Read Hmar DÂN PAHNINA 1 Bible Online

DÂN PAHNINA 1 - Hmar bible

DÂN PAHNINA 1

¹Hieng thu hi Jordan saktieng, Paran le Tophel, Laban, Hazeroth le Dizahab inkara Suph va dep Araba, Mosiein Israelmihai po po kuoma a hril chu a nih.

²Horeb tlânga inthawkin Kadesbarnea chu Seir tlâng tieng lampuia fein ni sâwmpakhat lam a na.

³Kum sâwmlina, thla sâwmpakhatna, chu thla ni khat ni chun, LALPAIN anni hril dinga thu a pêkhai po po chu Israel mihai kuoma chun Mosiein a hril a.

⁴Chu chu Hesbona um Amor mihai lal Sihon le Edrei le Astaroth-a um Basan lal Og a that hnungin a nih.

⁵Jordan saktieng Moab ramah hi dân hi Mosiein a puong ṭan ta a,

⁶“LALPA ei Pathien chun Horeb tlângah a mi biek a, ‘Hi tlânga hin in um sâwt tâwk ta a;

⁷insawn ta unla, fe suok unla, Amor mihai tlâng rama le a kâwl vêl po po Arabaa dâm, tlâng rama dâm, phai rama dâm, Sim rama dâm, Kanaan mihai umna tuipui kamhaia le Lebanona dâm, vadungpui Euphrates vadung chenin fe ro.

⁸Ngai ta u, ram chu ka pêk dai ta cheu, in pu Abraham hai, Isak hai, Jakob hai le an hnunga an thla nâwk peihai kuoma inkhâma LALPAIN a pêk ram chu va hluo ro,’ tiin.

⁹“Horeb tlânga ei umlai khan in kuomah, ‘Keima ngawt chun ka zo naw cheu a,

¹⁰LALPA in Pathien chun a sukpung cheu a, ngai ta u, tuhin chu in tamzie chu vâna arasi zât zet in hung ni ta a.

¹¹LALPA in pi le puhai Pathien chun tuta nêka a let sângin sukpung sienla cheu, a tiem cheu angin malsâwm raw se cheu.

¹²Iengtin am keima khât chauin in buoina dâm, in phurrik dâm, in inngâwknahai chu phur zo ka ta?

¹³In hnam chita inthawkin mi var, chinchâng hre mi, mi ngaisângumhai thlang suok unla, in ṭhuoituah siem ka tih,’ tiin ka hril cheu a.

¹⁴Chun, nangnîn, ‘I thil hril chu kan ta dingin a ṭha hle el,’ tiin in mi dawn a.

¹⁵Chuongchun, in hnam hotuhai chu ka pawm a, in hnam laia mi, mi var, chinchâng hre mihai in chungah ṭhuoituah ka siem a, sâng chunga hotu dâm, za chunga hotu dâm, sâwmnga chunga hotu dâm, sâwm chunga hotu dâm, ṭhuoituhai khawm.

¹⁶Chuong lai chun in rorêltuhai kuoma chun, ‘In unauhai kâra thu chu ngaipêk unla, unau le unau kâra le ram danga mi, a umpui le inkâra khawm feltakin rêl ro.

¹⁷Rorêlnaah thlierbîk in nei ding a ni nawh; mi chîn le mi lien inang zingin in ngaipêk ding a nih; tukhawm in ṭi ding a ni nawh; rorêlna chu Pathien ta a ni si a; in ta dinga thu khir taluo chu ka kuomah hung intlun hlak in ta, chu chu lo ngaituo hlak ka tih,’ tiin thu ka pêk a.

¹⁸Chun, chuong lai chun thil in thaw dân ding po poah thu ka pêk cheu a.

¹⁹“Chun, LALPAIN thu a mi pêk angin Horeb tlânga inthawk chun ei suok a, Amor mihai tlâng ram lampuia thlalêr lientak le râpthlâktak in hmu kha ei fe thleng vawng a, Kades-barneaa chun ei hung tlung a.

²⁰Chun, in kuomah, ‘LALPA ei Pathienin a mi pêk Amor mihai tlâng ram chu in hung tlung ta a;

²¹Ngai ta u, LALPA in Pathien chun ram chu a pêk diem ta cheu a nih; hang fe unla, LALPA in pi le pu Pathienin a lo hril ta ang khan hang hluo el ta ro; ṭi naw unla, thaidâwp bawk naw ro,’ ka ti a.

²²Chun, ka kuomah in hung vawng a, ‘A ram chu va enthla a, kan hang fena ding lampui le kan va fena ding khaw chinchâng dâm mi hung hril nâwk dingin kan hmaah mi va tir inlang,’ in ti a.

²³Chu thu chun a mi suklâwm hle el a, chuongchun, nangni laia mi sâwmpahni, hnam khatah pakhat pei ka thlang a:

²⁴chuongchun, an suok ta a, tlânga chun an hang lâwn a, Eskol ruom an hang tlung a, an hang enthlâk vawng a.

²⁵Chu rama thei dâm chu an lo a, an mi hung phurpêk a, chanchin an mi hung intlun a, ‘LALPA ei Pathienin ram a mi pêk chu ṭhatak a nih,’ an ti a.

²⁶Nisienlakhawm, in hang fe nuom naw a, LALPA in Pathien thupêk chu in helsan a;

²⁷in puon inhaia chun in chier a, ‘LALPA chun a mi theida leiin mi sukbohmang dinga Amor mihai kuta pêk dingin Aigupta rama inthawkin a mi ṭhuoi suok a nih.

²⁸Iengdingin am chu chun hang fêng ei ta? Ei unauhai chun, Mihriem chu eini nêkin an lien a, an insâng lem bawk a; khuohai chu a lien tâwl hle a, vân tawngin kulhai a nei a; chun, Anakim thlahai khawm chu kan hang hmu bawk a, tiin kan lungril an sukzawp a,’ in ti a.

²⁹Kei chun in kuomah, ‘Zâmse naw unla, anni chu ṭi bawk naw ro.

³⁰LALPA in Pathien in hmaṭhuoitu chun in mithmua Aigupta rama a thawpêk ta cheu po pohai ang khan thawpui a ti cheu a,

³¹thlalêra khawm miin a nau a puok angin, LALPA in Pathien chun hi hmun in tlung chen hin lampui intluonin a puokzie cheu in hmu kha,’ ka ti a.

³²Chuonghai po ka hril sa khawmin LALPA in Pathien chu in ring nawh;

³³in puon in in zarna ding hmun zawngpêk ding cheu le in lampui khîkhmu ding cheua zânah meia, sûnah sûma hmaṭhuoitu chu.

³⁴“Chun, LALPAIN in thu hril chu a lo hriet a, a lunginsen a,

³⁵‘Hi suon rilotaka mi hin chu pakhat bêk khawmin in pi le puhai pêk dinga intkhâmna ram ṭhatak chu hmu naw tawp an tih.

³⁶Jephunne naupa Kaleb chau naw chun; ama chun chu hmûng a tih, a va sir tah ram chu ama le a nauhai pêng ka tih, ama chun LALPA chu titakzeta a zui tlat leiin,’ tiin ân khâm a.

³⁷“Nangni leiin ka chunga khawm LALPA chu a lunginsen a, ‘Nang khawm hi chutaka chun lût naw ti nih.

³⁸I rawngbâwltu Nun naupa Josua hi chu lût a tih, ama hi infui rawh; Israel mihai chu ân hluotir ding a nih.

³⁹In nau le tehai, râllâkin la el an ta, in tihai hi, tuta a sie a ṭha la hre lo in nauhai hi lût an tih, anni chu pêng ka ta, hluong an tih.

⁴⁰Nangni ruok chu insawn unla, Tuipui Sen tiengah thlalêrah fe ro,’ tiin.

⁴¹“Chun, nangnîn, ‘LALPA chungah kan lo suol a ni tah, hang fêng kan ta, LALPA kan Pathienin thu a mi pêk angin hang thaw dingin kan inpei zing,’ tiin in mi dawn a, chuongchun, indona thuomhnaw in inbel seng a, tlânga hang fe chu in phûr hle a.

⁴²Chun, LALPAIN ka kuomah, ‘Hang fe naw ro, hang thaw bawk naw ro; nangni lai ka um si naw a, in hmêlmahai chun lo sukhlum pal rawi an ti cheu, an kuomah ti rawh,’ a mi ti a.

⁴³Chu chu ka hril cheu a, in pawm naw a, LALPA thupêk chu in helsan ta lem a, tlânga chun in hang fe hrâm ta a.

⁴⁴Chun, chu tlânga um Amor mihai chun an lo thaw cheu a, khuoi mi hnawt ang elin an lo hnawt cheu a; Seir tlânga inthawka Horma chenin an that cheu a.

⁴⁵Chun, in hung kîr nâwk a, LALPA hmaah in ṭap a; nisienlakhawm, LALPA chun in râwl chu a ngai nuom naw a, a na khawm a hung sit nuom nawh.

⁴⁶Chuleichun, Kades-a chun sâwttak in um a ni kha.