Read Hmar LUKA 8 Bible Online

LUKA 8 - Hmar bible

LUKA 8

¹Chun, a nakie deu chun Isu thu hril le Pathien ram Chanchin Ṭha intlun pei pumin khaw lien le khaw têhai a fang pei a, a kuomah sâwm le pahnihai chu an um a;

²nuhmei tuhai amanih, khawhri zâwl dam nâwkhai leh, na dam nâwkhai leh, chuong nuhmeihai chu Mari, a sûnga inthawka khawhri pasari suok Magdalin an iti hai,

³Herod sum enkawltu Chuza nuhmei Joanna hai, Susanna hai, mi dang tamtak leh an nih; chuonghai chun mâni neiin an rawng an bâwlpêk a.

⁴Chun, mipui nasatak an hung inkhâwm a, khaw tina mi a kuomah an hungin, tekhithuin thu a hril a.

⁵“Bu chi thêtu bu chi thê dingin a fe a. Chun, a thê laiin a ṭhen lampui sîrah a tla a, mîn an sir a, chun, vatehaiin an tlân zo ta a.

⁶Chun, a ṭhen pielthlêng chungah a tla a; a mâwng phingleh a hnâwng naw leiin a rawp ta a.

⁷Chun, a ṭhen hlohlingnei lai a tla a, hlo chun a mâwng ruolpui a, a dîp hmang ta a.

⁸Chun, a ṭhen hnuoi ṭhaa a tla a, a hung mâwng a, a lêt zain a ra ta a,” a ta. Chun, chuong thu chu a hril laiin a khêk a, “Tûkhawm hrietna dinga na nei chun hre raw se,” a ta.

⁹Chun, a închûktirhai chun a kuomah, “Hi tekhithu hi ieng tina am a na?” tiin an indawn a.

¹⁰Ama chun, “Pathien ram thurûk chu nangni ihriet chu phal a na, mi dang kuoma ruok chu tekhithu chaua hril a nih; hmu hai sienla khawm, hmu naw an ni theina dingin, nain hrehai sienla khawm a ngaina an hriet thei nawna dingin.

¹¹“Tekhithu kha hi hi a nih; Bu chi chu Pathien thu a nih.

¹²Chun, lampui sîra mi chu thu hre tahai hi an nih; chun, diebol chu a hung a, an awi naw a, sandam an ni thei nawna dingin an lungrila inthawkin thu a lâkpêk hlak.

¹³Chun, pielthlêng chunga mi chu hieng hi an nih; an hriet phingleh thu chu lâwmtaka pawmhai hi; nisienlakhawm, zung hrim an nei nawh, sâwt nawtê chau an awi a, thlêma an um phaleh an bânsan nâwk hlak.

¹⁴Chun, hlohlingnei laia tla chu hieng mi hi an nih; thu an hriet hnunga an fe pei laiin dam sûng khawsak lungkhamnahai, inhawitirnahai, hausaknahai chun a dîp a, an ra puitling ngainaw a nih.

¹⁵Hnuoi ṭhaa mi chu hieng hi an nih; lungril ṭha le felin thu chu an hriet a, an vawn zing a, tuorseltakin an ra hlak.

¹⁶“Tukhawmin khâwnvar insitin bêlin an inkhum nawh, khum hnuoia khawm an sie nawh; a lût taphawtin a var an hmu theina dingin a sienaah an sie lem hlak a nih.

¹⁷Phuong lo dinga ip iengkhawm a um nawh, hriet naw ding le inlang lo dinga thuphmang iengkhawm a um bawk nawh.

¹⁸Chuongchun, ieng angin am in hriet fimkhur ro; tûkhawm a nei taphawt chu pe sâng an ta, tûkhawm a nei naw taphawt chu a nei suna a ruot khawm chu lâkpêk an tih,” a ta.

¹⁹Chun, a nu le a unauhai chun Isu kuom tieng an hung pan a, nisienlakhawm, mipui lei chun a kuom an hung tlung thei si nawh.

²⁰Chun, “I nu le i unauhai nang hmu ding chein tuola sawn an ngîr zing ie,” tiin an hril a.

²¹Chun, ama chun an kuomah, “Hieng Pathien thu hrea zâwmhai hi ka nu le ka unauhai an nih,” a ta, a dawn a.

²²Chun, chuong lai chun ni khat chu lawngah a chuong a, a închûktirhai leh; chun, an kuomah, “Dîl râl khingtieng sawn kai ei tiu,” a ta. Chuongchun, lawng chu an sût a, an fe ta a.

²³Chun, an fe laiin Isu a lo in innghil a; chun, dîla chun thlipui a hung hrâng a, an lawng chu tuiin a sip vâng vâng a, nasataka ṭitumnaah an um ta a.

²⁴Chun, a kuomah an va fe a, an keitho a, “Inchûktirtu, Inchûktirtu, kan bohmang ding a ni hi teh,” an ta. Chun, ama chu a hung har a, thli le tuifâwn chu a hal ta a; chun, a ma a, a re ta a.

²⁵Chun, an kuomah, “In ringna khâwlai am a um a?” a ta. Chun, an ṭi a, mak an ti hle a, “Hi mipa hi tu am a ni leh? thli le tui chen khawm thu a pêk a, an awi hi,” an inti tâwl a.

²⁶Chun, Galili ram zâwna Gerasin[5] mihai ram chu an tlung a.

²⁷Chun, khawmuola a suokin, khuoa mi khawhri iman tûin amanih ân tuokpui a; ina hrim khawm a um naw a, thlânahai a um lem hlak a.

²⁸Chun, Isu a hmu phingleh a khêk a, a hmaah a bawkkhup a, râwl inringtakin, “Isu, Pathien Achunghnungtak Naupa, kei le nang ieng am ei inzâwlna a um a? mi sawisa lul naw rawh, ka ngên che,” a ta.

²⁹(Isûn khawhri inthieng naw chu, chu mipa sûnga inthawka suok dingin thu a lo pêk ta si a. Chu mipa chu khawhri chun a man rawp hlak a nih; mihaiin khaidiet le kawl an inbuntir hlak a, an vêng zing hlak a; nisienlakhawm, a khuopnahai chu a suktan a, khawhri chun thlalêrahai a hnawt suok hlak).

³⁰Chun, Isûn, “I hming ieng am a na?” tiin ân dawn a. Ama chun, “Legion,”[6] a ta, (a sûnga khawhri tamtak an lût leiin).

³¹Chun, vânsama fe thu an kuoma pe lo dingin Isu kuomah an ngên a.

³²Chun, chutaka chun tlângah vawk ruol tamtak an tla a; chun, a kuomah, vawkhai sûngah lût theina thu an ngên a. Chun, ama chun thu a pêk a.

³³Chun, khawhrihai chu chu mipa sûnga inthawk chun an suok a, vawkhai sûnga chun an lût a; chun, vawk ruol chu râwlah an tlân thla hum hum a, dîlah an tlân lût a, tui inhâkin an thi ta a.

³⁴Chun, a vaituhai chun chu thil umzie chu an hmu a, an tlân a, khuoa le loahai chun an hril a.

³⁵Chun, thil um dân chu en dingin mihai an suok tâwl a; chun, Isu kuom an hung tlung a, khawhri isuoksanpa chu puon sila lungvar pângngai putin, Isu ke bula ṭhung an hung hmu a; chuongchun, an ṭi ta a.

³⁶Chun, a hretuhai chun khawhri iman a sukdamzie chu chuonghai chu an lo hril a.

³⁷Chun, a vêl Gerasin[7] mihai rama mi po po chun an ṭi ta bêk bêk leiin, ama chu an kuoma inthawka fe hmang dingin an ngên a; chun, lawngah a chuong a, a kîr nâwk ta a.

³⁸Chun, khawhri isuoksanpa ruok khan chu Isu kuoma um zing a ngên a.

³⁹Nisienlakhawm, Isûn, “I in tieng fe la, Pathienin i ta dinga thil a thawpêk che ropuizie hi va hril rawh,” tiin ân fetir ta a. Chuongchun, a fe a, khawpui sûng po poa chun Isûn a ta dinga thil a thawpêk ropuizie chu a khêkpui ta a.

⁴⁰Chun, Isu a hung kîr nâwk chun mipuiin ama an lâwm a, ama lo nghâk zinga um an ni tâwl leiin.

⁴¹Chun, ngai ta, mi pakhat a hming Jaira, inkhâwmna in hotu chu a hung a, Isu ke bulah a bawkkhup a,

⁴²a naunu neisun, kum sâwmpahni vêl chaua upa, thihmunsuola zâl zing a ni leiin a ina fe dingin a ngên a. Chun, Isu a fe laiin mipuihaiin an hneng sup sup a.

⁴³Chun, nuhmei pakhat kum sâwmpahni thipûtin a damnaw a, a sum nei po po dâktawrhai kuomah a sukthâm zo ta si a, tukhawmin an sukdam thei ta si naw a;

⁴⁴ama chu a hnungah a hung a, a puon hmawr a them a, kârlovin a thipût chu a bo nghâl ta a.

⁴⁵Chun, Isûn, “A mi them kha tu am a na?” a ta. Chun, “Kei chu ka ni nawh,” an ti seng a. Peter le a ruolhaiin, “Inchûktirtu, mipuihaiin an hneng sup sup che a, an bûm tul tul che annâwm,” an ta.

⁴⁶Nisienlakhawm, “Tûin amanih chu a mi them a nih, thilthawtheina ka sûnga inthawkin a suok nghe nghe ti ka hriet a nih,” a ta.

⁴⁷Chun, nuhmei chun ân thup thei naw a hriet a, inthin pumin a hung a, a hmaah a bawkkhup a, a them san le kârlova a dam tâk elzie chu mi po po hmua chun a hril ta a.

⁴⁸Chun, ama chun a kuomah, “Ka naunu, i ringna hi i dampui a nih, thlamuongtakin fe rawh,” a ta.

⁴⁹A la ṭawng zing laiin inkhâwmna in hotu ina inthawk chu mi pakhat a hung a, “I naunu a thi tah, inchûktirtu suksâwl nuom naw,” a ta.

⁵⁰Isu ruok chun chu thu chu a hriet chun, “Ṭi naw rawh, ring el rawh, chuongchun, dam nâwk a tih,” a ta, a dawn a.

⁵¹Chun, in chu a va tlung chun, Peter, Jakob le Johan hai, naupang nu le pa chau naw chu tukhawm lût ve a phal naw a.

⁵²Chun, an rêngin an lo ṭap rak rak a, an âwm an inchum a; chuongchun, ama chun, “Ṭap naw ro, a thi nawh, a in innghil a ni lem,” a ta.

⁵³Chun, a thi tain an hriet zing si a, an nuisan el a.

⁵⁴Isu ruok chun a kut a chel a, “Bawinu, tho rawh,” a ta, a ko a.

⁵⁵Chun, a thlarau chu a hung kîr nâwk a, a tho nghâl ta a; chun, iengkhat fâk ding pêk ding thu a pêk a.

⁵⁶Chun, a nu le pa chun mak an ti hle a; nisienlakhawm, ama chun, a thilthaw chu tukhawm hril lo dingin a ti tlat a.