Read Hmar LUKA 9 Bible Online

LUKA 9 - Hmar bible

LUKA 9

¹Chun, Isûn sâwm le pahnihai chu a ko khâwm a, khawhri po po chunga thilthawtheina le thuneina le natnahai sukdam theina a pêk a.

²Chuongchun, Pathien ram thu hril ding le, damnawhai sukdam dingin a tir suok ta a.

³Chun, an kuomah, “Inzinnaa dingin hmawl amanih, mansa amanih, bei amanih, tangka amanih, iengkhawm chawi naw ro; zakuo khawm a kawpin chawi naw ro.

⁴Chun, in tlungna in taphawtah tlung zing pei unla, chu ina inthawk chun suok ro.

⁵Chun, a lâwm naw taphawt cheu chu, chu khuoa inthawka in suok pha chun an thiemnawzie inhriettirna dingin in kephaa pilvut chu thin thla ro,” a ta.

⁶Chuongchun, an fe ta a, khuo an fang pei a, ram tinah Chanchin Ṭha an hril a, mi an sukdam pei a.

⁷Chun, lal Herod chun a thilthaw po po chu a lo hrietin a lunginzîng ta a, ṭhenkhatin, “Johan kha a hring nâwk tah a ni hi,” an ta,

⁸ṭhenkhatin, “Elija a hung inlâr tah a ni hi,” an ta, ṭhenkhatin, “Tienlaia zâwlnei tû amanih a tho nâwk tah a ni hi,” an ti leiin.

⁹Chun, Herod chun, “Johan lu chu ka tan ta kha; nisienlakhawm, hieng ang lâwma a thu ka ihriet hlak hi tû am a na?” a ta. Chun, ama chun hmu a tum ta a.

¹⁰Chun, tirkohai chu an hung nâwkin, a kuomah an thilthawhai an hril a. Chun, ama chu anni atuma ṭhuoiin Bethsaida an ti khuoa chun a fe ta a.

¹¹Nisienlakhawm, mipuihai chun an hriet a, an zui pei a; chun, ama chun anni chu a lo lâwm a, Pathien ram thu a hril a, sukdam ngaihai chu a sukdam a.

¹²Chun, khuo a hung inhnu ding a ni ta a, sâwm le pahnihai chu an hung a, a kuomah, “Ei kâwl vêl khuoahai le loahai fea, tlung in le fâk ding an hmu theina dingin mipui hi infetir ta la; hi, thlalêr hmuna um ei ni si a,” an ta.

¹³Ama ruok chun an kuomah, “Nangnîn fâk ding pe ro,” a ta. Anni chun, “Hieng mi po po ta ding hin fâk ding kan vân châwkpêk naw chun, beiphêk panga le nga pahni chau naw chu iengkhawm kan nei nawh,” an ta.

¹⁴(Patling ruok khawm sâng nga lai rau an ni si a). Chun, a închûktirhai kuomah, “Apâwl peiin inṭhungtir ro, sâwmnga lai peiin,” a ta.

¹⁵Chuong ang chun an thaw a, an inṭhungtir ta vawng a.

¹⁶Chun, beiphêk panga le nga pahni chu a lâk a, vân tieng enin mal a sâwm a, a khawi a, mipui hmaa sem dingin a inchûktirhai kuoma chun a pêk a.

¹⁷Chun, an fâk a, an khawp ta vawng a; an fâk mahla nawi chu bâwm sâwm le pahni an rût sip a.

¹⁸Chun, Isûn a khât chaua a ṭawngṭai laiin, a închûktirhai chu a kuomah an um a, an kuomah, “Mipuihaiin tu am a nih an mi ti a?” tiin ân dawn a.

¹⁹Chun, anni chun, “ ‘Baptistu Johan,’ an ti che a, nisienlakhawm, ṭhenkhatin, ‘Elija,’ ṭhenkhatin, ‘Tienlai zâwlnei tû amanih a tho nâwk tah a nih,’ an ti che,” tiin an dawn a.

²⁰Chun, ama chun an kuomah, “Anleh, nangnîn tû am a nih in mi ti a?” a ta. Chun Peterin, “Pathien Krista chu,” tiin a dawn a.

²¹Chun, chu thu chu tukhawm hril lo ding ti tlatin, thu a pêk a.

²²“Mihriem Naupa hin thil tamtak a tuor ding a na, upahai, thiempu lalhai, Dân Inchûktirtuhai dit nawin a um ding a na, thatin a um ding a na, ni thum niah keithoin a um bawk ding a nih,” a ta.

²³Chun, ama bawkin mi po po kuomah, “Tûkhawmin mi zui a nuom chun mâni inhnâwlin[8], ni tin a kraws putin mi zui raw se.

²⁴Tûkhawm a nun humhim nuom phawt chun chân a ta; tûkhawm keia leia nun chân taphawt chun, ama ngei chun humhim a tih.

²⁵Mîn khawvêl hi a pumin nei sienla, insukboin amanih insukse sienla, a ta dingin iengam ṭhahnem a ta?

²⁶Tûkhawm kei le ka thu inzapui taphawt chu, Mihriem Naupa hin ama ropuina leh, a Pa ropuina leh, a vântirko inthienghai ropuina leh a hung pha chun ama chu hung inzapui vêng a tih.

²⁷Indiktakin ka hril cheu hi, hitaka ngîrhai a ṭhen hi Pathien ram an hmu hmakhat chun thina intem tawp lo ding an um,” a ta.

²⁸Chun, chuong thu a hrila inthawk ni riet amanih lai hnunga chun, Isûn Peter hai, Johan hai, Jakob hai chu a ṭhuoi a, ṭawngṭai dingin tlângah a hang fe a.

²⁹Chun, a ṭawngṭai laiin a hmêl umzie chu a hung danglam a, a silfênhai chu a hung vâr a, mi elkhal theiin a um ta a.

³⁰Chun, ngai ta, mi pahni ama leh an inbiek a, chuhai chu Mosie le Elija an nih;

³¹ropuinaa inthuomin an inlâr a, Jerusalem khuoa a thi tleitlâkna ding thu an hril a.

³²Peter le a ruolhai ruok chu an inlusu a; chun, an har phingleh a ropuizie le a kâwla mi pahni ngîr chu an hmu ta a.

³³Chun, anni chun Isu an mâksan ding laiin, Peterin Isu kuomah, “Inchûktirtu, ei ta dingin hitaka um zing hi a ṭha; bâwkte pathum khâwng kan tih, i ta dingin pakhat, Elija ta dingin pakhat, Mosie ta dingin pakhat,” a ta, a thu hril khawm hre lovin.

³⁴Chun, chuong thu chu a hril laiin sûm a hung zîng a, anni a hlie ta a; sûma chun an lût laiin an ṭi a.

³⁵Chun, sûma chun râwl a hung suok a, “Hi hi ka Naupa, ka thlang chu a nih, ama thu ngai ro,” a ta.

³⁶Chun, râwl chu a bo phingleh, Isu chu khât chauin an hmu ta a. Chun, an to zing a, chuong lai vêl chun an thil hmu chu tukhawm an hril nawh.

³⁷Chun, a zîngah tlânga inthawka an ṭum hnung chun, mipui nasatakin ama chu an lo tuok a.

³⁸Chun, ngai ta, mipui lai chun, mi pakhat a khêk a, “Inchûktirtu, ka naupa hi en dingin ka ngên che, ka nau nei sun a ni si a.

³⁹Ngai ta, khawhriin a man hlak a, a khêk suok thut hlak, chuongchun, a chilhuom tla khawpin a sawisa hlak a, nasataka sukhliemin a mâksan ṭâwk hlak.

⁴⁰Chun, i închûktirhai kuomah hnawt dawk dingin ka ngên a, an thei si naw a,” a ta.

⁴¹Chun, Isûn “Ruolthar ringna nei lova kâwmawhai, ieng chen am in kuomah um ka ta, ngaithei ka ti cheu a? I naupa chu hitaka hin hung ṭhuoi rawh,” a ta, a dawn a.

⁴²Chun, a hung laiin, khawhri chun a sukthlûk rak a, nasatakin a sawisa ta a. Nisienlakhawm, Isûn khawhri inthieng naw chu a hal a, naupang chu a sukdam a, a pa kuoma chun ân fetir nâwk ta a.

⁴³Chun, mi po poin Pathien ropuizie chu mak an ti hle a. Chuongchun, mi po po chun a thilthaw po po chu mak an ti lai chun, Isûn a închûktirhai kuoma chun,

⁴⁴“Chuong thu chu in naah lût raw se, Mihriem Naupa hi mihriemhai kuta inmantirin a um ding a ni si a,” a ta.

⁴⁵Nisienlakhawm, a thu hril chu a ngaina an hriet naw a, an hriet thei nawna dingin ân thup a nih, chu thu hril chanchin chu ama hlak an indawn ngam si naw a.

⁴⁶Chun, “Eini lai tu am ropui tak a ta?” tiin an lo insêl a.

⁴⁷Chuongchun, Isûn an lungrila an ngaituo chu a hriet a, naupangte a kei a, a sîrah ân ngirtir a,

⁴⁸an kuomah, “Tûkhawm, ka hming leia hi naupangte lâwm taphawt chu kei a mi lâwm ning a ta, tukhawm kei mi lâwm chu a mi tirtu lâwm nîng a tih, nangni laia chîntak hi a nih a ropui chu,” a ta.

⁴⁹Chun, Johan chun, “Inchûktirtu, tu amanih i hminga khawhrihai hnawt dawk kan hmu a, kan zuina chea a ṭhang ve naw leiin kan khap el annaw,” a ta, a dawn a.

⁵⁰Isu ruok chun a kuomah, “Khap ta naw ro, tûkhawm nangni sêlkal naw chu in tienga ṭhang a ni si a,” a ta.

⁵¹Ama chu vân tienga ṭhuoi hun a hung hnai chun, Jerusalem tieng fe tumin a ngha tlat a,

⁵²a hmaah thu intluntu ding mi a tir lâwk a, chun, an fe a, ama lo buotsaipêk dingin Samari khuo pakhatah an lût a.

⁵³Chun, a mitmei chu Jerusalem tieng pana ân lang leiin ama an lâwm nawh.

⁵⁴Chuongchun, a închûktir Jakob le Johan chun chu chu an hriet phingleh, “Lalpa, hienghai kâng vawngna ding hi vâna inthawkin mei ko thla inlang rem i ti?”[9] an ta.

⁵⁵Ama ruok chu a hang ngha a, a baukhat a.[10]

⁵⁶Chun, khaw dangah an fe ta a.

⁵⁷Chun, lampuia an fe laiin tuin amanih a kuomah, “I fena taphawtah zui ka ti che,” a ta.

⁵⁸Isûn a kuomah, “Sihalhaiin kuo an nei a, chunga vatehai khawmin bu an nei a, Mihriem Naupa ruok hin chu a lu innghatna a nei nawh,” a ta.

⁵⁹Chun, Isûn mi dang kuomah, “Mi zui rawh,” a ta. Ama chun, “Lalpa, ka pa mîn vuitir zet rawh,” a ta.

⁶⁰Isu ruok chun a kuomah, “Mithiin anni mithi chu vui raw se; nang chun Pathien ram thu va hril dar lem rawh,” a ta.

⁶¹Chun, mi dang khawmin, “Lalpa, zui ka ti che, amiruokchu, ka ina mihai bau ṭhain mîn thlatir zet rawh,” a ta.

⁶²Isûn a kuomah, “Tukhawm hnuoi inletnaa kut innghata, hnung tieng ngha chu Pathien rama mi ni tlâk a ni nawh,” a ta.