Read Hmar LUKA 21 Bible Online

LUKA 21 - Hmar bible

LUKA 21

¹Chun, a dâk suok a, mi hausahaiin thawlâwm bâwma an thawlâwm thlâk lai a hmu a.

²Chun, hmeithai pasetak tûin amanih dâr tangka dere[22] pahni a hung thlâk a hmu bawk a.

³Chuongchun, “Titakzetin ka hril cheu hi, hienghai po po nêkin hi hmeithai pasetak hin a thlâk tam lem;

⁴hieng po po hin an nei liema inthawkin thawlâwm an thlâk a nih; ama ruok hin chu a dit laitak, a khawsakpui dinga a nei sun chu a thlâk vawng a nih,” a ta.

⁵Chun, tuhaiin amanih Pathien biekin thu, lung ṭhatak le thilpêka an icheimawizie chu an hril laiin, ama chun,

⁶“Hieng in thil hmu hi, sukchim lova lung inthuo hrim hrim hitaka hin um naw ni; chuong ang ni chu la tlung a tih,” a ta.

⁷Chun, anni chun a kuomah, “Inchûktirtu, chuong chu ieng tik am hung um a ti leh? Chuong chu a hung tlung ding pha inchikna ieng am um a ta?” tiin an indawn a.

⁸Chun, ama chun, “An hlêm nawna ding cheuin fîmkhur ro. Mi tamtakin, ‘Krista chu ka nih,’ ‘Ahun a tlung ding a ni tah,’ tiin keia hming sâlin an hung ding a nih; chuonghai chu zui naw ro.

⁹Chun, indo thu le buoi thu in hriet pha ṭi naw ro; chuong chu a tlung hmasa ding hrim a nih, tâwpna ruok chu tlung nghâl el hri naw ni,” a ta.

¹⁰Chun, an kuomah, “Hnam hran le hnam hran indo an ta, ram tum le ram tum indo an ta;

¹¹simkhawleihnuoi nasatakin inhnîng a ta, hmun tum tumah ṭâmhai tlâng a ta, hrihai inlêng bawk a ta; vâna inthawkin thil ṭium le inchikna nasatakhai um a tih.

¹²Nisienlakhawm, chuong po po tlung hma chun, man an ti cheu a, inkhâwmna ina mihai le intângna ina mihai kuoma ṭhuoiin suknawmnâng an ti cheu, keia hmingin lalhai le hotuhai hmaah ṭhuoi an ti cheu.

¹³Chu chu in ta dingin thuinhriettirna remchâng la ni hman hman a tih.

¹⁴Chuongchun, dawnna ding ngaituo lâwk lo dingin in lungril sukdet ro,

¹⁵in hmêlma po poin an sêl thlâk thei nawna ding bau le varna ka pêk ding cheu a ni si a.

¹⁶Chun, in nuhai le in pahai, in nauhai, in laibunghai, in ruolhai khawmin inmantir an ti cheu a, a ṭhen insukhlumtir an ti cheu.

¹⁷Keia hming leiin mi po po theida nîng in tih.

¹⁸Nisienlakhawm, in sam zai khat khawm bohmang naw nih.

¹⁹In selnain in hringna sanhim in tih.

²⁰“Nisienlakhawm, sipaihaiin Jerusalem an inhuol in hmu pha, a bohmang ding a nih ti hre ro.

²¹Chu pha chun Judai rama umhai chu tlângahai tlân hmang raw hai se, a sûnga umhai chun suoksan raw hai se, rama umhai chu a sûngah lût naw raw hai se.

²²Chuong ni chu phuba lâk ni a nih, thu an ziek po po a hung tlung theina dingin.

²³Chuong ni chun inraihai le nautê pawmhai chung rik a tih, khawvêla hin rinum nasatak a tlung ding lei le, hi chihai chunga hin lunginsenna a tlung ding a ni leiin.

²⁴Chun, kâwlhnâmin thîng an ta, hnam tin kuomah sala ṭhuoiin um an tih; chun, Jentailhai ni a kim hmâkhat chu Jerusalem chu Jentailhai sirdein um a tih.

²⁵“Chun, nisaa dâm, thlaa dâm, arasia dâm inchikna um a tih; tuisuoriet inrûm le a fâwn leiin hnuoia khawm hin hnam tin rinumna le lunginzîngna tlung a tih;

²⁶mihai, thlabâr lei le khawvêla thil hung tlung ding ngaituo leiin thidang an tih; vân thilthawtheinahai chu ân hnîng ding a ni si a.

²⁷Chu pha chun Mihriem Naupa hi thilthawtheina leh, ropuina nasatak leh sûm laia hung hmûng an tih.

²⁸Chun, chuong thil chu a hung tlung hlimin, dâk suok unla, hang en ro; in intlanna ding a hnai ta leiin,” a ta.

²⁹Chun, an kuomah tekhithu a hril a, “Theichang kûng le thing po po en ro,

³⁰ân der phingleh chu chu in hmu a, nipui a hung tlung ding a nih ti in hriet nghâl hlak.

³¹Chuong ang bawkin nangni khawmin chuong chu a hung tlung in hmu phaleh, Pathien ram a hung hnai tah ti hre ro.

³²Titakzetin ka hril cheu hi, thil po po a tlung kim hmakhat chu tulai ruoltharhai hi bo naw ni hai.

³³Hnuoi le vân bohmang a ta, ka thu ruok chu bohmang naw ni.

³⁴“Amiruokchu, fîmkhur ro, chuong naw chun, fâk khawp taluo leh, zu inrui leh, dam sûng khawsak ngaituo leh in lungril sip taluo hlau a ta, chu ni chun châng âwk angin kârlovin in chungah hung tlung phut a tih.

³⁵Chuong ang tak chun, hnuoi chung po poa umhai chungah a tlung seng ding a nih.

³⁶Chuongchun, chuong thil hung tlung dinghai po po chu pumpel tlâk le Mihriem Naupa hmaa ngîr tlâka ruot in ni theina dingin, ieng lai khawmin ṭawngṭai pumin ngaiven ro,” a ta.

³⁷Chun, ni tin Pathien biekinah ân chûktir hlak a; zân tin a suok a, Oliv tlâng an tia chun a riek hlak.

³⁸Chun, zîngkâr inhmatakin a thu ngai dingin mi po po Pathien biekinah a kuomah an hung hlak.