Read Hmar LUKA 15 Bible Online

LUKA 15 - Hmar bible

LUKA 15

¹Chun, siedâwltuhai le mi suolhai po poin a thu hre dingin a kuom an hung pan a.

²Chun, Pharisaihai le Dân inchûktirtuhai chun, “Hi mipa hin mi suolhai a pâwl a, an kuoma hai bu a fâk ve hlak,” tiin an chier ve ve a.

³Chuongchun, ama chun an kuomah hi tekhithu hi a hril a;

⁴“Nangni lai tûkhawmin berâm za nei sienla, an laia pakhat inhmang ang sienla, thlalêrah sâwmkuo le pakuohai chu mâksanin ân hmang chu a hmu nâwk hmakhat tûin am zawng nâwng a ta?

⁵Chun, a hmu nâwk chun, lâwmtakin a liengkoah a put hlak.

⁶Chun, in a tlung phingleh a ruolhai le a vênghai a ko khâwm a, an kuomah, ‘Mi lâwmpui ro, ka berâm inhmang kha ka hmu nâwk tah ie,’ a ti hlak.

⁷Ka hril cheu hi, chuong ang bawk chun, mi fel sâwmkuo le pakuo sim chuong ding nei nawhai chunga nêkin mi suol pakhat sim chunga hin vânah lâwmna um lem a tih.

⁸“Chun, nuhmei tûkhawm duli[17] sâwm neiin pakhat inhmang ang sienla, khâwnvar insita, in phîtin, a hmu nâwk hmakhat chu nguntakin tûin am zawng nâwng a ta?

⁹Chun, a hmu nâwk chun, a ruolhai le a vênghai a ko khâwm a, ‘Mi lâwmpui ro, ka duli[18] inhmang kha ka hmu nâwk tah,’ a ti hlak.

¹⁰Ka hril cheu hi, chuong ang bawkin, mi suol pakhat sim chunga hin Pathien vântirkohai an lâwm hlak a nih.

¹¹“Mi tûin amanih naupasal pahni a nei a;

¹²chun, a naupang lem chun a pa kuomah, ‘Pa, ro ka chanâi mi pe rawh,’ a ta. Chuongchun, a sum chu an kuomah a sem ta a.

¹³Chun, ni sâwt nawtê hnunga chun a naupa naupang lem chun a chanâi po po chu a lâk khâwm vawng a, khaw ram hlatakah a fe ta a, chutaka chun inhawi taluoin a um a, a sum chu a sukthâm ta mei mei a.

¹⁴Chun, a sukthâm vawng phingleh, chu khuoa chun ṭâm nasatak a hung tla a; fâk ding a hung tlasam ta a.

¹⁵Chuongchun, chu ram mi, mi pakhat a va bêl a; chu mipa chun vawk bu pe dingin a lo tieng a tir a.

¹⁶Chun, iengkhat kâwm vawkin an fâkhai chun insukkhawp a nuom bêk bêk a; tukhawmin iengkhawm an pêk si nawh.

¹⁷“Chun, ân hriet suok phingleh, ‘Ka pa kuoma inhlâwfahai bu fâk sêng lova nei an tam vei leh, kei hlak chu hitaka hin phîngṭâmin ka thi ding a ni si a!

¹⁸Tho ka ta, ka pa kuomah fêng ka ta, Pa, vâna mi chunga le nanga mithmuin thil ka suksuol a.

¹⁹I naupaa înbûk tlâk khawm ka ni ta nawh; i kuoma inhlâwfa pakhat angin mi siem ve rawh, tîng ka tih,’ a ta.

²⁰“Chuongchun, a tho a, a pa kuomah a fe ta a. Chuongchun, hlataka a la um laiin a pain a lo hmu a, a lunginsiet bêk bêk a, a tlân a, a kuo a, a fâwp ta ngâwi ngâwi a.

²¹Chun, a kuomah a naupa chun, ‘Pa, vâna mi chungah le nanga mithmuin thil ka suksuol a; i naupaa inbûk tlâk ka ni ta nawh,’ a ta.

²²Nisienlakhawm, a pa chun a suokhai kuomah, ‘Zakawfuol a ṭhatak kha hung la vat unla, inhâktir ro; a kutah kutsebi inbuntir unla, a keah kekawk inbuntir ro;

²³sebâwngte thâu tak kha hung la unla, that ro, hlimtakin fâng ei tiu;

²⁴hi ka naupa hi a thi a, a hung hring nâwk tah a ni hi; ân hmang a, ei hmu nâwk tah a ni hi,’ a ta. Chuongchun, hlimtakin an um ṭan ta a.

²⁵“Chun, a naupa upa lem chu loah a um a; chun, in a hung tlung tâwm chun iengkhat mûtrîk le lâm ri a hriet ta a.

²⁶Chuongchun, siehlaw pakhat a ko a, ‘Chu ieng am a ni ta leh?’ tiin ân dawn a.

²⁷Chun, ama chun a kuomah, ‘I sang a hung a, himtaka a hmu nâwk leiin i pain sebâwngtê thâutak kha a that a nih,’ a ta.

²⁸Chun, a lunginsen a, a lût nuom ta naw a; chun, a pa a hung suok a, a thlêm a.

²⁹Nisienlakhawm, ama chun a pa kuomah, ‘Ngai rawh, kum hieng chen hi i rawng ka bâwlpêk che a, i thu hlak hi ka awi naw ngai si naw a, ka ruolhai le hlimna ka siemna dingin kêltê khawm i mi pêk ngai si nawh.

³⁰Nisienlakhawm, hi i naupa nawchizawrhai kâwla i sum fa zo vawngtu hi a hung phingleh ama ta dingin sebâwngtê thâutak kha i lo thatpêk vei a,’ a ta, a dawn a.

³¹Chun, ama chun a kuomah, ‘Ka naupa, ka kuoma um zing i nih annâwm; ka nei po po hi i ta a nih.

³²Hlimtak le lâwmtaka um ding a ni hrim annâwm; hi i sang hi a thi a, a hung hring nâwk ta a; ân hmang a, ei hmu nâwk tah a ni si a,’ a ti a,” a ta.