Read Hmar LUKA 2 Bible Online

LUKA 2 - Hmar bible

LUKA 2

¹Chun, Kaisar Augustain khawvêl ram po po hming ziek ding thu a pêk a.

²Chu chu Suria rama Kurini Bawrsâp a ni laia hming ziek hmasa tak chu a nih.

³Chuongchun, mi po po chu an hming ziek dingin anni khuo sengah an fe a.

⁴Josef khawm, David sûnghai le a thla a ni leiin, Galili rama Nazareth khuoa inthawka Judai rama David khuo Bethlehem an tia chun a fe a,

⁵a nuhmei huol Mari, naupai inhlâtak pum le chun an hming ziek dingin.

⁶Chun, chutaka an um lai chun a naunei chu a hung hun ta a.

⁷Chun, a nau lutîrah naupasal a nei a; puonin a tuom a, khuolbûkah an inleng ve naw leiin ran bu pêkna thlêngah ân zâltir a.

⁸Chun, chu rama ma chun berâm vêngtuhai an um a, zânah an berâmhai an vêng a, phûlah an riekngha a.

⁹Chun, Lalpa vântirko pakhat an kâwlah a hung ngîr a, Lalpa ropuinân an vêl chu a hung sun var a; chuongchun, an ṭi ta bêk bêk a.

¹⁰Chun, vântirko chun an kuomah, “Ṭi naw unla, ngai ro, mi tin ta ding chanchin ṭha lâwmum bêk bêk ka hung intlun cheu a nih.

¹¹Vawisûn hin in ta dingin David khuoah Sandamtu a pieng tah, Lal Krista chu.

¹²Chun, hi hi in ta dingin inchikna ding a nih; naute puona tuom, ran bu pêkna thlênga zâl hmûng in tih,” a ta.

¹³Chun, kârlovin vântirko kuoma chun vâna mihai mipui an hung um ta huk el a, Pathien an inpâk a,

¹⁴“A chunghnungtakah Pathien ropuitakin um raw se, hnuoi chunga a ditsak mihriemhai kuomah, inremna thu inlêng raw se.” an ti a.

¹⁵Chun, vântirkohai chun vân tieng an fe san phingleh, berâm vêngtuhai chun, “Tuhin Bethlehem chenin fêng ei ta, Lalpain thu a mi hril hung tlung chu en ei tiu,” an ti a.

¹⁶Chuongchun, an fe vat vat a, Mari le Josef leh, ran bu pêkna thlênga nautê zâl le chun an hmu a.

¹⁷Chun, an hmu chun nautê chanchin thu vântirkoin a hril kha an hril vêl a.

¹⁸Chun, a hre taphawt chun berâm vêngtuhai thu hril chu mak an ti hle a.

¹⁹Mari ruok chun thu hril po po chu a lungrilin a ngaituo a, a vawng zing a.

²⁰Chun, berâm vêngtuhai chun vântirko hril ang ngeia iengkim an hmua an hriet leiin, Pathien chawimawi le inpâk pei pumin an kîr nâwk ta a.

²¹Chun, a sertanna ding ni riet a hung tling chun, a hminga chun sula a um hma daia vântirkoin a sak tasa ISU an sak a.

²²Chun, Mosie dân anga an inthien ni a hung tlung chun ama chu Jerusalemah an hung ṭhuoi a,

²³(Lalpa Dân thua, “Nau lutîr pasal taphawt chu Lalpa ta dinga ruot tîng an tih” ti ziek ang khan),

²⁴Lalpa kuoma inhlân ding le vaṭhu tuok khat amanih, pârva tê pahni amanih Lalpa Dân thua ziek anga that dingin.

²⁵Chun, ngai ta, Jerusalema chun mi pakhat a hming Simeon a um a; ama chu mi feltak le Pathien ngaisaktak a na; Israel thlamuongtu ding chu a nghâk zing a, a chungah Thlarau Inthieng a um a.

²⁶Chun, Lalpa Krista chu a hmu hmakhat chu thi naw ni ti Thlarau Inthiengin a lo inhriettir ta hrim a.

²⁷Chun, Thlarau inhriettirin Pathien biekina chun a va lût a; nautê Isu chu a nu le a pain Dân pângngai anga a chunga thawpêk dinga an hung ṭhuoi lût lai chun,

²⁸ama chun a lo pawm a, Pathien ân pâk a;

²⁹“Lalpa, tuhin i thu ang peiin i suok hi thlamuongtakin în fetir ding a na;

³⁰I sandamna chu ka mitin a hmu ta a,

³¹Mi tin mithmua I siem kha;

³²Jentailhai kuoma suklangna var le I mi Israelhai ropuina ding chu,” a ta.

³³Chun, nautê thu a hril chu a nu le a pa chun mak an ti hle a.

³⁴Chun, Simeon chun mal a sâwmpêk a, a nu Mari kuomah, “Ngai rawh, hi naupang hi Israel lai mi tamtak tlûkna ding le ngîrsuokna dinga ruot a nih, mi isawisêl ding inchikna ni bawk dingin:

³⁵anih, nanga lungril khawm ngûnhnâmin la sun thleng a tih, mi tamtakin an lungrila an ngaituohai chu ân langna dingin,” a ta.

³⁶Chun, mi pakhat zâwlnei Anna, Phanuel naunu, Aser hnama mi a um a. Ama chu tartak a na, a nunghâk mâka inthawk a pasal leh kum sari a um a.

³⁷Kum sâwmriet pali zet hmeithaiin a um a. Ama chun Pathien biekin fesan lovin asûn azâna bu nghei dâma ṭawngṭaiin Pathien a biek hlak a.

³⁸Chun, chu lai tak chun ama chu a hung a, Pathien kuomah lâwmthu a hril a, Jerusalem intlan beiseihai taphawt kuoma chun Isu chanchin a hril a.

³⁹Chun, Lalpa dân ang peia thil po po an thaw zoin, Galili rama anni khuo Nazaretha chun an kîr nâwk ta a.

⁴⁰Chun, nautê chu a hung inṭhang lien deu deu a, a hung hrât deu deu a, varnain a sip ta a, Pathien lunginsietna a chungah a um bawk a.

⁴¹Chun, kum tinin Fekân Ruoiṭhe hunin a nu le pa chu Jerusalemah an fe hlak a.

⁴²Ama chu kum sâwmpahni a niin ruoiṭhe dân pângngaiin an hang fe a.

⁴³An ṭumṭieka an hung chun, naupang Isu chun Jerusalemah a um san ta a; a nu le pa chun an hriet si naw a.

⁴⁴An intlawnpuihai lai a um ve zing amanih an ta, ni khat lam zet an fe ta a, an laibunghai le an hmêlhriethai lai an zawng a.

⁴⁵Chun, an hmu naw leiin zawng pei pumin Jerusalemah an kîr nâwk ta a.

⁴⁶Chun, ni thum chena chun, Pathien biekinah, inchûktirtuhai laia ṭhungin, an thu lo ngai a, lo indawnin an hmu ta a.

⁴⁷Chun, a thu hre taphawt chun a hrietzie le a dawnzie chu mak an ti hle a.

⁴⁸Chun, a nu le pa chun ama an hmu chun mak an ti hle a, chuongchun, a nu chun a kuomah, “Ka nau, iengdinga hienga i mi thaw? Ngai ta, i pa le keiin thlaphângtakin kan zawng che a nih,” a ta.

⁴⁹Ama chun an kuomah, “Iengdinga in mi zawng am a na? Ka pa ina ka um ding in hriet naw am a nih?” a ta.

⁵⁰Chun, an kuoma a thu hril chu a ngaina an hriet naw a.

⁵¹Chun, anni chu a zui thlâk a, Nazareth chu a hung tlung a, an thu zâwmin a um a. Chun, a nu chun chuong thil po po chu a lungrilah a vawng zing a.

⁵²Chun, Isu chu a var deu deu a, a hung lien deu deu a, Pathien le mihriem ditsakin a um deu deu a.