Read Hmar LUKA 20 Bible Online

LUKA 20 - Hmar bible

LUKA 20

¹Chun, ni khat chu, Pathien biekina mihai ân chûktir a, Chanchin Ṭha a hril laiin, thiempu lalhai le Dân inchûktirtuhai chu, upahai leh a kuomah an hung thut a;

²a kuomah, “Tû thuin am hieng thil hi i thaw a? Tûin am thu a pêk che a? mi hril rawh,” tiin an indawn a.

³Ama chun an kuomah, “Kei khawmin thu bau khat indawn vêng ka ti cheu: mi hril ro,

⁴Johan baptisma kha vâna mi thu am, mihriem thu?” a ta, ân dawn a.

⁵Chun, an inngaituo a, “ ‘Vâna mi thu,’ ei ti chun, ‘Iengdinga a thu in awi naw?,’ mi ti sîng a ta.

⁶Chun, ‘Mihriem thu,’ ei ti chun, mi po poin lungin mi dêng an tih; Johan chu zâwlnei a ni an ring si a,” an ta.

⁷Chuongchun, an dawn a, “Khâwtieng lem thu am a ni kan hriet nawh,” an ta.

⁸Chun, Isûn an kuomah, “Kei khawmin, tû thuin am hieng thil hi ka thaw a, hril bîk naw ning cheu,” a ta.

⁹Chun, vântlâng kuomah hi tekhithu hi a hril ta a; “Tûin amanih grêp huon a siem a, lo enkawltuhai kuomah thlohlaw dingin a pêk a, sâwttak thang dingin ram dangah a fe ta a.

¹⁰A lo hun chun huona ra chu a chanâi an lo pêk dingin lo enkawltuhai kuoma chun suok pakhat a tir a; nisienlakhawm, lo enkawltuhai chun an lo vuok a, kutruokin an infetir nâwk ta a.

¹¹Chun, suok dang a tir nâwk a; chu khawm chu an vuok nâwk bawk a, inzakumtakin an siem a, kutruok bawkin an infetir nâwk ta a.

¹²Chun, a pathumna a tir nâwk a; chu khawm chu an lo suksil a, an pei suok ta a.

¹³“Chun, grêp huon neitupa chun, ‘Iengtin am thâwng ka ta? Ka naupa dittak tir el ka tih; ama hi an lo inza duoiin,’ a ta.

¹⁴Nisienlakhawm, lo enkawltuhai chun ama chu an hmu phingleh, ‘Ama hi rohluotu ding chu a nih, that ei tiu; chuongchun, a ro chu ei ta nîng a tih,’ tiin an inrâwn a.

¹⁵Chuongchun, grêp huona inthawk chu an the suok a, an sukhlum ta a. Grêp huon neitupa chun an chungah iengtin am hung thâwng a ta?

¹⁶Lo enkawltuhai chu hung sukbohmang a ta, huon chu mi danghai pêng a tih,” a ta. Chun, chu chu an hrietin, “Chuong êm chu tlung naw raw se!” an ta.

¹⁷Nisienlakhawm, ama chun anni chu a en a, “Hi thu an ziek hi ieng am a na? ‘In bâwltuhai lung dit naw kha, Chu ngei chu a kia lung ṭhangkai tak a lo ni tah,’ ti hi.

¹⁸Tûkhawm chu lung chunga tlu taphawt chu kawi dar a ta; a del lem chu râwt nawi a tih,” a ta.

¹⁹Chun, chuong lai tak chun Dân inchûktirtuhai le thiempu lalhaiin man an tum a; nisienlakhawm, mipui chu an ṭi a; chu tekhithu chu anni demin a hril ti an hriet si a.

²⁰Chun, ama chu Bawrsâp rorêlna le thuneinaa pêk dingin, a thu hril suol la dingin an inchân zing a, enthlittu, mi ṭha anga inlang tehlêmhai chu an tir a.

²¹Anni chun a kuomah, “Inchûktirtu, indiktakin thu i hrilin în chûktir a, tûkhawm thlier bîk lovin, thaw taktakin Pathien kawng thu în chûktir hlak ti kan hriet a;

²²Kaisar kuoma sie kan chawi a thieng am a thieng naw?” an ta, an indawn a.

²³Nisienlakhawm, ama chun an dâwp a nih ti a hriet a, an kuomah,

²⁴“Duli[21] mîn entir ro,” a ta. “Tû lim le tu hming am a na a chuong hi?” a ta. Anni chun, “Kaisar,” an ta.

²⁵Chun, ama chun an kuomah, “Kaisar thilhai chu Kaisar kuomah pe unla, Pathien thilhai chu Pathien kuomah pe ta unla,” a ta.

²⁶Chuongchun, mipui hmaah a thu hril suol lâk ding an hmu naw a; a dawnna chu mak an ti hle a, an to zing a.

²⁷Chun, Saddukai, thonâwkna a um nawh tihai laia mi tuhai amanih a kuomah an hung a, a kuomah,

²⁸“Inchûktirtu, Mosiein, tûkhawm a unaupain nuhmei nei sienla, nau nei lovin thi sienla, a unaupa chun a nuhmei chu hluoin, a unaupa ta dingin chi a thlapêk ding a nih ti a mi ziekpêk a nih.

²⁹Âwle, sal sari an um a; a upatakin nuhmei a nei a, nau nei lovin a thi ta a.

³⁰A pahnina chun a hluo a; nau nei lo bawkin a thi ta a;

³¹a pathumna chun a hluo nâwk a; chuong ang sengin pasarihai chu nau nei lovin an thi pei a.

³²Chu hnunga chun nuhmei khawm chu a thi ta a.

³³Chuongchun, thonâwk pha chun a tû nuhmei tak am nîng a ta? an pasari chun nuhmeiin an nei seng si a,” tiin an indawn a.

³⁴Chun, Isûn an kuomah, “Tulai mihai hi nuhmei pasal an innei hlak;

³⁵nisienlakhawm, chuong phaa ṭhang tlâk le mithi laia inthawka thonâwknaa ṭhang tlâka ruot taphawthai chu, nuhmei pasal innei ta naw ni hai,

³⁶thi khawm thi nâwk thei ta naw ni hai, vântirkohai tlukin an um ding a ni si a; thonâwkna nauhai an ni leiin Pathien nauhai nîng an tih.

³⁷Mithi keithoin an um ding a nih ti Mosie khawmin Chîmbuk thuah Lalpa chu, ‘Abraham Pathien, Isak Pathien, Jakob Pathien,’ a ti lai khan ân hriettir kha.

³⁸Ama chu mithi Pathien a ni naw a, mi hring Pathien a ni lem ie; amaa chun mi po po an hring vawng si a,” a ta.

³⁹Dân inchûktirtu tuhaiin amanih, “Inchûktirtu, i hril indik ngawt el!” an ta, an dawn a.

⁴⁰Thu dang an indawn ngam ta si naw a.

⁴¹Chun, ama chun an kuomah, “Krista chu David naupa a nih ti iengtiziea ti hlak am an na?

⁴²Inpâkna Hla buah David ngeiin, ‘Lalpa chun ka Lalpa kuomah, Ka changtieng ṭhung rawh,

⁴³I hmêlmahai chu i ke innghatnaa ka siem hmakhat chun,’ a ti a, a ta.

⁴⁴Chuongchun, David chun ama chu, ‘Lalpa,’ a ti si a, iengtin am, a naupa a ni thei leh?” a ta.

⁴⁵Chun, mi po po hrietin a închûktirhai kuomah, “Dân inchûktirtuhai lai chun fîmkhur ro;

⁴⁶anni chun zakaw infuol hâka lêng an nuom hlak, dâwr hmuna chibai bûkhai, inkhâwmna ina ṭhungpha ṭhatakhai, ruoiṭhenaah hmun ṭha takhai an ngaina hlak a;

⁴⁷hmeithai sum an fâk a, tlâng hlêmna dingin sâwt tak an ṭawngṭai hlak; chuonghai chun thiemnaw chang nasa zuol an tih,” a ta.