Read Hmar LUKA 6 Bible Online

LUKA 6 - Hmar bible

LUKA 6

¹Chun, Châwlni vawikhat chu bu bilahai a fe thleng a, a închûktirhai chun bu vuihai chu an thliek a, an kutphaah an nuoi fai a, an fâk a.

²Chun, Pharisai tuhaiin amani chun, “Ieng dinga Châwlnia thaw thieng naw chu in thaw am a na?” an ti a.

³Chun, Isûn a dawn a, “A ruolhai le an phîngṭam laia David thilthaw kha in tiem naw am a nih?

⁴Khânga Pathien inah a lût a, thiempuhai chau naw chun fâk thieng lo entirna bei chu a lâk a, a fâk a, a ruolhai khawm a pêk ve thu kha,” a ta.

⁵Chun, ama bawkin an kuoma chun, “Mihriem Naupa hi Châwlni Lal a nih,” a ta.

⁶Chun, Châwlni danga chun inkhâwmna inah a lût a, ân chûktir a; chutaka chun mi pakhat kut changtieng zeng a lo um a.

⁷Chun, Dân inchûktirtuhai le Pharisaihai chun, a hêkna ding an hmu theina dingin, châwlni chun a sukdam ding le ding naw an enthlit a.

⁸Nisienlakhawm, ama chun an lungril chu a hriet a, kut zeng kuoma chun, “Tho la, a laiah ngîr dawk rawh,” a ta. Chun, a tho a, a ngîr dawk ta a.

⁹Chun, Isûn an kuomah, “Châwlni hin sukṭhat am a thienga, suksiet? Sandam am a thienga, sukhlum? kân dawn cheu a nih,” a ta.

¹⁰Chun, an rêng chun a en vêl a, a kuomah, “I kut phar rawh,” a ta. Chun, a phar a, a kut chu a dam ta a.

¹¹Chuongchun, an lungsen chun an puokkawi vâng vâng a, Isu chunga an thaw dân ding an inrâwn a.

¹²Chun, chuong lai chun a suok a, ṭawngṭai dingin tlângah a fe a, Pathien kuomah zânkhuon a ṭawngṭai a.

¹³Chun, khawvar phingleh a închûktirhai chu a ko a; anni laia mi sâwm le pahni a thlang a, an hminga khawm tirko ân bûk a;

¹⁴chuonghai chu Simon (Peter ân bûk bawk chu) le a unau Andri hai, Jakob le Johan hai, Philip le Bartholomai hai,

¹⁵Matthai le Thoma hai, Alphai naupa Jakob hai, Simon Zelot an ti hai,

¹⁶Jakob naupa Juda hai, ân mantirtu ding Juda Iskariot hai an nih.

¹⁷Chun, anni ruolin a fe thla a, hmun inzâwlah a ngîr a, a închûktirhai mipui nasatak leh, Judai ram po poa inthawk le Jerusalema inthawk le Tura le Sidon khuo tienga tuisuoriet panga inthawk mi tamtak leh;

¹⁸chuonghai chu a thu ngai nuom le an natnahai insukdam nuomin an hung a nih; chuongchun, khawhri inthieng naw isawisakhai khawm an hung dam ta a.

¹⁹Chun, a kuoma inthawka thilthawtheina suoka mi tin a sukdam pei leiin, mipui po po chun ama them an tum a.

²⁰Chun, a dâk suok a, a închûktirhai chu a en a, “Nangni rimsihai, in hamṭha ie, Pathien ram in ta a ni si a.

²¹“Nangni tuta phîngṭamhai, in hamṭha ie; in la khawp ding a ni si a. “Nangni tuta ṭaphai, in hamṭha ie; in lân nui ding a ni si a.

²²“Mihriem Naupa leia mihaiin an theida cheu a, an tuithlâra an hal cheu a, in hming a ṭha nawh tia an pei hmang dêr phaleh in la hamṭha ding a nih.

²³Chu ni chun lâwm unla, hlimin inchâwm ro; ngai ta u, vânah in lâwmman a um râwn si a; chuong ang bawkin an thlatuhaiin zâwlneihai chungah an thaw hlak kha.

²⁴“Amiruokchu, nangni mi hausahai, in chung a rik ie; in thlamuongna in hmu ta si a.

²⁵“Nangni tuta khawphai, in chung a rik ie; in phîng a la ṭâm ding a ni si a. “Nang ni tuta innuihai, in chung a rik ie; lungngaiin in la ṭap ding a ni si a.

²⁶“Mi po poin an inpâk pha cheu in chung la rik a tih; chuong ang bawkin an thlatuhaiin zâwlnei tehlêmhai chungah an thaw hlak kha.

²⁷“Ka thu ngaituhai, ka hril cheu hi, in hmêlmahai chu hmangai unla, a theidahai cheu chu an ṭhatna ding thaw unla,

²⁸ṭawngsie inphurtuhai cheu chu malsâwmpêk unla, a sawisatuhai cheu chu ṭawngṭaipêk ro.

²⁹“Bieng khing tienga bentu cheu chu khing tieng khawm dâwpêk ro; chun, i puon lâkpêktu che kuoma chun i zakuo lâk khawm sêl naw.

³⁰“A hnitu taphawt che kuomah pe rawh; chun, i thil lâkpêktu che kuoma chun hni nâwk ta naw rawh.

³¹“Chun, mîn in chunga an thaw dinga in dit ang peiin mi chunga khawm thaw ve ro.

³²“Chun, nangni hmangaituhai chau in hmangai hin, lâwm ieng am hlâwng in ta? Mi suolhai khawmin anni hmangaituhai chu an hmangai hlak annâwm.

³³Chun, in chunga ṭhahai chunga chau in ṭha hin lâwm ieng am hlâwng in ta? Mi suolhai khawmin chuong ang bawkin an thaw annâwm.

³⁴Chun, hmu nâwk beiseina kuom chaua thil in inpûktir hin lâwm ieng am hlâwng in ta? mi suolhai khawmin a ngai bawka hmu nâwk dingin misuolhai kuomah an inpûktir hlak.

³⁵Amiruokchu, in hmêlmahai hmangai unla, an ṭhatna ding thaw unla, inpûktir ro, beidawng dêr lovin; chuongchun, in lâwmman tam a ta, Achunghnungtak nauhai ni bawk in tih; ama chun mi lâwmnachâng hre lohai le mi suolhai a lunginsiet hlak.

³⁶In Pain mî a lunginsiet angin mî lunginsiet ve ro.

³⁷“Sawisêl naw ro, chuongchun, sawisêlin um naw ti niu. Tukhawm thiemnawah ruot naw ro, chuongchun, inthiemlovin um naw ti niu. Ngaidam ro, chuongchun, ngaidamin um in tih.

³⁸Pe ro, chuongchun pêkin um in tih, ṭhahnemngaitaka inkhia, namdêna, sâwi muka, liem zar zara, in mal chungah pêk nîng in tih. In inkhîna ngai bawkin inkhipêk in ni ding a ni si a,” a ta.

³⁹Chun, an kuomah tekhithu a hril a, “Mitdelin mitdel ma a ṭhuoi thei ding am a nih? an pahni chun khurah an tla rêl el naw ding am a nih?

⁴⁰Inchûktu chu a inchûktirtu chungah a um nawh; nisienlakhawm, mi tin an inchûk zo pha an inchûktirtu angin um an tih.

⁴¹“Chun, ieng dinga mâni mita tlungpûm um chu ngaituo si lova, i unau mita hmawl hlek um chu i hmu am a na?

⁴²Mâni mita tlungpûm um chu hmu si lovin, i unau kuomah, ‘Unau, i mita hmawl hlek um kha mîn lâk dawk tir rawh,’ iengtin am i ti thei a? Mi vervêk! i mita inthawkin tlungpûm kha la dawk hmasa rawh, chuongchun, i unau mita inthawka hmawl hlek lâk dawk ding chu fietakin hmu thei i tih.

⁴³“Thing ṭha hrim hrim ra sea ra a um nawh; thing ṭha naw hlak ra ṭhaa ra a um bawk nawh.

⁴⁴Thing tin anni ra sengah ân hriet a nih. Mîn hruihlingnei kûngah theichang an lo ngai nawh, nghardai kûngah grêp an lo ngai bawk nawh.

⁴⁵Mi ṭha chun a lungril ro bâwm ṭhaa inthawkin thil ṭhahai a the suok hlak; mi suol chun a lungril ro bâwm siea inthawkin thil ṭha nawhai a the suok hlak; a lungril sip liem chu a bauin a hril suok el hlak a ni si a.

⁴⁶“Chun, nangnîn ieng dinga ka thu zâwm si lova, ‘Lalpa, Lalpa,’ in mi ti hlak am?

⁴⁷Mi tin ka kuoma hunga, ka thu hrea zâwm taphawt chu tû ang am an nih inhriettir ka ti cheu:

⁴⁸In bâwltu, inthûktaka choa, lung- pui chunga lungphûm remtu ang chu an nih. Chun, tui a hung lienin tui hrâtin chu in chu a khaw a, a sukhnîng thei naw a, a bâwl ngun leiin.

⁴⁹Amiruokchu, hrea zâwm naw chu, lung phûm lova, hnuoi chung ela in bâwltu ang chu an nih; tuihrâtin chu chu a khaw a, a chim nghâl ta a: a chim chu nasatak a nih,” a ta.