Read Hmar LUKA 24 Bible Online

LUKA 24 - Hmar bible

LUKA 24

¹Ni saria ni hmasataka ruok chun, khaw var tâwmin, thil rim inhnik an buotsaihai chu chawiin thlâna chun an va fe a.

²Chun, thlâna inthawka lung chu inhlum sawnin an hmu a;

³chun, an lût a, Lal Isu ruong chu an hmu si nawh.

⁴Chun, chuong leia an lunginzîng lai chun, ngai ta, mi pahni puon mi elkhal thei silin an kâwlah an hung ngîr a;

⁵chun, an ṭi a, an hmaia hnuoi an sik el lai chun, anni chun an kuomah, “Iengdinga mithi laia mi dâm in zawng am?

⁶[Hitaka hin a um ta nawh, a tho nâwk tah;][27] Galili rama a um laia in kuoma a thu hril kha hre zing ro.

⁷‘Mihriem Naupa hi mi suolhai kuta inmantirin um a ta, krawsah hemdêng an ta, ni thum ni chun a tho nâwk ding a nih,’ a ti kha,” an ta.

⁸Chun, a thu hrilhai chu an hriet suok ta a,

⁹thlâna inthawk chun an fe nâwk ta a, sâwm le pakhathai kuoma le mi po po kuomah chuong thil po po chu an hril ta a.

¹⁰(Chuong nuhmeihai chu Mag- dalin Mari hai, Joanna hai, Jakob nu Mari hai an nih; an kuoma nuhmei danghai khawmin tirkohai kuoma chun chuong thu chu an hril bawk a.

¹¹Nisienlakhawm, chuong thu chu thu mei meiah an ruot a, an awipêk naw a).

¹²[Nisienlakhawm, Peter chu a tho a, thlâna chun a tlân ta a; chun, a kûn a, a bi a; puon zai inhmi umhai chu a hmu a; chuongchun, thil umzie chu mak titakin in tieng a fe nâwk ta a.][28]

¹³Chun, ngai ta, chu ni tak chun anni laia mi pahni chu khaw pakhat Emmau an tia chun an fe ding a na, chu chu Jerusalema inthawkin fing sâwmruk a nih.

¹⁴Chun, thil hung tlung po po chu an hril malam pei a.

¹⁵Chun, an hohlima an hril tlâng lai chun Isu ngeiin a hung pan a, ân tlawnpui ta a.

¹⁶Nisienlakhawm, ama chu an hriet thei nawna dingin an mit chu sukvaiin a um a.

¹⁷Chun, an kuomah, “Fe malama in thu hril kha ieng am a na?” a ta. Chun, nguitakin an ngîr ta a.

¹⁸Chun, a hming Kleopa lem chun a kuomah, “Jerusalemah makhât chauin amanih i um? Tulaia thil umzie i hriet naw a,” a ta, a dawn a.

¹⁹Ama chun an kuomah, “Ieng thil am ie?” a ta. Anni chun a kuomah, “Nazareth Isu, Pathien le mi po po mithmua, a thu le a thilthaw zâwlnei hminginthang tak chanchin thu;

²⁰thiempu lalhai le kan hotuhaiin that thu pêk dingin an ṭhuoi a, krawsa an hemdezie dâm thu kha.

²¹Keiniin Israel intlantu ding a ni kan beisei vei leh; chuong ta nêk hmanin chuong thil tlungna chen chu vawisûn leh ni thum a ni tah.

²²Chuong naw khawm chu kan pâwlhai nuhmei ṭhenkhat, zîngkâr a thlânah an va fe a, an mi hung suklungzîng rak a;

²³a ruong hmu si lovin, ‘Pathien vântirkohai inlâr kan hmu a, chuhai chun a hring nâwk tah ti an hril,’ an hung ti a.

²⁴Chun, kan umpui laia ṭhenkhat thlâna chun an fe a, nuhmeihai hril ang ngeiin an hmu a, nisienlakhawm, ama chu an hmu si naw a,” an ta.

²⁵Chun, ama chun an kuomah, “Mi invêthai, zâwlneihai thu hril po po awi kawnga ngawnghai!

²⁶Kristain chuong thil chu tuorin a ropuinaah a lût ding a ni hrim naw am a nih?” a ta.

²⁷Chun, Mosie le zâwlneihai po po lekhaah a phut a, Pathien Lekha po poa ama chanchin ziek taphawt chu anni a hrilfie pei a.

²⁸Chun, an fena ding khuo chu an hung hnai ta a; chun, ama chu hla deua fe tum angin a um a.

²⁹Chun, ṭawngbauin an chel a, “Kan kuomah um ta la; khuo ân hnu ding an ta hi, nisa khawm a tla ding a ni ta hi,” an ta. Chuongchun, an kuoma um dingin a lût ta a.

³⁰Chun, an kuoma buthlêng awta a ṭhung laiin bei a lâk a, mal a sâwm a, a khawi a, an kuomah a pêk a.

³¹Chun, an mit a hung var a, a hmêl an hung hriet ta a; chun, ama chu a bo el ta a.

³²chun, anni chun, “Lampuia a mi biek laia Pathien Lekha Thuhai a mi hrilfie lai khan ei lungril a har huoi hrim naw am a ni kha?” an in ti a.

³³Chun, an tho nghâl ta a, Jerusalemah an kîr nâwk ta a, sâwm le pakhathai le an ruolhai um khâwm chu an hmu a,

³⁴“Lalpa chu a lo thonâwk takzet a nih; Simon kuoma khawm ân lâr tah,” an lo ti a.

³⁵Chun, anni khawmin lampuia thil hung tlung le, bei a khawia, a hmêl an hung hrietziehai chu an hril ve a.

³⁶Chun, chuong thu chu an hril laiin ama ngei chu anni lai a hung ngîr a, [an kuomah, “In chungah thlamuongna um raw se,” a ta.][29]

³⁷Nisienlakhawm, râpthlâk an ti bêk bêk a, an ṭi a, thlarau hmuah an inruot a.

³⁸Chun, ama chun an kuomah, “Iengdinga in lunginzîng am? Iengdinga in lungrila ringhlâna a hung um am?

³⁹Ka kuthai, ka kephahai hi en ro; hi keima ngei kha ka ni hi! Mi them unla en ro; in mi hmu ang hin chu thlarau chun taksa le ru a nei ve nawh,” a ta.

⁴⁰[Chun, chu chu a hril zoin a kuthai, a kephahai an kuomah ân entir a.][30]

⁴¹Chun, an lâwm taluo leiin an la awi naw ta rawp a; mak an ti sûngin an kuomah, “Hitaka hin iengkhat fâk ding in nei am?” a ta.

⁴²Chun, nga raw tlin khat an pêk a.

⁴³Chun, a lâk a, an hmaa chun a fâk ta a.

⁴⁴Chun, an kuomah, “Hieng hi ka thu kha a nih, Mosie Dâna hai, Zâwlnei Lekhabua hai, Inpâkna Hla bua hai ka chanchin ziek taphawt chu a hung tlung dingzie in kuoma ka um laia ka hril hlak cheu kha,” a ta.

⁴⁵Chuongchun, Pathien Lekha Thu hrietna dingin an lungvar a sukvar ta a,

⁴⁶chun, an kuomah, “Hieng ang hin ziek a nih, ‘Krista chun rinum tuor a ta, ni thum niin mithi laia inthawkin thonâwk a tih,

⁴⁷ama hmingin simna thu le suol ngaidamna thu Jerusalema inthawkin hnam tin kuoma hril nîng a tih,’ tiin.

⁴⁸Chuong thil po po chu a hrepuitu in nih.

⁴⁹Chun, ngai ta u, ka Pa thil tiem chu in chungah ka hung tir ding a nih; nisienlakhawm, chung tienga inthawka thilthawtheinaa inthuom in ni hmakhat chu khawpuia hin um zing ro,” a ta.

⁵⁰Chun, Bethani khaw kâwl chenin anni a ṭhuoi a; chun, a bân a phar a, mal a sâwmpêk a.

⁵¹Chun, mal a sâwmpêk lai takin anni chu a mâksan a, [vâna zuk ṭhuoiin a um ta a.][31]

⁵²Chun, [chibai an bûk a,] lâwm bêk bêkin Jerusalemah an kîr nâwk ta a;

⁵³chun, Pathien biekina chun Pathien inpâkin an um rawp hlak.