Read Hmar LUKA 1 Bible Online

LUKA 1 - Hmar bible

LUKA 1

¹Eini laia thil hung tlung tahai chanchin,

²a tira inthawka mita hmutuhai le thu rawngbâwltuhaiin, an mi hril sawng ang tak khan, mi tamtakin ziek an tum ta hlak a;

³chuleiin, Theophil inzâumtak, a bula inthawkin iengkim fimkhur taka suiin, kei khawmin chanchin indawt thlapin ziek pêk lang che ṭhain ka hriet a;

⁴kha hmaa thu an inchûktir che kha indiktak a nih ti i hriet theina dingin.

⁵Judai ram lal Herod a dam laiin, Abija pâwla mi a hming Zakaria, thiempu pakhat a um a. Ama chun Aron thlaa mi nuhmeiin a nei a, a hming chu Elizabeth a nih.

⁶An pahni chun Pathien mithmuah feltakin an um a, Lalpa thupêk le a dân po po chu sawisêlboa zâwm hlak mi an nih.

⁷Nisienlakhawm, Elizabeth chu a ching leiin nau an nei naw a, an pahni chun upatak an ni si a.

⁸Chun, a pâwlhai thaw dân ang peia Pathien hmaa thiempu sin a thaw laiin,

⁹thiempu dân angin Lalpa biekina lût le riminhnik raw sin a chang a.

¹⁰Chun, riminhnik chu a raw hun laiin mipui chu an rêngin tuolah an ṭawngṭai a.

¹¹Chun, Lalpa vântirko pakhat thil riminhnik râwna maichâm changtieng chun a hung inlâr a.

¹²Chun, Zakaria chun a hmu phing- leh a lunginzîng a, ṭi khawm a ṭi a.

¹³Nisienlakhawm, vântirko chun a kuomah, “Zakaria, ṭi naw, i hni kha hriet a nih, i nuhmei Elizabethin naupasal neipêk a ti che, a hmingah Johan i sak ding a nih.

¹⁴Chun, nang hlimin lâwm i ta, ama a pieng chun mi tamtak lâwm bawk an tih.

¹⁵Lalpa ngaiin mi lien nîng a ta, uoin le zu hrim hrim dâwn naw ni a; a nu phing sûnga inthawkin[1] Thlarau Inthiengin hung sip a tih,

¹⁶Israel thlahai tamtak Lalpa an Pathien kuom tieng innghattir nâwk a tih.

¹⁷Chun, pahai lungril chu nauhai tienga innghattir ding dâm, mi kâwmawhai chu mi feltak varna tienga innghattir ding dâm, Lalpa ta dinga mihai lo buotsai dingin Elija lungril le thilthawtheina putin Lalpa hmaah fêng a tih,” a ta.

¹⁸Chun, Zakariain vântirko kuomah chun, “Chu chu iengtin am hrieng ka ta? kei putar ka na, ka nuhmei khawm pitar a ni si a,” a ta.

¹⁹Vântirko chun a dawn a, a kuomah, “Gabriel, Pathien hmaa ngîr hlak ka na; a be ding che le, chuong thu ṭha chu hril ding chea hung tir ka nih.

²⁰Ngai rawh, ka thu hrilhai, a hun taka hung tlung ding chu i awi naw leiin chuong thil chu a hung tlung hmakhat chu to zing i ta, ṭawng thei naw ti ni,” a ti a.

²¹Chun, mipuihai chun Zakaria chu an lo nghâk a, Pathien biekin sûnga a um sâwt lei chun mak an ti hle a.

²²Chun, a hung suok chun an kuomah thu a hril thei ta naw a; chuongchun, biekinah inlârna a hmu a nih ti an hriet ta a; anni chu kut zâizirin a biek hlak a, chun ṭawng thei lovin a um ta zing a.

²³Chun, a rawngbâwlna ni chu a kim phingleh a inah a fe ta a.

²⁴Chu hnunga chun a nuhmei Elizabeth chu a hung inrai a, thla nga ân thup a.

²⁵“Mi kuoma ka hming sie inkhumna dingin, Lalpain a mi hmu a, hieng ang hin a mi thawpêk a ni hi,” a ta.

²⁶Chun, a thla ruknaa chun Pathienin vântirko Gabriel chu Galili rama khuo pakhat Nazareth an tia chun,

²⁷nunghâk inthieng pakhat kuomah a tir a; ama chu David thlaa mi a hming Josef nuhmei huol a na; chu nunghâk hming chu Mari a nih.

²⁸Chun, vântirko chu a kuomah a lût a, “Chibai, Vochuom, Lalpa i kuomah a um[2]” a ta.

²⁹Chun, chu thu hril lei chun a lunginzîng ta bêk bêk a, “Iengtiziea chibai a mi bûk am nîng a ti aw,” tiin ân ngaituo a.

³⁰Chun, vântirko chun a kuomah, “Mari, ṭi naw, Pathien ngaisak zâwng i nih.

³¹Ngai rawh, inrâi i ta, naupasal nei i ta, a hminga chun Isu i sak ding a nih.

³²Ama chu mi lien la nîng a ta, Achunghnungtak Naupa tîng an tih; Lalpa Pathienin a thlatu David ṭhungpha chu pêng a ta;

³³Jakob thlahai chungah chatuonin inlal a ta, a ramin tâwp ni nei naw ni,” a ta.

³⁴Chun, Mari chun vântirko kuomah chun, “Chuong chu iengtin am ni thei a ti leh, pasal ka nei si naw a?” a ta.

³⁵Chun, vântirko chun a dawn a, a kuomah, “Thlarau Inthieng i chungah hung tlung a ta, Achunghnungtak thilthawtheina chun hliekhûng a che; chuleiin, naupang hung pieng ding khawm chu mi inthieng, Pathien Naupa tîng an tih.

³⁶Chun, ngai ta, i zuorpuinu Elizabeth khawmin tar hnungin naupasal a vawn ta a; a ching an ti hlak kha, tuta thla hi a thla rukna a ni tah.

³⁷Pathien ta ding chun thaw thei naw iengkhawm a um si naw a,” a ta.

³⁸Chun, Marin, “Ngai ta, Lalpa suoknu ka nih, i hril ang tak chun ka chungah tlung raw se,” a ta. Chun, vântirko chun a fe san ta a.

³⁹Chuong lai chun Mari chu a tho a, thingtlângah, Judai rama khuo pakhata chun a fe ta a;

⁴⁰chun, Zakaria inah a lût a, Elizabeth chibai a bûk a.

⁴¹Chun, Elizabethin Mari chibai bûk chu a hriet phingleh, a phîng sûnga naute chu a châng a; chun, Elizabeth chu Thlarau Inthiengin a sip ta a;

⁴²râwl inringtakin a khêk a, “Nang chu nuhmei lai poah inpâktlâk i nih; i rîla ra khawm inpâktlâk a nih.

⁴³Ka Lalpa nu ka kuoma i hung hi iengtizie am a na?

⁴⁴Ngai ta, i chibai bûk ri ka naah a lût phingleh a lâwm leiin nautê ka phîng sûngah ân châwm a nih.

⁴⁵A kuoma Lalpân thu a hril kha a tlung ding a ni ti ringnu chu a hamṭha,” a ta.

⁴⁶Chun, Marin, “Ka hringnân Lalpa a chawimawi a,

⁴⁷Ka thlarau khawm a mi sandamtu Pathien chungah a lâwm bêk bêk a,

⁴⁸A suoknu tlâwmzie a hmu a, a lunginsiet a, Ngai rawh, tuta inthawkin ruolthar po poin hamṭha an mi ti ding a nih.

⁴⁹Mi hrât khan ka chungah thil ropuitak a mi thawpêk a,

⁵⁰A hming khawm ân thieng a nih, A ṭituhai chu suon po po chenin a lunginsiet pei hlak.

⁵¹A bânin a tha hrâtzie ân entir a, An inngaituonaa chapohai chu a sukdar ta a.

⁵²An ṭhungphaa lal inṭhunghai chu a hnûk thlâk a. Mi inhnuoihai chu a dawm sâng ta a.

⁵³Phîng ṭamhai chu thil ṭhatakin a sukkhawp ta a, Hausahai chu kutruokin ân fe hmangtir ta a.

⁵⁴A siehlaw Israelhai chu a sawmdâwl ta a, Ei thlatuhai kuoma a lo hril ta ang ngei khan;

⁵⁵Abraham le a thlahai chu chatuona a lunginsiet dingzie hriet zingna dingin,” a ta.

⁵⁶Chun, Mari chu thla thum lai a kuomah a um a; chun, a in tieng a fe nâwk ta a.

⁵⁷Chun, Elizabeth nau nei chu a hung hun ta a; naupasal a nei ta a.

⁵⁸Chun, a vênghai le a laibunghai chun, Lalpân a lunginsiet ti an lo hriet a, an lâwmpui a.

⁵⁹Chun, ni riet nia chun nautê ser tan dingin an hung a; a hmingah a pa hming bawk, Zakaria sak an tum a.

⁶⁰Nisienlakhawm, a nu chun, “Ni lo e, ama chu Johan sak lem ding a nih,” a ta, a dawn a.

⁶¹Chun, annîn a kuomah, “I laibunghai lai hi hming put hi tukhawm an um lêm,” an ta.

⁶²Chun, a pa kuoma chun kut zaizirin, “A hmingah ieng am sak inla i nuom a?” an ta.

⁶³Chun, lekha ziekna lung phêk a hni a, “A hming Johan a nih,” tiin a ziek a. An rêngin mak an ti hle a.

⁶⁴Chun, kârlovin a lei le a bau chu a hung insût a. Pathien inpâkin a hung ṭawng suok ta a.

⁶⁵Chun, an vêla umhai po po chun an ṭi ta a. Chun, chuong thu chu Judai ram thingtlâng po poah ân thang ta a.

⁶⁶A hre taphawt chun an lungrilah lungkhamah an nei a, “Chu nautê chu iengtin takin am la hung um a ti aw,” an ta; Lalpa kutin ama a ṭhangpui si a.

⁶⁷Chun, a pa Zakaria chu Thlarau Inthiengin a sip a, a hrillâwk a,

⁶⁸“Lalpa Israel Pathien chu, inpâkin um raw se, A mihai chu a hung kan a, intlanna a siempêk a,

⁶⁹A siehlaw David sûnghai lai chun, Sandamna ki a mi siempêk ta si a;

⁷⁰(Leihnuoi insieng tîra a zâwlnei inthienghai baua a hril ang khan).

⁷¹Ei hmêlmahai le a mi theidatuhai po po kuta inthawka mi sansuok dinga a lo intiem thu dâm;

⁷²Ei thlâtuhai kuoma a ngilneina suklang a lo tiem thu le, A thuthlung inthieng hre zing dingin,

⁷³Chu thuthlung chu inkhâmin ei thlâtu Abraham kuomah a lo tiem ta a;

⁷⁴Chuongchun, ei hmêlmahai kuta inthawka mi sanhimin, ṭi lova a rawng ei bâwl theina ding le,

⁷⁵Ei dam sûnga a mithmua inthieng le feltaka ei um zing theina ding chu, a mi hung ruotpêk ta a nih.

⁷⁶Anih, Bawipu, nang hi Achunghnungtak zâwlnei tîng an ti che. A lampuihai siem dingin Lalpa hmaah i fe ding a ni si a;

⁷⁷An suolhai ngaidamna dinga, A mihai kuoma sandamna thu inhriettir dingin;

⁷⁸Ei Pathien lunginsietna leiin, Chungtienga inthawkin nisa suokin mi hung sir a ta,

⁷⁹Inthim lai le thina hlima inṭhunghai ên ding le, Thlamuongna lampuia ei kehai mîn pêntir dingin,” tiin.

⁸⁰Chun, nautê chu a hung lien deu deu a, a thlarau tieng a hung hrât ta deu deu a, Israelhai kuoma a hung insuklang hmakhat chu thlalêrah a um zing a.