Read Hmar LUKA 16 Bible Online

LUKA 16 - Hmar bible

LUKA 16

¹Chun, Isûn a inchûktirhai kuomah hi thu khawm hi a hril a; “Mi hausa tuin amanih sum enkawltu a nei a; chu pa chun a sum a sukthâmpêk mei mei chungah a kuomah an hêk a.

²Chuongchun, ama chu a ko a, a kuomah, ‘I chungchâng thu ka hriet hi iengtizie am a na? I sum enkawl chanchin hung ziek vawng rawh; tuta hnung chu sum enkawltu hin ṭhang thei ta naw ti ni,’ a ta.

³“Chun, sum enkawltu chun, a lungrilin, ‘Ka puin ka sum enkawl a mi bân ding hi iengtin am thâw tâng ka ti aw? hnuoi cho ka pei si naw a, kut daw hlak chu kân zak si a.

⁴Sum enkawl a mi bân phaa mîn an ina an mîn umtirna dingin ka thaw dân ding ka hriet tah,’ a ta.

⁵Chuongchun, a pu sum battuhai chu a ko seng a, a hmasatak kuoma chun, ‘Ka pu kuomah iengzât am i bat a?’ a ta.

⁶Ama chun, ‘Hriek tekhâwng za khat,’ a ta. Chun, ama chun a kuomah, ‘I lekha la la, ṭhung vat la, sâwmnga ziek rawh,’ a ta.

⁷Chun, mi dang kuomah, ‘Nang iengzât am i bat a?’ a ta. Ama chun, ‘Bu tekhâwng za khat,’ a ta. Chun, ama chun a kuomah, ‘I lekha la la, sâwmriet ziek rawh,’ a ta.

⁸Chun, a pu chun, sum enkawltu fel naw chu a rem hriet leiin ân pâk ta a; var nauhai nêkin khawvêl nauhai hi an tulai dâna hin an var lem a nih.

⁹“Ka hril cheu hi, sum tehlêmin in ta dingin ruolhai siem ro; sum a bohmang pha leh chatuona umnaa chun inumtira in umna dingin.

¹⁰Tukhawm tlâwmte chunga ringum chu tamtak chunga khawm ring a um hlak. Tukhawm, tlâwmte chunga ringum naw chu tamtak chunga khawm ring a um nawh.

¹¹Sum tehlêm chunga hman ring in um naw chun, tûin am sum tak chu inkawltir a ti cheu a?

¹²Mi dang ta chunga hman ring in lo um ta naw chun, nangni ta ding chu tûin am pêng an ti cheu a?

¹³Siehlaw tukhawmin hotu pahni rawng a bâwl kawp thei nawh; pakhat chu theidain pakhat chu dit a tih, annawleh, pakhat ṭanin pakhat hmusit a tih. Pathien le sum rawng in bâwl kawp thei nawh,” a ta.

¹⁴Chun, Pharisai tangka ngainatuhai chun chuong thu chu an hriet a, an nuisan a.

¹⁵Chuongchun, ama chun an kuomah, “Mi mithmua insukfel el in nih, nisienlakhawm, Pathienin in lungril a hriet si a; mihriem laia an ichawimawi chu Pathien mithmua chun tirdakumtak a nih.

¹⁶Johan a hung hma po khan Dân le Zâwlneihai kha hmang an nih. A hung chena inthawk ruok chun Pathien ram chanchin ṭha hril a ni a, mitinin lût ngei an tum seng a,

¹⁷nisienlakhawm, Dân thu sunhâng chîterek khawm a bo nêk chun vân le khawvêl bohmang awl lem a tih.

¹⁸“Tûkhawm a nuhmei maa, nuhmei dang nei taphawt chu a uire a nih; tûkhawm mi nuhmei mâk nei taphawt chu a uire a nih.

¹⁹“Chun, mi hausa tû amanih a um a, puon senduk le puon zai inhmitak a sil a, ni tin inhawitirtakin a um hlak a.

²⁰Chun, a hming Lazar, kutdaw pakhat pânna ibâwm sip, a kawtkhâr bulah an inzâltir hlak a,

²¹mi hausa dawkâna a fâk nawi tla chu fâk a nuom a; uihai hlak chun a pânna chu an liekpêk hlak a.

²²Chun, hieng ang hi a na, kutdaw chu a thi a, vântirkohaiin an fepui a, Abraham ângsûngah an sie a. Mi hausa khawm chu a thi a, phûmin a um ta a.

²³Chun, mithi khuoa chun natak tuorin a um a, a hang dâk a, hlataka Abraham, a ângsûnga Lazar um leh a hmu ta a.

²⁴Chun, a khêk a, ‘Pa Abraham, mi lunginsiet la, Lazar kha hung tir rawh, a kutpâr tuiah inchie sienla; ka lei sukdeina dingin; hi meichawka hin ka na bêk bêk el,’ a ta.

²⁵“Nisienlakhawm, Abrahamin, ‘Ka naupa, i dam lai khan thil ṭha i hmu a, chuong ang bawkin Lazarin thil ṭha naw a hmu kha hre zing ta la; nisienlakhawm, ama chu tuhin hitaka hin thlamuongtakin a um a, nang chu i na a ni kha.

²⁶Hieng naw khawm hi, hitaka inthawka nangni kuoma fe tumhai chu an fe thei nawna dingin le, tukhawm khataka inthawka keini kuom tieng an hung kai thei nawna dingin, keini le nangni inkâra hin hnuoi kak nasatak an siem tlat a nih,’ a ta.

²⁷“Chun, ama chun, ‘Anleh, pa, ama chu ka pa ina bêk infetir dingin ka ngên che;

²⁸piengpui pasal panga ka nei si a; hi na umnaa hin hung ve rawi an tih, ṭhahnemngaitakin hril raw se,’ a ta.

²⁹Abraham ruok chun, ‘Mosie le zâwlneihai an nei annâwm; chuhai thu chu ngai raw hai se,’ a ta.

³⁰Chun, ama chun, ‘Pa Abraham, ni lo e, mithi laia mi meu an kuomah fe sienla, sim an tih,’ a ta.

³¹Chun, ama chun a kuomah, ‘Mosie le zâwlneihai thu an awi naw chun, mithi laia mi tho nâwk sienla khawm awi chuong naw ni hai,’ a ti a,” a ta.