Read Hmar LUKA 12 Bible Online

LUKA 12 - Hmar bible

LUKA 12

¹Chu sûnga mipui sâng tamtak insir nuk nuk khawp hiel an hung inkhâwm chun, Isûn a hmasatakin a închûktirhai kuomah, “Pharisaihai chawl, vervêknaa inthawk chun fîmkhur ro.

²Inlang lo dinga thuphmang iengkhawm a um si nawh; hriet lo dinga ip iengkhawm a um bawk nawh.

³Chuleiin, inthima in hril taphawt kha varah la hrieng an tih; pindan sûngrila, na bula in thu hril kha in chunga chuongin la khêkpui an tih.

⁴Chun, ka ruolhai, ka hril cheu hi, taksa sukhluma, chu hnunga iengkhawm thaw nâwk thei ta nawhai chu ṭi naw ro.

⁵Amiruokchu, tû am in ṭi ding hril lâwk ka ti cheu; a sukhlum hnung khawma Hremhmuna pei theina thuneitu chu ṭi ro; anih, ka hril cheu hi, ama mawl chu ṭi ro.

⁶Chawngzawng panga dâr tangka pahniin an zawr hlak a ni naw am a nih? nisienlakhawm, anni laia pakhat khawm Pathienin ân hmai ngai si nawh.

⁷In samzai chen hin tiem vawng a nih in sawnnaw. Ṭi naw ro; chawngzawng tamtak nêk chun in hlu lem a nih.

⁸“Chun, ka hril cheu hi, mihai hmaa a mi ṭan taphawt chu Pathien vântirkohai hmaah Mihriem Naupa hin ṭan vêng a tih.

⁹Nisienlakhawm, mihai hmaa mîn phat chu Pathien vântirkohai hmaah inphat ni vêng a tih.

¹⁰Chun, Mihriem Naupa sawisêl chu a sawisêlna chu ngaidam nîng a tih; Thlarau Inthieng meu hrilse ruok chu a hrilsietna chu ngaidam ni naw nih.

¹¹“Chun, inkhâwmna ina mihai, lalhai, hotuhai hmaa an ṭhuoi pha cheu chun, ‘Iengtin am, ieng thuin am dawn ka ta, ieng thu am hril ka ta,’ tiin lungkham naw ro,

¹²chu pha taka chun, ieng am in hril ding ti Thlarau Inthieng chun hril a ti cheu,” a ta.

¹³Mipui laia mi tuin amanih Isu kuomah, “Inchûktirtu, ka u kuomah ro mi sem ve dingin hril rawh,” a ta.

¹⁴Nisienlakhawm, ama chun a kuomah, “Mihriem, nangni chungah tûin am rorêltu le, sum semtuah a mi siem a?” a ta.

¹⁵Chun, an kuomah, “Fimkhur unla, inhnarna hrim hrima inthawk chun invêng ro, sum hau hi mihriem dam san a ni nawh,” a ta.

¹⁶Chun, an kuomah tekhithu a hril a, “Mi hausa tû amanih a lohma a hung hlâwk bêk bêk a.

¹⁷Chuongchun, ân ngaituo a, ‘Iengtin am thâwng ka ti aw? ka bu le bâl sie khâwmna ka nei si naw a,’ a ta.

¹⁸Chun, ‘Hieng hin thâwng ka tih; ka bu inhai ṭhiek ka ta, a nêka lienin bâwl ka tih; chutaka chun ka bu le ka sum po po sie khâwm ka tih.

¹⁹Chun, ka thlarau kuomah, Thlarau, kum tamtak sûnga dingin sum tamtak în khâwl hi; châwl la, fain dâwn rawh, tîng ka tih,’ a ta.

²⁰Nisienlakhawm, Pathienin a kuomah, ‘Invêt, vawizân hin i thlarau an hni ding che a nih; i thil suksuokhai kha tû ta am ni tâng a ta le?’ ” a ta.

²¹“Mâni ta dinga sum inkhâwl a, Pathien tienga hau si naw chu, chuong ang chu a ni hlak,” a ta.

²²Chun, a inchûktirhai kuomah, “Chuleiin, ka hril cheu hi, ‘Ieng am fâng ka ta aw?’ tiin in hringna thu le, ‘Ieng am silin bil ka ta aw?’ tiin in taksa thu lungkham naw ro.

²³Fâk ding nêkin hringna a thupui lem a nih, silfên nêk khawmin taksa a thupui lem a nih.

²⁴Vaâkhai hi ngaituo ro, bu an tu ngai nawh, an sîk ngai nawh, bupanghai, bu inhai khawm an nei nawh; nisienlakhawm, Pathienin a châwm si a; nangni chu vatehai nêk chun in hlut lemzie chu.

²⁵Chun, nangni lai lungkham leiin tûin am mâni dung[15] tieng tawng khata suksâng chuong thei um cheu?

²⁶Hi el khawm hi thaw thei lo cheu a, iengdinga thil dang in lungkham am a na?

²⁷“Tûktinpâr inṭhangzie hi ngaituo ro; sin an thaw nawh, pat khawm an kher ngai nawh; nisienlakhawm, ka hril cheu hi, Solomon meu khawm a ropuina po poa ân thuom khan, hieng tûktinpâr pakhat tluk khawm hin cheiin a um nawh.

²⁸Chuongchun, ram sâwlhna vawisûn anga hring, a zînga thuka ti nâwk el ding hman, Pathienin chuong ang lâwma a chei chun, aw, nangni ringna tlâwmhai, chuonghai nêk chun silfên a va pêk âwm cheu de e!

²⁹“Chun, in fâk dinghai, in dâwn dinghai zawng naw ro; lungâwpinkaiin um bawk naw ro.

³⁰Khawvêla hnam po poin chuong po po chu an zawng hlak, chuong chu in mamaw ti in Pa vâna miin a hriet zing si a.

³¹Ama ram zawng lem ro, chuongchun, chuong thil khawm chu a pêk sa ding cheu a nih.

³²“Pâwl tlâwmhai, ṭi naw ro; ram pêk cheu hi in Pa lâwm zâwng tak a nih.

³³In nei taphawt chu zawr unla, pasiehai kuomah pe ro; vânah rukru fe nawnaah, hângthim fâk siet nawnaa chun, tangka ip hlui thei nawhai, ro inhmang thei nawhai, inkhâwl ro.

³⁴In ro umna taphawtah in lungril khawm a um ding a ni si a.

³⁵“Dier kei zingin, in khâwnvar khawm chawk zingin um ro;

³⁶miin an pu, inneina ruoiṭhe fa a hung phaa kawtkhâr a hung nawk phaa lo hawngpêk thei nghâl dinga an lo nghâk zing ang hin um ro.

³⁷An pu a hung phaa suok lo nghâk zinga a hmu dinghai chu an hamṭha. Titakzetin ka hril cheu hi, ama chun a dier hung kei a ta, anni chu thlaithlêng awtin inṭhungtir a ta, an rawng hung bâwlpêk a tih.

³⁸Zân rila manih, tho phain amanih a hung a, chuong anga a hung hmu chun, chuong suokhai chu hamṭhâng an tih.

³⁹Amiruokchu, hi hi hre ro, inru a hung ding hun in neitu chun hre sienla, vêng a ta, a in inverpawptir naw ni.

⁴⁰Nangni khawm inring zingin um ro, in ring naw hunah Mihriem Naupa chu a hung ding a ni si a,” a ta.

⁴¹Chun, Peterin a kuomah, “Lalpa, hi tekhithu hi keini chau am a nih i mi hril, mi po po?” a ta.

⁴²Chun, Lalpain, “Sum enkawltu ringum, var tak, a puin a hun poa an bu chan ding sempêk dingin a sûnghai chunga hotua a siem ding chu tû tak am nîng a ta?

⁴³A pu a hung phaleh suok chuong anga thawa a hung hmu ding chu a hamṭha.

⁴⁴Indiktakin ka hril cheu hi, a nei po po chunga hotuah siem a tih.

⁴⁵Amiruokchu, chu suok chun, a lungrilin ‘Ka pu hung vak naw ni,’ tiin suoknuhai, suokpahai lo vaw sienla, fain dâwnin lo inrui ta sienla;

⁴⁶chu suok pu chu a ring naw niah, a hriet naw kâr hung a ta, bawng hni hung insuong a ta, mi ringum nawhai chan ang hung inchangtir a tih.

⁴⁷Suok a pu dit zâwng hre zing sia, lo inring lova, a pu dit zâwng ang khawma thaw lo chu, vawi tamtak vuong an tih.

⁴⁸Amiruokchu, hriet naw leia vuokna khawp thil thaw chu, vawi tlâwmtê vuong an tih. Tûkhawm tamtak an ipêk kuoma chun tamtak phût an tih; tûkhawm tamtak an inkawltir kuoma chun tam deu phût an tih.

⁴⁹“Khawvêlah mei thlâk thla dinga hung ka nih; tu khawm hin kâng nghâl ta sien ka va ti de!

⁵⁰Nisienlakhawm, baptisma chang ding ka nei, chu chu tleitlâk hmakhat chu ka chung a va rik de aw!

⁵¹Khawvêlah inremna inlêngtir dinga hung in mi sâwn am a nih? Teu lo e, ka hril cheu hi, indo inlêngtir dinga hung ka ni lem a nih;

⁵²tuta hnung chu sûngkhata mi panga indo an tih, pathumin pahni, pahniin pathum.

⁵³Pain a naupa, naupain a pa, a nuin a naunu, a naunu chun a nu; a piin mo, moin a pi, do a tih,” a ta.

⁵⁴Chun, mipui kuoma khawm chun, “Thlang tienga sûm suok in hmu chun ‘Ruo a sûr ding a nih,’ in ti nghâl hlak a, chun, a hung ni ngei hlak.

⁵⁵Chun, sim thli hrâng in hriet chun, ‘Khuo a sa ding a nih,’ in ti hlak a; chun, a hung ni ngei hlak.

⁵⁶Nangni vervêkhai, khawvêl le vân umzie khawm in hriet fie thei si a, iengdinga tulai thil in hriet fie thei naw am a na?

⁵⁷“Iengdinga nangnîn a fel chu in ngaituo naw am a na?

⁵⁸Rorêltu hmaa i khingpui leh i fe pha, fe malamin amaa inthawka fihlîmna mawl zawng rawh; chuong naw chun rorêltu hmaah ṭhuoi ṭâl a ti che a, rorêltu chun mi man hotu inmantir a ti che a, mi man hotu chun intângna inah khum hlau rawi a ti che.

⁵⁹Ka hril cheu hi, dâr tangka dere[16] hlek chen khawma i tlâk kim hmakhat chu, chutaka inthawk chu suok naw tawp in tih,” a ta.