Read Hmar DÂN PAHNINA 12 Bible Online

DÂN PAHNINA 12 - Hmar bible

DÂN PAHNINA 12

¹“LALPA in pi le puhai Pathienin a pêk cheu ram in hluo a, hnuoia in um sûnga fîmkhurtaka in zâwm ding thuruothai, rorêl dânhai chu hieng hi a nih.

²In va hluo ding ram hnamhaiin tlâng lienhai, tlâng chînhai, thing hring tin hnuoi dâma an pathienhai rawng an bâwlna hmun po pohai chu in suksiet vawng ding a nih.

³An maichâmhai sukchim in ta, an lungphunhai suknâwi vawng in ta, an Asera dâm chu in raw ding a nih; an pathien lim siem fâwmhai chu phûrpêk in ta, chutaka an hming chu in thaihmang ding a nih.

⁴Chuong ang chun LALPA in Pathien chunga chu in thaw ding a ni nawh.

⁵LALPA in Pathienin in hnam po po laia a hming umna ding hmun a la ruot ding chu zawng lem in ta, chutaka chun in fe ding a nih.

⁶Chutaka chun in pumrawhmang thilinhlânhai, in inthâwinahai, in sâwmapakhat dâm, in thên thilinhlânhai dâm, in thutiem dâm, in nuomthua thilinhlânhai dâm, in ran ruol le in berâm ruol laia pieng hmasa takhai in hung lâk ding a nih.

⁷Chutaka chu, LALPA in Pathien hmaa chun fâng in ta, in kut rasuok LALPAIN mal a sâwmna cheua chun hlimtakin in um ding a nih, in sungkuoin.

⁸“Mi tinin mâni ṭha ti zâwng ang ela tuta ei thaw ang hin in thaw ding a ni nawh;

⁹LALPA in Pathienin a pêk cheu ram le châwlna chu in la tlung hri si naw a.

¹⁰Jordan vadung in kai a, LALPA in Pathienin ân hluotir ding cheuah in um a, himtaka in um theina dinga in vêla hmêlmahai po poa inthawka ân châwltir pha cheu ruok chun,

¹¹LALPA in Pathienin a hming inumtirna ding a ruot ding hmuna hung lâk dinga ka ti po po chutaka chun in hung lâk ding a nih, in pumrawhmang thilinhlânhai, in sâwmapakhat dâm, in thên thilinhlânhai, LALPA kuoma thutiema in tiem ṭha ṭhahai le chun.

¹²LALPA in Pathien hmaa chun hlimtakin um in ta, nangni le in naupasalhai le, in naunuhmeihai leh, in suokpahai leh, in suoknuhai leh in khuohaia um Levi mihai leh, anni chun nangni lai chanvo le ram an nei ve si naw a.

¹³“Hmun in hmuna taphawtah in pumrawhmang thilinhlânhai inhlân el lo dingin fîmkhur ro khai.

¹⁴In hnamhai laia LALPAIN a la ruot ding hmuna chun in pumrawhmang thilinhlânhai chu inhlân lem in ta; chutaka chun thu ka pêk cheu po po chu in thaw ding a nih.

¹⁵Amiruokchu, LALPA in Pathienin malsâwmna ân dawngtir cheu ang peiin in châk ang ang chu in umna khuo taphawtah thatin a sa chu fa thei in tih; mi inthienghai le mi inthiengnawhai khawm a, sangai dâm, sakhi dâm chu fa thei an tih.

¹⁶A thisen ruok chu in fâk ding a ni nawh; tui angin hnuoiah in bunthlâk ding a nih.

¹⁷In ina chun sâwmapakhat, in bu dâm, in uoin dâm, in hriek dâm le in ran ruol le berâm ruol laia pieng hmasa takhai, in thutiema mi dâm, in nuomthua thilinhlânhai dâm, in thên thilinhlânhai chu fa thei naw ti niu a.

¹⁸LALPA in Pathienin hmun a la ruot dingah, LALPA in Pathien hmaah in fâk lem ding a nih, nangni le in naupasalhai le in naunuhmeihai le in suokpahai, in suoknuhai, in khuoa um Levi mihai leh; LALPA in Pathien hmaah in kut rasuok taphawtah hlimtakin in um ding a nih.

¹⁹In rama in um sûng po chu Levi mihai chu ngaitha lo dingin fîmkhur ro.

²⁰“LALPA in Pathienin a tiem cheu anga in ram a suklien a, in hringnain sa a fâk châk leia, ‘Sa fâng ka tih,’ in ti pha chun, in hringnain a châk zâwng ang ang sa fa thei in tih.

²¹LALPA in Pathienin a hming umna ding a la ruot ding chu in hlat taluo chun thu ka pêk cheu ang khan LALPAIN a pêk cheu in ran ruol le in berâm ruol laia mi that in ta, in hringnain a châk ang zâwng chu in khaw sûngah in fâk ding a nih.

²²Sangai hai, sakhi hai in fâk ang elin fâng in ta, ân thienghai le ân thiengnawhai khawma angkhat zingin fâng an tih.

²³Thisen ruok chu fa lo dingin fîmkhur ro, thisen chu hringna a na, hringna pumin sa chu in fâk ding a ni nawh.

²⁴In fâk dêr ding a ni nawh, tui angin hnuoiah in bunthlâk el ding a nih.

²⁵Chuongchun, LALPA mithmuah thil indik in thaw hin nangni le in hnunga in nauhai ta dingin a la ṭha ding a ni si a.

²⁶In thil inthienghai le in thutiema mi chau chawi unla, LALPAIN hmun a la ruot dinga chun fe ro.

²⁷Chun, LALPA in Pathien maichâmah in pumrawhmang thilinhlân chu, a sa le a thisen inhlân in ta, chun in inthâwinahai thisen chu LALPA in Pathien maichâma chun bun suok in ta, a sa chu fâng in tih.

²⁸Hieng thu ka pêk po po cheu hi nguntakin ngaituo ro; chuongchun, LALPA in Pathien mithmua thil ṭha le thil indik in thaw hin, in ta ding le in hnunga in nauhai ta dingin kumkhawtluonga dingin a la ṭha ding a nih.

²⁹“LALPA in Pathienin va hne ding hnamhai a sukbohmangpêk cheu a, an ram in hluo a, in khawsak pha chun;

³⁰sukbohmanga an umna anga khan in inâwk ve nawna dingin fîmkhur ro, ‘Hieng hnamhai hin iengtin am an pathienhai rawng an bâwl a, an thaw angin eini khawm thaw vêng ei tiu,’ tiin, an pathien chungchâng thuhai dâm chu dâwp vêl naw ro.

³¹Chuong ang chun LALPA in Pathien chungah in thaw ding a ni nawh; an pathien chunga chun LALPA ngaia thil tirdakum tinrêng a theida takhai chu an thaw hlak a, an naupasalhai, an naunuhmeihai ngei khawm an pathien ta dingin an râw hlak a nih.

³²“Thaw dinga thu ka pêk taphawt cheu chu in thaw ding a na, in belsa ding a ni naw a, in suktlâwm ding a ni bawk nawh.