel a, a keitho a; chuongchun, a hung tho el ta a.

²⁸Chun, Isu chu in a va lût chun, a închûktirhaiin, “Iengdinga keinîn kan hnawt dawk thei naw am a na?” tiin fienrielah an indawn a.

²⁹Ama chun an kuomah, “Hieng ang hi ṭawngṭaina[9] naw chun iengtin khawm a suok thei nawh” a ta.

³⁰Chun, chutaka inthawk chun, an fe suok a, Galili ram chu an fe thleng a, tu ihriet khawm a nuom naw a.

³¹A închûktirhai chu a hril a, an kuomah, “Mihriem Naupa hi mihriemhai kuta inmantirin a um ding a nih, sukhlum bawk an ta; chun, sukhlum hnung ni thum chenah tho nâwk a tih,” a ta.

³²Nisienlakhawm, a thu hril chu a ngaina an hriet naw a; ama hlak chu an indawn ngam si naw a.

³³Chun, Kapernaum chu an hung tlung a; chun, in sûnga chun a um laiin an kuomah, “Lampuia khan ieng thu am a na in insêl?” tîn ân dawn a.

³⁴Nisienlakhawm, lampuia chun, “Eini lai hin tu am ropuitak a ta?” tiin an lo insêl ta leiin an to zing el a.

³⁵Chun, ama chu a ṭhung a, sâwm le pahnihai chu a ko a, an kuomah, “Tûkhawmin a hmasatak ni a nuom chun, mi po po nêka nuhnungin um a ta, mi po po rawngbâwltuin a um bawk ding a nih,” a ta.

³⁶Chun, naupangte a kei a, anni lai ân ngîrtir a, chun, a kutin a kuo a, an kuomah,

³⁷“Tûkhawm keia hming leia hieng ang naupang chîte pakhat khawm lâwm chu keia mi lâwm ning a tih; tûkhawm keia mi lâwm chu a mi tirtu lâwm ni lem a tih,” a ta.

³⁸Johan chun a kuomah, “Inchûktirtu, tuin amanih i hmingin khawhrihai a hnawt dawk kan hmu a, a mi zui ve naw leiin kan khap tah annaw,” a ta.

³⁹Isu ruok chun, “Khap ta naw ro,tûkhawm ka hminga thilmak thaw si a, a mi hrilse thei an um naw a nih.

⁴⁰Tûkhawm a mi kal naw chu eini tienga ṭhang a ni si a.

⁴¹Tûkhawm Krista mi in ni leia tuisik no khat dâwn ding pe taphawthai cheu chu, titakzetin ka hril cheu, an lâwmman ding chu inhmang ta naw tawp a tih.

⁴²“Chun, tûkhawm hieng a mi awitu chîtêhai laia pakhat chau khawm sukthlu taphawt chu, a rîngah bu râwtna lung lientak inhlitirin tuisuorietah thlâkin um sienla, a ta dingin ṭha lem a tih.

⁴³Chun, i kutin a sukthlûk che chun, tan el rawh; kut pahni neia Hremhmun mei rêm thei nawa fe nêkin, kut bûla hringnaa i lût chu i ta dingin a ṭha lem.

⁴⁴[Chu hmuna chun an nge a thi ngai ta naw a, mei khawm chu a rêm ngai ta nawh.][10]

⁴⁵Chun, i kein a sukthlûk che chun tan rawh; ke pahni neia Hremhmuna peia i um nêk chun, ke baia hringnaa i lût i ta dingin a ṭha lem.

⁴⁶[Chu hmuna chun an nge a thi ngai ta naw a, mei khawm chu a rêm ngai ta nawh.][11]

⁴⁷Chun, i mitin a sukthlûk che chun khel dawk el rawh, mit khingkhat neia Pathien rama lût i ta dingin a ṭha lem: mit khinghni neia Hremhmuna[12] peia um nêk chun,

⁴⁸chu hmuna chun an nge a thi ngai ta naw a, mei khawm chu a rêm ngai ta bawk nawh.

⁴⁹Mi tin meia[13] rawin an um ding a ni si a.

⁵⁰Machi hi a ṭha; nisienlakhawm, machi hi a alna lo da ta sienla, iengin am sukal nâwk an ta? Nangni ngeiin machi nei unla inngei ro,” a ta.