Read Hmar DÂN PAHNINA 11 Bible Online

DÂN PAHNINA 11 - Hmar bible

DÂN PAHNINA 11

¹“Chuleiin, LALPA in Pathien chu in hmangaiin a thuruothai, a dânhai, a rorêlhai, a thupêkhai chu in zâwm rawp ding a nih.

²Tuhin lo hre unla, LALPA in Pathien thununna dâm, a ropuizie dâm, a bân hrâtzie dâm, a bân pharzie dâm,

³a inchikna dâm, a thilthaw Aigupta ram sûnga Aigupta lal Pharao chung le a ram sûng po poa a thaw dâm kha.

⁴Aigupta sipaihai le an sakawrhai le an tawlailîr chunga a thilthawhai kha, an hnawt lai cheua Tuipui Sen tuia ân chîmpiltirzie dâm; tu chena LALPAIN a sukbohmangzie dâm,

⁵hi hmun in tlung hmakhata thla- lêra in chunga a thilthaw dân dâm,

⁶Reuben naupa Eliab naupa Dathan le Abiram hai chunga a thaw dân dâm; hnuoiin a bâu a ka a, Israel mi po po lai anni le an sûnghai le an puon inhai le an ran ṭhuoi po po a lem vawng dân dâm hre lo in thlahai kuoma hril ka ni naw a,

⁷in mit ngeia LALPAIN thil ropuitak a thaw po po hmutuhai kuomah a ni lem a nih.

⁸“Chuleiin, in hung hrât a, in va pan ram chu in hluo theina dingin tuta thu ka pêk cheu, thupêk po po hi in zâwm ding a nih;

⁹nênetui le khuoizu luongna ram, in pi le puhai le an thlahai pêk dinga LALPAIN ṭawng a lo inkhâmna tah rama chun in chêng sâwt theina dingin.

¹⁰In va hluo ding ram chu in hung suokna Aigupta ram, thlai huona chi in tu a, in kea tui in buokna hlak ang a ni naw a;

¹¹in va hluo ding ram chu tlânghai le ruomhai le vân ruotui dawng ram a ni lem a.

¹² LALPA in Pathienin a lungkham ram a nih; LALPA in Pathien mit chu kum thara inthawka a tâwp chenin a fu hlak.

¹³“Chun, LALPA in Pathien chu hmangai ding le in lungril po po le in lungvar po poa a rawngbâwl dinga ka thupêk tuta ka pêk cheu hi ṭhahnemngaitaka in zâwm chun,

¹⁴in ram ruotui chu a huntakah, ruotui tla hmasa le ruotui tla nuhnung chu pêng ka ti cheu a, chuongchun, in bu dâm, in uoin dâm, in hriek dâm sîk khâwm thei in tih.

¹⁵In ranhai ta dingin in rama hlohna khawm inumtir bawk ka ta, nangni khawma fâng in ta, tlai in tih.

¹⁶Fîmkhur ro khai, chuong naw chun, in lungril chu hlêmin um a ta, pêthmang in ta, pathien dang rawng dâm bâwl in ta, be el rawi in tih;

¹⁷chuong a ni chun LALPA lung chu in chungah hung inthawk a ta, vân chu khâr a ta, ruo sûr naw ni a; hnuoi chun a ra insuo naw ni a, chuongchun, LALPA pêk cheu, ram ṭhataka inthawk hi bohmang vak el in tih.

¹⁸“Chuleiin, hieng ka thuhai hi in lungril le, in lungvarah khum in ta, inchikna dingin in bânah zem in ta, in mit le mit inkârah chalhrênna dingin a um bawk ding a nih.

¹⁹Chuong chu in nauhai inchûktir in ta, in ina in ṭhung lai dâmin, lampuia in fe lai dâmin, in zâl lai dâmin, in tho pha khawm in hril hlak ding a nih.

²⁰Chun, in kawtkhâr bienghaiah, in kawtkhâra dâm in ziek ding a nih.

²¹Chuongchun, in pi le puhai pêk dinga ṭawng ân khâmna rama chun in dam sûng ni le in nauhai dam sûng nihai chu hnuoi chungah vân hai um sûng sâwt ang peiin sukseiin um a tih.

²²“LALPA in Pathien chu hmangai ding le, a lampui po po hraw ding le ama chel tlat dinga ṭhahnemngaitaka hieng thu ka pêk cheu thupêk po po hi in zâwm phawt chun,

²³LALPA chun hieng hnamhai po po hi hnawt suokpêk a ti cheu a, nangni nêka ropui le thilthawthei lem hnam ram chu hluong in tih.

²⁴In kephaa in sirna taphawt chu in ta nîng a tih, thlalêra inthawk le Lebanon tlânga inthawka vadung, Euphrates vadunga inthawk chun thlangtieng tuipui chenin in ram nîng a tih.

²⁵Tukhawm in hmaah ngîr thei naw ni hai a; LALPA in Pathienin in kuoma a hril ta ang khan in va sir ding ram po poa chun nangni ṭina le ṭiumna inumtir a tih.

²⁶Ngai ta u, vawisûn hin in hmaah malsâwmna le ṭawngsie ka sie a;

²⁷LALPA in Pathien thupêkhai tuta ka pêk cheu hi in zâwm chun malsâwmna,

²⁸LALPA in Pathien thupêkhai chu in zâwm naw a, in hriet ngai lo pathien danghai be dinga tuta ka thupêk cheu hi in pêtsan chun ṭawngsephurin um in tih.

²⁹“Chun, in va hluo ding rama LALPA in Pathienin a ṭhuoi lût pha cheu chun, malsâwmna chu Gerizim tlângah sieng in ta, ṭawngsie chu Ebal tlângah.

³⁰Chu tlânghai chu nisa tlâkna khêl Araba tieng lampuia um, Kanaan mihai ram, Gilgal zâwn, More thingsaisuo sîr, Jordan râla um an nih.

³¹LALPA in Pathienin a pêk cheu ram va hluo ding chun Jordan chu in kân ding a na, hluong in ta, chutaka chun um in tih.

³²Chun, tuta in hmaa ka sie, thuruot le rorêl po po hi zâwm dingin in fîmkhur ding a nih.