Read Hmar LUKA 4 Bible Online

LUKA 4 - Hmar bible

LUKA 4

¹Chun, Isu chu Thlarau Inthiengin a sip a, Jordan vadunga inthawkin a kîr nâwk a, thlalêrah ni sâwmli Thlarau ṭhuoia umin Diebol thlêmin a um a.

²Chun, chuong nihaia chun iengkhawm a fâk naw a; chuongchun, a tâwpa chun a phîng a hung ṭâm ta a.

³Chun, Diebol chun a kuomah, “Pathien Naupa i ni chun hi lung hi beia inchang dingin thu pe rawh,” a ta.

⁴Chun, Isûn a kuomah, “ ‘Mihriem hi bei chauin hring naw ni hai,’ ti ziek a nih,” a ta, a dawn a.

⁵Diebol chun a ṭhuoi tung a, mit khap kâr lovin khawvêl ram po po ân entir a.

⁶Chun, a kuomah, “Hieng po po chunga thuneina le ropuina hi pêng ka ti che; ka kuomah pêk a ni ta si a, ka nuom taphawt kuomah ka pêk hlak bawk a nih.

⁷Chuongchun, chibai mi bûk la, a rêngin i ta vawng nîng a tih,” a ta.

⁸Chun, Isûn a kuomah, “ ‘Lalpa i Pathien chibai bûk la, ama rawng chau bâwl rawh,’ ti ziek a nih,” a ta, a dawn a.

⁹Chun, Diebol chun Jerusalemah a ṭhuoi a, Pathien biekin sîp zuma chun a sie a; a kuomah, “Pathien Naupa i ni chun, hitaka inthawk hin tla thla rawh;

¹⁰‘Nangma humhim ding chein A vântirkohai chu thu pêng a tih,’ ti le,

¹¹‘An kutin dawm an ti che a, Chuong naw chun i kein lung sui hlau rawi i tih,’ ti ziek a ni si a,” a ta.

¹²Chun, Isûn a kuomah, “ ‘Lalpa i Pathien infie naw,’ ti a nih,” tiin a dawn a.

¹³Chun, Diebolin a thlêmna ding tinrênga a thlêm zo chun, a remchâng phaa dingin a fe san ta a.

¹⁴Chun, Isu chu Thlarau thilthawtheina putin Galili ramah a fe nâwk ta a; chun, a chanchin chu chu lai vêl ram tina chun ân thang ta a.

¹⁵Chun, an inkhâwmna inahai ân chûktir pei a, mi po po inpâkin a um a.

¹⁶Chun, a seilienna khuo Nazareth chu a hung tlung a; Châwlnia a thaw dân pângngaiin inkhâwmna inah a lût a, tiem dingin a ngîr a.

¹⁷Chun, zâwlnei Isai lekhabu chu a kuomah an pêk a, Lekhabu ziel chu a sût a, hi thu ziekna lai hi a phar a,

¹⁸“Riengvaihai kuoma Chanchin Ṭha hril dingin Lalpân hriek a mi nal leiin, Lalpa Thlarau chu ka chungah a um; Ama chun salhai kuoma suokna thu le, Mitdelhai kuoma mitvar nei nâwkna thu hril ding dâm, Suknawmnat tuorhai insuoktirna ding dâm,

¹⁹Lalpa lungawi kum thu hril ding dâmin, A mi tir a nih,” ti hi.

²⁰Chun, lekhabu chu a ziel a, rawngbâwltu a pêk nâwk a, a ṭhung ta a. Chun, inkhâwmna ina mi po po mit chu ama chungah a fu a.

²¹Chun, an kuomah, “Hi Pathien Lekha Thu hi vawisûn hin in ihrietah a hung tlung tah,” tiin a hril ṭan a.

²²Chun, an rêngin ama an inpâk a, a bausuok lunginsietna thu dâm chu mak an ti hle a. “Hi pa hi Josef naupa a ni naw am a nih?” an ta.

²³Chun, ama chun an kuomah, “Hi ṭawngbau hi, ‘Dâktawr, nang insukdam rawh,’ ‘Kapernauma i thilthaw kan lo hriet taphawt kha, nangma khuo tieng khawm hin thaw ve rawh,’ tiin in mi la ti ngei âwm de hi,” a ta.

²⁴Chun, ama bawkin, “Titakzetin ka hril cheu hi, zâwlnei tukhawm mâni khuo tieng mîn an lâwm ngai nawh.

²⁵Chuongchun, indiktakin ka hril cheu, Elija dam laia kum thum le thla ruk vân a ping a, khawvêla ṭâm nasatak a hung tla khan, Israel ramah hmeithai tamtak an um a;

²⁶nisienlakhawm, anni laia tukhawm kuomah Elija tir a ni naw a, Sidon ram tienga Sarepta,[3] nuhmei pakhat hmeithai kuoma chau tir a ni lem kha.

²⁷Chun, zâwlnei Elisa dam lai khawm khan Israel ramah inphâr tamtak an um a; nisienlakhawm, Naaman Suria rama mi chau naw chu anni laia tukhawm sukthiengin an um naw kha,” a ta.

²⁸Chun, inkhâwmna ina mi po po chun, chuong thu chu an hriet phingleh an lunginsen ta bêk bêk a,

²⁹an tho tâwl a, khuoa inthawk chun an nam dawk a, pei thlâk dingin an khuo umna râwl khoa chun an ṭhuoi ta a.

³⁰Nisienlakhawm, ama chu an kârah a fe thleng a, a fe ta pei a.

³¹Chun, Galili rama khuo pakhat, Kapernauma chun an zu fe a, Châwlni chun mihai ân chûktir a;

³²chun, thuneitaka a hril leiin a thu inchûktir chu mak an ti hle a.

³³Chun, inkhâwmna ina chun khawhri inthieng naw thlarau nei mi pakhat a lo um a; ama chu râwl inringtakin,

³⁴“A! Nazareth Isu, keini le nang ieng am ei inzâwlna? A mi sukbohmang dingin i hung a ni maw? Nang ka hriet che, Pathien Mi Inthieng i nih,” tiin a khêk suok a.

³⁵Chun, Isûn a hal a, “To la, a sûnga inthawkin hung suok rawh,” a ta. Chun, khawhri chun a laiah a sukthlûk zet a, sukna lovin a sûnga inthawk chu a hung suok ta a.

³⁶Chun, an rêngin mak an ti hle a, “Hi hi ieng thu am a ni leh? Thu neitak le thilthawtheitakin khawhri inthieng nawhai thu a pêk a, an suok hi,” tiin an inbiek a.

³⁷Chun, chu lai ram khaw tinah a chanchin ân thang ta a.

³⁸Chun, a tho a, inkhâwmna ina inthawk chu a suok a, Simon inah a lût ta a. Chun, Simon nuhmei nu chu nasatakin a khuo a sik a, chuongchun, a ta dingin an lo ngênpêk a.

³⁹Chun, a kâwlah a ngîr a, khawsik chu a hal a, a bo ta a; chun, a tho nghâl ta a, an rawng a bâwlpêk ta a.

⁴⁰Chun, nisa tlâk ding laiin natna tum tuma na, damnaw nei taphawtin a kuomah an hung ṭhuoi a; chun, an rênga chunga chun kut ân nghat seng a, a sukdam ta pei a.

⁴¹Chun, khawhrihai khawm, “Pathien Naupa i nih,” tia khêkin, mi tamtak sûnga inthawkin an hung suok a. Chun, anni a hal a, Krista a nih ti an hriet leiin an ṭawng a phal naw a.

⁴²Chun, khawvar phingleh a suok a, thlalêr hmunah a fe a; chun, mipuihai chun an zawng a, a kuomah an hung a, anni a fe san nawna dingin chel an tum a.

⁴³Nisienlakhawm, ama chun an kuomah, “Khaw dangahai khawm Pathien ram Chanchin Ṭha ka hril ding a nih, chu lei tak chun tir ka ni si a,” a ta.

⁴⁴Chuongchun, Judai[4] rama inkhâwmna inahai thu a hril a.