Read Hmar LUKA 10 Bible Online

LUKA 10 - Hmar bible

LUKA 10

¹Chu zoa chun Lalpân mi dang sâwmsari[11] a ruot a, a fena ding khaw tina le hmun tinah, a hmaah pahni peiin a tir a.

²Chun, an kuomah, “Bu sîk ding a tam hle a, nisienlakhawm, a sinthawtuhai an tlâwm; chuongchun, a bu sîk dinga sinthawtuhai ding tir dingin bu Neitupa kuoma chun ngên ro.

³“Fe ro, ngai ta u, satene laia berâmte um angin ka tir cheu hi.

⁴Tangka ip dâm, mansa dâm, kekawk dâm, chawi naw ro, lampuiah tukhawm chibai bûk naw ro.

⁵Chun, in in lûtna taphawtah a hmasatakin, ‘Hi ina hin thlamuongna tlung raw se,’ ti ro.

⁶Chun, chutaka chun thlamuong nau a um chun in thlamuongna thu chu a chungah um zing a tih; a um naw ruok chun in chungah hung kîr nâwk a tih.

⁷Chu ina chun um zing unla, an pêk taphawt cheu chu fain dâwn unla, sinthawtu chu hlaw hmu tlâk a nih. In tinah fe lâwr naw ro.

⁸“Chun, khuo in lûtna taphawtah an lâwm cheu chun an pêk ang ang cheu chu fa ro;

⁹an khuoa damnaw umhai khawm sukdam unla, an kuomah, ‘Pathien ram in kuomah a tlung tah,’ ti ro.

¹⁰Khuo in lûtna taphawtah an lâwm naw cheu ruok chun, an kawtthlêrahai fe suok unla,

¹¹‘In khaw pilvut kan kephaa kai khawm hi in chungah kan hrûk fai hi; nisienlakhawm, Pathien ram in kuomah a hung tlung tah ti hi hre ro,’ ti ro.

¹²Ka ti cheu hi, chu nia chun chu khuohai tuor nêk chun Sodom khaw tuor ding chu a zie um lem a tih.

¹³“Korazin i chung a rik! Bethsaida, i chung a rik! Nangnia thil maktak thawa umhai kha Tura le Sidona thaw ni sienla, saiip puon sila vut laia ṭhungin sim dai tâng an tih.

¹⁴Nisienlakhawm, ngaituo nia chun nangni tuor nêk chun Tura le Sidon tuor ding chu a zie um lem a tih.

¹⁵Chun, nang Kapernaum, vân chenin chawimawi i ni ding am a nih? Mithi khuo chena nam thlâk i ni ding i sawnnaw.

¹⁶“Tûkhawm nangni thu ngai chu keima thu ngai a nih; tûkhawm a dit naw cheu chu kei a mi dit naw a nih; tûkhawm kei mi dit naw chu a mi tirtu dit naw a nih,” a ta.

¹⁷Chun, sâwmsarihai[12] chu lâwmtakin an hung a, “Lalpa, khawhrihai khawm i hming leiin kan thu thuin an um,” an ta.

¹⁸Chun, ama chun an kuomah, “Kâwlinlep angin Setan vâna inthaw- ka hung tla kha ka hmu annaw.

¹⁹Ngai ta u, rûlhai le ainuvêthai sirdena thu le, hmêlma thuneina po po letthlâkna thu ka pêk cheu hi; iengkhawmin sukna naw tawp a cheu.

²⁰Nisienlakhawm, khawhrihai in thu thua an um leiin lâwm naw ro; vâna in hming ziek a ni leiin lâwm lem ro,” a ta.

²¹Chun, chu lai tak chun Isu chu Thlarau Inthiengah a lâwm bêk bêk a, “Aw Pa, hnuoi le vân Lalpa, nangin mi var le mi bengvârhai kuomah hieng thu hi i ip a, nautêhai kuomah i puong lei hin kân pâk che; anih, Pa, chuong anga thaw chu i ngaiin a ṭha a nih.

²²Ka Pain iengkim a mîn kawltir tah, Naupa chu tû am a na, Pa naw chun tukhawmin an hriet nawh; Pa khawm chu tû am a ni Naupa le an kuomah Naupain a phuong nuomnahai chau naw chun tukhawmin an hriet nawh,” a ta.

²³Chun, inchûktirhai kuom tieng chu a ngha a, inrûkin, “In thil hmuhai hi a hmûna mithai chu a vângnei ie!

²⁴Ka ti cheu hi, zâwlnei tamtak le, lal tamtakhai khawmin in thil hmuhai hi hmu an inhâwk hlak a; nisienlakhawm, an hmu si nawh; naa in hriethai khawm hi hriet an nuom hlak, nisienlakhawm, an hriet si naw a nih,” a ta.

²⁵Chun, ngai ta, dân hretu tû amanih a ngîr a, ama infiena dingin, “Inchûktirtu, chatuona hringna neina dingin ieng am ka thaw ding?” a ta.

²⁶Chun, ama chun a kuomah, “Dân lekhabuah ieng am ziek a na? chutaka chun ieng am i tiem hlak a?” a ta.

²⁷Chun, ama chun, “ ‘Lalpa i Pathien chu i lungril po poin, i thlarau po poin, i hrâtna po poin, i lungvar po poin i hmangai ding a nih’; ‘Nangma în hmangai angin i vênghai khawm i hmangai ding a nih,’ ti hi,” a ta, a dawn a.

²⁸Ama chun a kuomah, “I dawn dik ngawt el ie; chuong ang chun thaw la hring i tih,” a ta.

²⁹Ama ruok chun thiem inchangtir a tum a, Isu kuomah, “Anleh, ka vênghai chu tuhai am an na?” a ta.

³⁰Isûn a dawn a, “Mi pakhat Jerusalema inthawkin Jeriko tieng a fe thla a, suomhmanghai ân tuokpui hlau a, chuhai chun a silfên an hlîppêk vawng a, an vuok hrep a, thi vâng vângin an fe san ta a.

³¹Chun, thiempu pakhat chu lampuia chun a zu fe hlau a, a hmu phingleh lampui sîr khat tieng a hêl el ta a.

³²Chun, chuong ang bawkin Levi chi mi pakhat khawm chu hmun chu a hung tlung a, a hmu phingleh lampui sîr khing tieng a hêl ve el ta a.

³³Amiruokchu, Samari rama mi tû amanih ân zin fe hin a umna chu a hung tlung a, a hmu phingleh a lunginsiet bêk bêk a.

³⁴A kuomah a va fe a, a pawpahai chun hriek le uoin dâm a nâl a, a tuom a, ama sa chungah ân chuongtir a, khuolbûkah a fepui a, a enkawl ta a.

³⁵Chun, a zînga chun duli[13] pahni a kei dawk a, khuolbûk vêngtu kuomah a pêk a, ‘Lo enkawl la, hi bâka i sêng po chu ka hung kîr nâwk pha hung thung ka ti che,” a ta.

³⁶“Chuhai pathum laia chun suomhmang tuokpa vênghai chu a tû tak chu am ni dingin i ring a?” a ta.

³⁷Ama chun, “Ama lunginsiettu chu,” a ta. Chun, Isûn a kuomah, “Nang khawm chuong ang bawk chun va thaw ve rawh,” a ta.

³⁸Chun, an inzin malamin khaw ienga manih a lût a; chun, nuhmei pakhat a hming Marthain a lo intlungtir a.

³⁹Ama chun zuorpui pakhat a nei a, Mari a na; ama chu Lalpa ke bulah a ṭhung a, a thu a ngai a.

⁴⁰Martha ruok chu rawngbâwl ngawtin a buoi hle a; chuongchun, a kuomah a hung a, “Lalpa, ka zuorpuinu hin keia khât chau rawng bâwl dinga a mi dânde hi pawi i ti naw am a nih? mi ṭhangpui dingin hril raw khai,” a ta.

⁴¹Chun, Lalpain, “Martha, Martha, thil tamtak i ngaituoa i buoi a ni hi,

⁴²thil pakhat chau a pawimaw; Mariin chan ṭha a thlang a, chu chu lâkpêk ding a ni nawh,” a ta, a dawn a.