Read Hmar LUKA 13 Bible Online

LUKA 13 - Hmar bible

LUKA 13

¹Chun, chulai tak chun, tuhai amanih an lo um a, chuonghai chun an inthawina thisen chu Galili mihai thisen leh Pilatin a chawkpawl thu chu Isu an hung hril a.

²Chun, ama chun a kuomah, “Chu Galili rama mihai chu, chuong ang thil an tuor lei chun Galili rama mi danghai po po nêkin suol bîkah in ngai am a nih?

³Ni lo e, ka hril cheu hi, nangni khawm in sim naw chun, chuong ang bawk chun bohmang vawng in tih.

⁴Chun, Siloam in insângin mi sâwm le pariet a del hlumhai khawm kha, Jerusalema um po po nêkin mi suol bîk ni dingin in ring am a nih?

⁵Ni lo e, ka hril cheu hi, nangni khawm in sim naw chun, chuong ang bawk chun bohmang vawng in tih,” a ta, a dawn a.

⁶Chun, hi tekhithu hi a hril a, “Tûin amanih a grêp huonah theichang phun pakhat a nei a; chun, a kûnga chun a ra a hung zawng a, pakhat khawm a hmu naw a.

⁷Chuongchun, grêp huon enkawltu kuomah, ‘Ngai rawh, kum thum sûng hin hi theichang kûnga hin a ra ka zawng hlak a, pakhat khawm ka hmu si nawh; phûr rawh; iengdinga hmun hluo saka a um zing am a na?’ a ta.

⁸Chun, ama chun a kuomah, ‘Pu, tu kum bêk hi um sienla, a vêlin cho ka ta, êkin vur phawt ka tih;

⁹chun a hung ra chun ṭhâng a ta, a ra naw ruok chun phûr el rawh,’ a ti a,” a ta.

¹⁰Chun, Châwlni chun ama chun inkhâwmna in pakhatah ân chûktir a.

¹¹Chun, ngai ta, kum sâwmpariet hrâtnawna khawhri iman nuhmei pakhat a um a; ama chu a kûn zing a, a khât chun a ngîr tlûn thei naw a.

¹²Chun, Isûn a hmu phingleh a ko a, a kuomah, “Nuhmei, i hrât nawna chun ân thla ta che,” a ta.

¹³Chun, a chungah a kut ân nghat a; chuongchun, kârlovin a ngîr tlûn nghâl ta a, Pathien ân pâk ta a.

¹⁴Chun, Isûn Châwlniin mi a sukdam leiin inkhâwmna in hotu chu a lunginsen a, mipui chu a biek a, an kuomah, “Mihriem sinthawna ding ni ruk a um annâwm; chu sûng chun hung unla, insukdam ro; Châwlnia hung lovin,” a ta.

¹⁵Lalpa ruok chun a kuomah, “Nangni vervêkhai, Châwlniin mâni sebâwng amanih, sabengtung amanih a bu fâknaa inthawka sûtin, tui dâwn dingin in ṭhuoi dawk seng hlak a ni naw am a nih?

¹⁶Hi nuhmei, Abraham naunu, Setanin kum sâwmpariet a khuop hi, Châwlni khawmin hi khuopna hi hang sûtpêk naw ziezâng am a nih?” a ta, a dawn a.

¹⁷Chuong thuhai chu a hril laiin a hmêlmahai po po chu an inzak ta a; mipui ruok chu a thil ropui thaw po po leiin an lâwm vawng a.

¹⁸Chuongchun, ama chun, “Pathien ram chu iengang am a na? Ieng le hin am hrilkhîng ka ta?

¹⁹Anṭam chi mal khat miin a lâk a, huona a the ang chu a nih; chu chu a hung mâwng a, thing a hung na, chunga vatehai chu a zârahai chun an riek a,” a ta.

²⁰Chun, “Pathien ram chu ieng lêm hrilkhîng ka ta?” a ti nâwk a.

²¹“Chawl nuhmeiin a lâk a, beiphit tekhâwng thum laia a rênga a tho vawng chena a phûm ang chu a nih,” a ta.

²²Chun, ama chun inchûktir pei puma, Jerusalem tieng panin, khaw lien le khaw chînhai a sir pei a.

²³Chun, tûin amanih a kuomah, “Sandamhai chu tlâwmterek am an nih?” a ta.

²⁴Chun, ama chun an kuomah, “Kawtkhâr chîna chun lût tum hrâm ro; ka hril cheu hi, mi tamtakin lût tum an ta, lût thei si naw ni hai.

²⁵In neitu chu a tho a, kawt a khâr hnung chun, nangnîn tuola ngîrin, ‘Lalpa, kawt mi hawngpêk rawh,’ tia kawtkhâr in hung nawk pha, ama chun, ‘Khâwtieng mi am in na, ka hriet naw cheu,’ tiin dawn a ti cheu.

²⁶Chu pha chun nangnîn, ‘I hmuah kan fâkin kan dâwn ta hlak kha, kan kawtthlêrahai khawm în chûktir hlak kha,’ la tîng in tih.

²⁷Chun, ama chun, ‘Ka hril cheu hi, khâwtienga mi am in ni ka hriet nawh; nangni thil suol thaw po pohai, mi fe hmang san vawng ro,’ la tîng a tih.

²⁸“Abraham hai, Isak hai, Jakob hai, zâwlnei po pohai chu Pathien ram sûnga um in hmua, nangni tuola hnawt suok in ni in inhriet pha, chutaka chun ṭap le harâwt chu um a tih.

²⁹Chun, sak le thlang, sim le hmâra inthawkin hung an ta, Pathien ramah hung ṭhung an tih.

³⁰Chun, ngai ta u, a nuhnungtakhai khawm a hmasataka um ding an um a, a hmasatakhai khawm, a nuhnungtaka um ding an um,” a ta.

³¹Chuonglai tak chun Pharisai tuhai amanih an hung a, a kuomah, “Suok la, hitaka inthawkin fe hmang rawh; Herodin sukhlum che a nuom bêk bêk a nih,” an ta.

³²Chun, ama chun an kuomah, “Chu sihal kuoma chun hi thu hi va hril ro, ‘Ngai rawh, vawisûn le zîngah khawhrihai hnawt dawk ka ta, damnawhai khawm sukdam ka ta, a zîngnâwk zo ka tih.’

³³Ieng khawm ni raw se, vawisûn leh, zînga leh, a zîngnâwk leh ka fe pei ding a nih; Jerusalem khaw puo tieng zâwlnei thi thei a ni naw ie,” a ta.

³⁴“Aw Jerusalem, Jerusalem! zâwlneihai thattu, i kuoma an hung tirhai lunga lo dêng hlumtu; ârpuiin a têhai a thla hnuoia a awp khâwm angin, i nauhai vawi iengzât am awp khâwm ka tum kha! Nisienlakhawm, in nuom si nawh.

³⁵En ta u, in in chu aruoka mâksanpêk cheuin a um tah. Ka hril cheu hi, ‘Lalpa hminga hung chu inpâkin um raw se,’ in ti hmakhat chun, mi hmu nâwk ta naw ti niu,” a ta.