Read Hmar LUKA 18 Bible Online

LUKA 18 - Hmar bible

LUKA 18

¹Chun, beidawng lovin an ṭawngṭai rawp ding a nih ti, inhriettirna dingin an kuomah tekhithu a hril a;

²“Khaw ienga manih rorêltu pakhat a um a; ama chun Pathien a ṭi naw a, mihriem hlak a ngaisak bawk nawh.

³Chun, chu khuoa chun hmeithai pakhat a um a; ama chun, ‘Ka khingpui chungah ka phuba mi lapêk rawh,’ tiin a kuomah a fê rawp a.

⁴Chun, ama chu sâwt rei chu a nuom naw a; nisienlakhawm, nakie chun a lungrilin, ‘Pathien ṭi lovin mihriem ngaisak naw lang khawm,

⁵hi hmeithai hin a mi sukbuoi leiin a phuba chu lapêk el ka tih; chuong naw chun, a hung rawp hin mi la suksâwl zêk rawi a tih,’ a ti a,” a ta.

⁶Chun, Lalpa bawkin, “Rorêltu fel naw thu hril chu hre ro.

⁷An chungah zai la daw hri sien khawm, a mi thlang, asûn azâna ama kotuhai phuba chu Pathienin a lâkpêk naw ding am a nih?

⁸Ka hril cheu hi, an phuba chu lapêk vak a tih. Nisienlakhawm, Mihriem Naupa hi a hung pha chun khawvêlah ringna a hung hmu ding am a nih?” a ta.

⁹Chun, mi feltak ni inringa, mi dang po po hmusit hlak, tuhai amani kuoma khawm chun hi tekhithu hi a hril a:

¹⁰“Mi pahni Pathien biekinah ṭawngṭai dingin an hang fe a; pakhat chu Pharisai a na, pakhat chu siedâwltu a nih.

¹¹Pharisai chu a ngîr a, ama khât chauin hieng ang hin a ṭawngṭai a, ‘Pathien, mi dang hlêpruhai, fel nawhai, uirehai ang ka ni naw lei le, hi siedâwltu ang khawm hi ka ni naw leiin i chungah ka lâwm ie.

¹²Châwlkâr khatah vawi hni bu ka nghei hlak a; ka nei taphawt sâwmah pakhat ka pêk hlak,’ a ta.

¹³Siedâwltu ruok chu hlatakah a ngîr a, vân tieng khawm a dâk ngam naw a, ‘Pathien, kei mi suol hi mi lunginsiet rawh,’ tiin a âwm ân chum ân chum ta lem a.

¹⁴Ka hril cheu hi, a hmasa nêkin ama lem chu thiem changin a inah a fe thla ta lem a. Inngaihlu taphawt tlâwm an ta, inngaitlâwm taphawt chu chawimawiin um an tih,” a ta.

¹⁵Chun, a them dingin a kuomah an nautêhai an hung ṭhuoi a; inchûktirhai ruok chun chu chu an hmu phingleh an lo hal a.

¹⁶Nisienlakhawm, Isu chun a ko a, “Naupangtêhai ka kuomah inhungtir unla, khap naw ro; Pathien ram chu hieng ang mihai ta a ni si a.

¹⁷Titakzetin ka hril cheu hi, tûkhawm Pathien ram chu naupangtêin a lâwm anga lâwm naw phawt chu a sûngah lût naw tawp an tih,” a ta.

¹⁸Chun, hotu tûin amanih a kuomah, “Inchûktirtu ṭha, chatuona hringna ka nei theina dingin ieng am thâwng ka ta?” a ta.

¹⁹Chun, Isûn a kuomah, “Iengdinga ṭha i mi ti? mi pakhat chau naw chu tûkhawm ṭha an um nawh, chu chu Pathien a nih.

²⁰Thupêkhai chu i hriet annâwm ‘Uire naw, tuol that naw, inru naw, hrietpuina inkhêl pe naw, i nu le pa chawimawi rawh,’ tihai hi,” a ta.

²¹Chun, ama chun, “Chuong thu po po chu naupangte ka ni laia inthawkin ka zâwm pei hlak,” a ta.

²²Chun, Isûn chu chu a hrietin a kuomah, “Tu khawm hin kawng khat i la bâk ie; i nei po po zawr la, pasiehai kuomah sem rawh, chuongchun, vânah ro nei i tih; chun, hung la, mi hung zui rawh,” a ta.

²³Ama ruok chu chuong thu chu a hrietin a lungngai bêk bêk a, a hausak bêk leiin.

²⁴Chuongchun, Isûn ama chu a en a, “Sum hauhai chu Pathien rama lût a vân tak âwm de aw!

²⁵Mi hausa Pathien rama lût nêkin sanghâwngsei ṭhimnaah lût thleng a awl lem a nih,” a ta.

²⁶Chun, chu thu hrehai chun, “Anleh, tu am sandam ni thei a ta?” an ta.

²⁷Ama ruok chun, “Mihriem thaw ruollo hi Pathien thaw thei a nih,” a ta.

²⁸Chun, Peterin, “Ngai ta, keinîn kan in le lo mâksanin kan zui che a!” a ta.

²⁹Chun, ama chun an kuomah, “Titakzetin ka hril cheu hi, tûkhawm Pathien ram leia in amanih, nuhmei amanih, unauhai amanih, nu le pa amanih, nauhai amanih mâksan taphawt chu,

³⁰hi dam sûng ngei khawm hin a nêka tam lem hmu naw ding tûkhawm an um nawh, hun la hung tlung dinga chatuona hringna leh,” a ta.

³¹Chun, sâwm le pahnihai chu a kuomah a tumin a ṭhuoi a, an kuomah, “ngai ta u, Jerusalemah ei hang fe ding a ni hi; zâwlneihai thu ziek po po kha Mihriem Naupa chunga hin tlung a tih.

³²Jentailhai kuomah pêng an ta, nuiza siemna dingin hmang an tih, inzakumtakin siem an ta, chil sâkkhum an ta,

³³chun, vuong an ta, sukhlum an tih; chun, ni thum niin tho nâwk a tih,” a ta.

³⁴Chun, chuong thu hrim hrim chu a ngaina an hriet naw a; a thu hril chu anni ta dingin thupin a um a, ieng hril am a ni khawm an hriet nawh.

³⁵Chun, Jeriko a tlung tâwmin mitdel tu amanih lampui sîrah kut dawin a lo ṭhung a;

³⁶ama chun mipui fe ri chu a hriet a, iengtizie am a ni taa ti ân dawn a.

³⁷Chun, anni chun Nazareth Isu a fe a nih ti an hril a.

³⁸Chuongchun, ama chu, “Isu David naupa, mi lunginsiet rawh,” tiin a khêk a.

³⁹Chun, a hmasahai chun to dingin an hal a; nisienlakhawm, ama chu, “David Naupa, mi lunginsiet rawh,” tiin a khêk zuol det a.

⁴⁰Chuongchun, Isu a ngir a, a kuoma hung ṭhuoi dingin thu a pêk a;

⁴¹chun, a kâwl a hung tlung chun, “I chungah ieng ang am ka thaw i nuom a?” a ta, a lo indawn a. Chun, ama chun, “Lalpa, hmu thei ka nuom,” a ta.

⁴²Chun, Isûn a kuomah, “Hmu thei ta raw khai, i ringna hi i dampui a nih,” a ta.

⁴³Chun, kârlovin a hmu thei nghâl ta a, Pathien inpâk pum peiin ama chu a zui ta a; chun, mi po po chun, chu chu an hmu chun Pathien an inpâk a.