Read Hmar LUKA 7 Bible Online

LUKA 7 - Hmar bible

LUKA 7

¹Chun, mihai hrieta a thu po po a hril zoin, Kapernaumah a lût a.

²Chun, sipai za hotu tû amanih a suok dittak a dam naw a, a thi vâng vâng a.

³Chuongchun, Isu chanchin a hriet phingleh a suok chu hung sukdam dinga ngên hrâm dingin a kuomah Juda upahai a tir a.

⁴Chun, anni chu Isu kuom an va tlung a, ṭhahnemngaitakin an ngên a, “Ama hi, i thawpêk tlâk a nih:

⁵ei hnam dâm a hmangai a, kan inkhâwmna in dâm a mi bâwlpêk a nih,” an ta.

⁶Chuongchun, Isu chun anni a zui ta a. Chun, in an tlung vâng vângin sipai za hotu chun a kuomah a ruolhai a tir a, “Intak sakin hung naw rawh, ka in sûng i lûtna tlâk a ni nawh;

⁷chuleiin, i kuoma hung tlâk khawm niin kân ring naw a, thu chau hril la ka naupang dam el a tih.

⁸Kei khawm mi thua um ka na, ka hnuoiah sipaihai an um a; hi mipa kuoma hin, ‘Fe rawh’ ka ti leh a fe a; mi dang kuoma khawm, ‘Hung rawh’ ka ti leh a hung hlak; ka suok kuoma khawm, ‘Hi hi thaw rawh,’ ka ti leh a thaw hlak,” a ta.

⁹Chun, Isûn chuong thu chu a hrietin ama chu mak a ti hle a, a ngha a, mipui a zuituhai kuoma chun, “Ka hril cheu hi, Israelhai lai khawm hieng ang lâwma ringna nasa hi ka hmu nawh,” a ta.

¹⁰Chun, a mi tirhai chu in tieng an fe nâwk a, suok chu damin an hmu ta a.

¹¹Chun, sâwt nawteah khaw pakhat Nain an tia chun a fe a; a închûktirhai le mipui nasatak a kuomah an fe ve a.

¹²Chun, kul kawtkhâr kâwl a tlungin, ngai ta, mithi an hung zâwn dawk a, a nu naupa nei sun a na, ama hlak hmeithai a ni si a; an khuohai tamtak chu a kuomah an um a.

¹³Chun, Lalpa chun hmeithai chu a hmu phingleh a lunginsiet bêk bêk a, “Ṭap naw,” a ta.

¹⁴Chun, a va hnai a, hlâng chu a them a; chuongchun, a zâwntuhai chu an ngîr a. Chun, “Tlangvâl, tho rawh ka ti che hi,” a ta.

¹⁵Chun, mithi chu a ṭhung dawk a, a hung ṭawng ta a. Chun, Isûn a nu kuomah a pêk ta a.

¹⁶Chun, mi po poin an ṭi a, Pathien an inpâk a, “Eini lai zâwlnei ropuitak a hung um ta a ni hi,” an ta. “Pathienin a mihai a hung sîr tah a nih,” an ti bawk a.

¹⁷Chun, chu mipa chungchâng thu chu Judai ram po po le a kâwl vêl ram tinah ân thang suok ta a.

¹⁸Chun, Johan inchûktirhai chun chuong thu po po chu Johan an hril a.

¹⁹Chuongchun, Johan chun a închûktirhai pahni a ko a, Lalpa kuoma chun a tir a, “A hung ding chu i ni, mi dang am kan la ngai ding?” tiin.

²⁰Chun, mihai chu a kuom an hung tlung chun, “Baptistu Johanin, ‘A hung ding chu i ni, mi dang am kan la ngai ding?’ ti dingin i kuomah a mi hung tir a nih,” an ta.

²¹Chun, chuong lai tak chun Isûn damnaw dâm, hripui invawihai, khawhri imanhai tamtak a sukdam a, mitdel tamtak khawm an mit a sukvar a.

²²Chun, an kuomah, “Fe nâwk ta unla, thil in hmu le in hriet hi Johan va hril ro; mitdelhai an mit a hung var tah, kebaihai kein an lâwn tah, inphârhai an hung inthieng tah, nasêthai an na a hung var tah, mithihai keithoin an um tah, pasiehaiin Chanchin Ṭha hril an dawng tah.

²³Chun, tûkhawm ka chunga lungninawna hmu naw chu an hamṭha,” a ta, a dawn a.

²⁴Chun, Johan mi tirhai chu an fe hnungin Isûn mipuihai kuoma chun Johan thu a hril ta a, “Ieng en dingin am thlalêra khan in hang fe a? Luong thli imût hnîng maw?

²⁵Annawleh, ieng en ding takin am in hang fe a? Puon innêm sil maw? Ngai ro, puon innêm sil le mi inhawitirhai chu lal inahai in sawnnaw an um.

²⁶Annawleh, ieng en ding takin am in hang fe a? Zâwlnei maw? A ni ngei kha, ka ti cheu hi, zâwlnei nêk khawma ropui lem,

²⁷‘En ta, ka tirko i hmaah ka tir a nih, Ama chun i hmaah i lampui siem a tih,’ ti, a chanchin an iziek kha, ama hi a nih.

²⁸Nuhmei sûnga insieng laia chun Johan nêka ropui lem an um nawh; nisienlakhawm, Pathien rama mi chîn tak khawm ama nêkin an ropui lem,” a ta.

²⁹Chun, mi po poin an hrietin, siedâwltuhai leh, Johan baptisma lo chang tah an na, Pathien an inthiem a.

³⁰Pharisaihai le dânhretuhai ruok chu a kuoma baptisma lo chang tah an ni ve naw a, anni ta dinga Pathienin rem a iruotpêk chu an pawm nawh.

³¹Chuongchun, Isu bawkin, “Tulai ruoltharhai hi ieng lêm hrilkhîng ka ti aw?

³²Naupang dâwr hmuna ṭhunga, ‘Theihle kan mûtpêk cheu a, in lâm si naw a; kan ṭap rak a, in ṭap si naw a,’ tia inkhêkkhumhai ang hi an nih.

³³Baptistu Johan chu a hung a, bei a fâk naw a, uoin khawm a dâwn naw a, nangnîn, ‘Khawhri a zâwl a nih,’ in ti a.

³⁴Mihriem Naupa a hung a, a fâkin a dâwn a, ‘En ta u, bu he mi, uoin he mi, siedâwltuhai le mi suolhai ruolpa saw!’ in ti si a.

³⁵Nisienlakhawm, Varna chu a nau po poin an inthiem,” a ta.

³⁶Chun, Pharisaihai laia mi pakhatin a kuomah bu fa dingin a fiel a. Chun, Pharisai ina chun a lût a, thlaithlêng a awt a.

³⁷Chun, ngai ta, chu khuoa nuhmei suol pakhat um chun, Pharisai inah thlaithlêng awtin a ṭhung ti a hriet phingleh alabastar bûrin hriek rim inhnik a hung chawi a.

³⁸A hnungah a ke bula chun ṭap pumin a ngîr a, a mitthliin a ke a lo far hu a, a samin a hrûk a, a ke chu a fâwp a, hriek rim inhnik chun a nâl a.

³⁹Chun, a fieltu Pharisai chun a hmu chun, a lungrilin, “Hi mipa hi zâwlnei a ni chun a themtu nuhmei hi tu am a ni, mi ieng ang am a ni hre âwm tak, mi suol a ni si a,” a ta.

⁴⁰Chun, Isûn a kuomah, “Simon, i kuomah thu bau khat hril ding ka nei,” a ta, a dawn a. Chun, ama chun, “Hril ta la, Inchûktirtu,” a ta.

⁴¹Chun, Isûn “Tangka inpûktirtu tuin amanih leibattu pahni a nei a; pakhatin duli za nga a bat a, pakhatin sâwmnga.

⁴²An thung thei naw leiin, a ngaidam ve ve a. Chuongchun, chuhai chun a tû lem chun am ama chu hmangai lem an ta?” a ta.

⁴³Simon chun, “A ingaidam tam lem chun niin ka ring,” a ta, a dawn a. Chun, ama chun a kuomah, “I ti dik ie,” a ta.

⁴⁴Chun, nuhmei tieng chu a ngha a, Simon kuoma chun, “Hi nuhmei hi i hmu? I inah ka hung lût a, nangin ka ke sâwpna ding tui i mi pêk naw a, ama ruok hin chu a mitthliin ka ke a sukhu a, a samin a hrûk a nih.

⁴⁵Nangin fâwp hrim hrim i mi fâwp nawh; ama ruok hin chu ka hung lût hlima inthawk ka ke fâwp a ma nawh.

⁴⁶Nangin ka luah hriek i mi nâl nawh; ama ruok hin chu ka kepha hriek rim inhnik a nâl.

⁴⁷Chuleiin, ka ti che hi, a suol tamtak kha ngaidamin a um tah; ama khawmin a hmangai ta bêk bêk a ni hi; amiruokchu, ngaidam tlâwm chun, tlâwmtêin a hmangai hlak,” a ta.

⁴⁸Chun, nuhmei kuoma chun, “I suolhai ngaidam a ni tah,” a ta.

⁴⁹Chun, a thlaithlêng awtpuihai chun, “Suolhai khawm ngaidam hi tu am a na?” an in ti a.

⁵⁰Chun, ama chun nuhmei kuoma chun, “I ringna hi sandam I ni pha a nih, thlamuongtakin fe rawh,” a ta.