Read Hmar LUKA 11 Bible Online

LUKA 11 - Hmar bible

LUKA 11

¹Chun, Isu khâwlai hmuna manih a ṭawngṭai a, a ṭawng- ṭai zo chun a închûktir mi pakhatin a kuomah, “Lalpa, ṭawngṭai dân Johanin a închûktirhai ân chûktir ang khan mîn chûktir ve ta la,” a ta.

²Chun, ama chun an kuomah, “In ṭawngṭai chun hieng ang hin ti ro, ‘Kan Pa, I hming inzaum raw se. I ram hung tlung raw se,

³Ni tin kan fâk khawpin bu mi pe la,

⁴Kan suolhai mi ngaidam la, Keini khawmin kan chunga thil suksuoltuhai kan ngaidam hlak angin. Thlêmnaa chun mi ṭhuoi lût naw rawh,’ tiin,” a ta.

⁵Chun, ama bawkin an kuomah, “Nangni laia tûin amanih ruol nei sienla, zânrilah a kuomah fein, ‘Ruola, beiphêk pathum mîn pûktir rawh;

⁶ka ruolpa inzinin a mi hung sir a, ama infâktir ding iengkhawm ka nei si nawh,’ ti sienla,

⁷in sûnga mîn, ‘Mi sukbuoi naw, tuhin chu kawt khâr a ni ta a, ka nauhai khawm ka kuomah khumah an zâl ta a, thoin ka va pêk thei naw che,’ tiin dawn sienla.

⁸Ka ti cheu hi, a ruolpa a ni leiin thoin a va pêk nawa chu, a hni tlut tlut leiin, a dit zât zât va pêng a tih.

⁹“Chuongchun, ka ti cheu hi, hni ro, chuongchun, pêkin um in tih; zawng ro, chuongchun, hmûng in tih; nawk ro, chuongchun, hawngpêkin um in tih.

¹⁰Tûkhawm a hni taphawt chun an hmu hlak; tûkhawm a zawng chun an hmu hlak, tûkhawm a nawk chu hawngpêk ning an tih.

¹¹Nangni laia pa hi, a naupain beiphêk hni sienla, tûin am lung pêng a ta? anleh, nga hni sienla, tûin am nga aiah rûl pêng a ta?

¹²Anleh, ârtui hni sienla, ainuvêt a pêk ding am a nih?

¹³Chuongchun, nangni mi suol hmanin in nauhai thil ṭha pêk nachâng in hriet chun, in Pa vâna mi chun a hnituhai chu Thlarau Inthieng a va pêk âwm ngei de e!” a ta.

¹⁴Chun, Isûn khawhri ṭawngtheinaw pakhat a hnawt dawk a. Chun, khawhri chu a suok phingleh ṭawngtheinaw chu a ṭawng ta a; chuongchun, mipuihaiin mak an ti hle a.

¹⁵Nisienlakhawm, a ṭhen chun, “Khawhri lal Beelzebub leiin annâwm khawhrihai a hnawt dawk hlak chu,” an ta.

¹⁶Chun, a ṭhenin ama fiena dingin vâna inthawkin inchikna an hni a.

¹⁷Ama ruok chun, an ngaituohai chu a lo hriet a, an kuomah, “Khâwlai ram khawm mâni le mâni indo taphawt chu an bohmang hlak; sûng khat khawm mâni le mâni indo chu an bohmang hlak.

¹⁸Setan khawm ama le ama ân do chun, a ram iengtin am ngîr suok a ta?

¹⁹Chun, kei Beelzebub[14] leia khawhrihai hnawt dawk hlak ka lo ni chun, in nauhaiin tû leiin am an hnawt dawk hlak a le? Chuleiin, anni chu nangni ngaituotu dinghai nîng an tih.

²⁰Amiruokchu, kei Pathien kut pâr leia khawhrihai hnawt dawk hlak ka ni chun, Pathien ram in kuomah a hung tlung tah nîng a tih.

²¹“Mi hrât chun hriem famkim chawia a in a vêng sûng po, a sum chu himtakin a um zing hlak;

²²nisienlakhawm, ama nêka hrât lemin a hung thaw a, a hne pha chun, ân ringna râlthuom famkim chu a lâkpêk a, a râllâk thil chu a sem dar hlak.

²³Tûkhawm, keia tienga ṭhang naw chu a mi do a nih; tûkhawm a mi lâk khâwmpui naw chun, a the dar a nih.

²⁴“Khawhri inthieng naw chu mi sûnga inthawka a suokin, châwlna zawngin tui um nawna hmunahai ân vâk a. Châwlna hrim hrim a hmu naw a, ‘Ka suokna ina khan kîr nâwk el ka tih,’ a ta,

²⁵chun, a va tlung chun phît faia cheimawiin a va hmu a.

²⁶Chu phingleh a fe a, ama nêka suol lem khawhri dang pasari a hung ṭhuoi a, chutaka chun an lût a, an um zing hlak a; chu mihriem umzie nuhnung chu a hmasa nêkin a hung ṭha naw lem hlak a nih,” a ta.

²⁷Chun, chuong thu chu a hril laiin, mipui laia nuhmei pakhat a khêk suok a, a kuomah, “Nangma vawnna phîng chu a hamṭha ie, i nêne nêk khawm,” a ta.

²⁸Ama ruok chun, “Anih, nisienlakhawm, Pathien thu hrea zâwmhai hi mi hamṭha an ni lem,” a ta.

²⁹Chun, mipuihai chu a kuoma an hung inkhâwm laiin Isûn, “Tulai ruoltharhai hi ruolthar suoltak an nih; inchikna an zawng a; nisienlakhawm, Jona inchikna chau naw chu an kuomah inchikna hrim hrim pêk ni naw ni.

³⁰Jona chu Ninevi khuoa mihai ta dinga inchikna a lo ni ang khan, Mihriem Naupa khawm tulai ruoltharhai ta ding hin inchikna la nîng a tih.

³¹“Simtieng lalnu kha ngaituo pha chun tulai ruoltharhai kuoma hin tho vêng a ta, thiemnaw inchangtir a tih; Solomon var ngai ding hmanin kâwlkawdawnga inthawkin a hung si a; ngai ta u, Solomon nêka ropui lem hitaka hin a um.

³²“Ninevi khuoa mihai chu ngaituo pha chun tulai ruoltharhai lai hin ngîr vêng an ta, thiemnaw inchangtir an tih, Jona thu hril leiin an sim si a; ngai ta u, Jona nêka ropui lem hitaka hin a um annâwm.

³³“Tukhawmin khâwnvar an sitin in hnuoi kilah an sie ngai nawh, leikhâwr hnuoiah an sie ngai bawk nawh, mi lûthai chun a var an hmu theina dingin a sienaa chun an sie lem hlak a nih.

³⁴“I taksa khâwnvar chu i mit a nih, i mit a var chun i taksa khawm apumin a var suok hlak; a se ruok chun i taksa khawm ân thim zo vawng hlak.

³⁵Chuongchun, i sûnga var um chu inthim a lo ni el râwm, fîmkhur rawh.

³⁶Chuongchun, i taksa hi khâwlai khawm inthim lova a puma a var suok chun, khâwnvar var nasatakin a el che angin var suok a tih,” a ta.

³⁷Chun, a hril laiin, Pharisai pakhatin ama chu a kuoma bu fa dingin a fiel a; chuongchun, a lût a, buthlêng chu a awt a.

³⁸Chun, Pharisai chun bu fâk hmaa a kut a sâwp naw chu a hmuin mak a ti hle a.

³⁹Chun, Lalpa chun a kuomah, “Nangni Pharisaihaiin no le thlêng puo tieng chu in sâwp fai hlak luo a; in sûng tieng ruok chu hlêprûkna le suolin a sip si a.

⁴⁰Mi invêthai, a puo tieng siemtu chun a sûng tieng khawm a siem naw am a nih?

⁴¹Nisienlakhawm, a sûnga thil um chu mi rimsihai kuoma pêk dingin hmang ro; chuongchun, ngai ro, in ta dingin iengkim ân thieng tah a nih.

⁴²“Nangni Pharisaihai, in chung a rik ie! Pudina dâm, pardi dâm, thlai tinrêng dâm sâwma pakhat in pêk hlak a, felna le Pathien hmangaina chu in ngaitha hlak si a. Nisienlakhawm, chuong chu a nih in sawnnaw in thaw ding chu, a danghai chu thaw ṭhul chuong lovin.

⁴³Nangni Pharisaihai in chung a rik ie! Inkhâwmna ina ṭhungpha ṭhatak le dâwrhmuna chibai bûkhai in ngaina si hlak a.

⁴⁴In chung a rik ie! Thlân ti inhriet lo, a chunga hre lova mi an fe hlakna ang chu in nih,” a ta.

⁴⁵Chun, Dânhretu pakhatin a kuomah, “Inchûktirtu, hieng thu i hril hi keini khawm mi hal i ni hi,” a ta, a dawn a.

⁴⁶Ama chun, “Dân hretuhai, nangni khawm in chung a rik ie! Thil phur rinumtakhai mihai in bel hlak a, nangni chun phurhai chu in kutpâr pakhat khawmin in them ngai si nawh.

⁴⁷In chung a rik ie! Zâwlneihai thlân inhai in bâwl hlak a, in thlatuhai ithat an ni si a.

⁴⁸Chuongchun, in thlatuhai thilthawhai chu in hrietpuiin in remtipui a nih; annîn an that a, nangnîn an thlân inhai in bâwl si a.

⁴⁹Chuleiin, Pathien varna khawm- in, ‘An kuomah zâwlneihai le tirkohai tir ka ta, a ṭhen that an ta, a ṭhen suknawmnâng an tih;

⁵⁰zâwlnei po po thisen, leilung insieng tîra inthawka kha tulai ruoltharhai chunga phuba lâk a ni theina dingin.

⁵¹Abel thisen suoka inthawk, Zakaria maichâm le biekin inkâra thi, thisen suok chena mi kha.’ Anih, ka hril cheu hi, tulai ruoltharhai chunga hin phuba lâng an tih.

⁵²Nangni Dân hretuhai, in chung a rik ie! Varna chabi chu in fe hmangpui a; nangni hlak in lût nuom si naw a, mi lût ding hlak in khap si a,” a ta.

⁵³Chun, chutaka inthawka a suok chun, Dân inchûktirtuhai le Pharisaihai chun an tai ta rân a, thu tinrêng an inhriltir a;

⁵⁴a ṭawng suol hlaua man tumin an inchân zing a.