Read Hmar LUKA 5 Bible Online

LUKA 5 - Hmar bible

LUKA 5

¹Chun, mipuiin Pathien thu an ngai a, ama an bâwr hut hut laiin, ama chu Gennesaret dîl panga chun a ngîr a.

²Chun, dîl panga chun lawng pahni a um a hmu a; nisienlakhawm, nga mantuhai chu an suok a, an lênhai an sâwp a.

³Chuongchun, lawng pakhat Simon ta lema chun a chuong a, a kuomah vapanga inthawka tlâwmtea intâwl lût hret a hni a. Chun, a ṭhung a, lawnga inthawk chun mipuihai chu ân chûktir ta a.

⁴Chun, thu hril a ma chun, Simon kuomah, “Li inthûk tieng pan la, nga man dingin, in lênhai dêng rawh,” a ta.

⁵Chun, Simonin a kuomah, “Inchûktirtu, inrimtakin zânkhawvârin kan thaw a, iengkhawm kan man naw a; nisienlakhawm, i thuin lênhai dêng nâwk ka tih,” a ta, a dawn a.

⁶Chun, an hei dêng chun nga nasatak an inkhum a, an lênhai chu ân tan ṭhawt ṭhawt a.

⁷Lawng danga an pâwl umhai chu anni hung ṭhangpui dingin kutin an hui a. Chun, an hung a, lawng pahni chu tlum vâng vâng khawpin an sung sip ve ve a.

⁸Chun, Simon Peterin chu chu a hmu chun, Isu khûp bulah a bawkkhup a, “Lalpa, mi fe san rawh, mi suol ka ni hi,” a ta.

⁹An nga man chu ama le a ruolhai chun mak an ti hle a.

¹⁰Simon ruolhai bawk, Zebedai naupa Jakob le Johan khawmin mak an ti hle bawk a. Chun, Isûn Simon kuomah, “Ṭi naw, tuta hnung chu mihriem man tâng i tih,” a ta.

¹¹Chun, an lawnghai chu vapangah an ṭhuoi kai a, iengkim mâksanin ama an zui ta a.

¹²Chun, khaw pakhata a um laiin, ngai ta, mi pakhat inphârnain a bâwm hi a um a, ama chun Isu a lo hmu a, hnuoi sikin a bawkkhup a, “Lalpa, i nuom chun i mi sukthieng thei,” a ta, a ngên a.

¹³Chun, ama chun a hei ban a, a them a, “Ka nuom ie, hung inthieng ta raw khai,” a ta. Chun, kârlovin a phârna chu a hung bo nghâl ta a.

¹⁴Chun, a kuomah, “Tukhawm hril naw rawh, amiruokchu, thiempu kâwlah vân entir la, i în thienna dingin Mosie ruot angin inhlân rawh, mihai inhriettirna dingin,” a ti tlat a.

¹⁵Nisienlakhawm, a chanchin thu chu ân thang nâwk zuol det a; mipui nasatak a thu hre nuom le an natnahai sukdam nuomin an hung inkhâwm a.

¹⁶Nisienlakhawm, ama chu thlalêra dâm atumin a fe a, a ṭawngṭai hlak a.

¹⁷Chun, chuong lai chun, ni khat chu ân chûktir a. Chun, a kâwlah Pharisaihai le dân hretuhai ṭhungin an um a, chuonghai chu Galili ram le, Judai ram khaw tina inthawk le Jerusalema inthawka hung suok an na; chun mi sukdamna dingin Lalpa thilthawtheina chu a kuomah a um a.

¹⁸Chun, ngai ta, khum pumin zeng pakhat an hung zâwn a; a hmaa sie dingin zâwn lût an tum a.

¹⁹Chun, mipui lei chun zâwn lûtna hrim an hmu naw a, in chungah an hang lâwn a, in chunga inthawkin a laitakah, Isu hmaah, a khum pumin an inkhai thlâktir a.

²⁰Chun, an ringzie chu a lo hmuin, a kuomah, “Mihriem, i suolhai ngaidam a ni tah ie,” a ta.

²¹Chun, Dân inchûktirtuhai le Pharisaihai chun, “Pathien hrilsie hi tu am a ni leh? Pathien chau naw chun tuin am suolhai a ngaidam thei a?” tiin an ngaituo a.

²²Chuongchun, Isûn an ngaituo chu a hriet a, an kuomah, “In lungrilah ieng am in ngaituoh a?

²³‘I suolhai ngaidam a ni tah,’ ti le, ‘Tho la kein fe rawh’ ti hi a ieng am hril a awl lem a?

²⁴Iengkhawm ni sienla khawvêlah Mihriem Naupa hin suol ngaidam theina a nei ti in hrietna dingin,” a ta, (zeng kuoma chun) “Tho la, i khum la la, i inah fe rawh ka ti che hi,” a ta.

²⁵Chuongchun, an mithmuah a tho nghâl ta a, a zâlna chu a lâk a, Pathien inpâk pum peiin a inah a fe ta a.

²⁶Chun, an rêngin mak an ti hle a, Pathien an inpâk a, “Vawisûn chu thil maktak ei hmu a nih,” an ti a, an ṭi bêk bêk a.

²⁷Chun, chuong zoa chun, a suok a, sie chawina hmuna ṭhung, siedâwltu pakhat a hming Levi a hmu a; chun, a kuomah, “Mi hung zui rawh,” a ta.

²⁸Chuongchun, iengkim a mâksan a, a tho a, a zui ta a.

²⁹Chun, Levi chun a inah Isu ta dingin ruoi ropuitak a ṭhe a; chuongchun, siedâwltuhai, mi danghai leh mi tamtakin anni an awtpui tâwl a.

³⁰Chun, Pharisaihai, an Dân inchûktirtuhai le chun a închûktirhai chungah an chier a, “Ieng dinga siedâwltuhai le mi suolhai lai in fâk a in dâwn am a na?” an ti a.

³¹Chun, Isûn an kuomah, “Mi hrisêlhai chun dâktawr an ngai naw a, mi hrivawisiehai lemin an ngai a nih.

³²Mi feltakhai lam dinga hung ka ni naw a, mi suolhai lama insimtir dinga hung ka ni lem,” a ta, a dawn a.

³³Chun, annîn a kuomah, “Johan inchûktirhaiin bu an nghei rawp a, an ṭawngṭai hlak; Pharisai inchûktirhai khawmin chuong ang bawkin an thaw hlak; nisienlakhawm, i închûktirhai hin an fâkin an dâwn hlak,” an ta.

³⁴Isûn an kuomah, “Mo ṭhuoituhai kuoma a pasal ding chu a um sûng po mo ṭhuoituhai chu in inngheitir thei hlak am a nih?

³⁵Nisienlakhawm, a pasal ding chu an kuoma inthawka ṭhuoi hmang nihai la tlung a ta, chu ni ruok chun la nghei an tih,” a ta.

³⁶Chun, an kuomah tekhithu khawm a hril a; “Tukhawmin puon thar kei thlain puon hlui an phâwk ngai nawh; phâwk ang sienla a thar chun sukthlêr a ta, a thar hlek le a hlui chu inhme bawk naw ni.

³⁷Chun, tukhawmin uoin thar savun uoin peng hluiahai an thun ngai nawh; thun ang sienla, uoin thar chun savun penghai chu mawr kawi a ta, inbuong a ta, savun penghai khawm chu sieng a tih.

³⁸Uoin thar chu savun peng tharahai an thun lem ding a nih.

³⁹Chun, tukhawmin uoin um sâwt dâwn zoin uoin thar an du ngai nawh; ‘a um sâwt a ṭha lem’ an ti si a,” a ta.