Read Hmar DÂN PAHNINA 13 Bible Online

DÂN PAHNINA 13 - Hmar bible

DÂN PAHNINA 13

¹“Nangni lai zâwlnei amanih, mang neitu amanih an hung um a, inchikna amanih, thilmak amanih an inentir cheu a,

²inchikna amanih, thilmak amanih an inentir cheu chu a hung tlung a, in hriet ngai naw, ‘Pathien dang zui ei tiu khai, an rawng bâwl ei tiu,’ in kuoma an ti chun,

³chu zâwlnei amanih, mang neitu amanih thuhai chu in pawm ding a ni nawh; LALPA in Pathien chun in lungril po po le in hringna po poin LALPA in Pathien chu in hmangai le hmangai naw ti hriet fiena dingin a fie cheu a ni lem.

⁴LALPA in Pathien chu zui in ta, ama chu ṭîng in ta, a rawng dâm bâwl in ta, ama chu in chel tlat ding a nih.

⁵Chun, chu zâwlnei amanih, mang neitu amani chu sukhlum ding a nih. Aigupta rama inthawka ṭhuoisuoka, suoka inthawka intlantu cheu LALPA in Pathienin hraw ding thu a pêk cheu lampuia inthawka pêthmang dinga, LALPA in Pathien chunga helna thu a hril leiin. Chuong ang chun nangni laia thil ṭha naw chu in sukbo ding a nih.

⁶“I unaupa, in pa naupa amanih, in nu naupa amanih, i naupa amanih, i naunu amanih, i nuhmei pawmlai amanih, i ruol ṭhatak khawmin a rûkin, “Pathien dang rawng bâwl ei tiu khai’ tia nang amanih, in thlatuhai la hriet naw,

⁷hnam dang in kâwl vêl hnaia mi amanih, in hlat deua mi amanih, kâwlkawdawnga inthawka kâwlkawdawng khingtieng chena mi pathienhai be dinga an thlêm cheu chun;

⁸in remtipui ding a ni naw a, in pawm ding a ni bawk nawh; in lunginsiet ding a ni naw a, hla khawm in hla ding a ni naw a, in thup ding a ni nawh;

⁹in sukhlum ngei ngei lem ding a na; a sukhlum dingin kut thlâk hmasâng i ta, chu hnunga chun mipui po poin,

¹⁰Lungin in dêng hlum ding a nih; Aigupta rama inthawka suoka inthawka ṭhuoi suoktu cheu LALPA in Pathien kuoma inthawk a sukpêtna cheu a zawng leiin.

¹¹Chuongchun, Israel mi po po chun hrieng an ta, ṭîng an ta, nangni lai chuonga rîtlo hrim hrim chu chîng ta naw ni hai.

¹²“LALPA in Pathienin in umna dinga a pêk cheu in khuo pakhata chun,

¹³nangni laia mi dukdaklo ṭhenkhat hung suokin, chu khawpuia mihai chu in hriet ngai lo pathien danghai be dingin an ṭhuoi hmang ti thu hril in hriet chun,

¹⁴ṭhahnemngaitakin indawn vêl unla, zawng suok ro; chun, ngai ta u, thudik a lo ni a, chuong anga thil tirdakum nangni laia thaw a ni hriet chieng a ni chun,

¹⁵kâwlhnâmin chu khuoa umhai chu in sukhlum ngei ngei ding a nih; a sûnga um po pohai, ran ruolhai leh kâwlhnâmin in sukbohmang vawng ding a nih.

¹⁶Râllâk sum po po chu khawlaiah la khâwm in ta; chun, khuo le râllâk sum po po chu LALPA in Pathien kuomah pumrawhmang thilinhlân dingin râwng in ta, pil pâwng el ni kumkhuo tâng a tih, inngîr ni nâwk ta ngai naw nih.

¹⁷Râllâk sum chu a ieng ieng khawm in tâwk ding a ni nawh, LALPA chun a lungsenna nasatak chu inlêt a ta, zângaina inhmutir a ti cheu a, lunginsiet a ti cheu a, a sukpung ding cheu a nih; in pi le puhai kuoma ṭawng a lo inkhâm ta ang khan;

¹⁸LALPA in Pathien mithmua thilṭha thaw dinga thupêk po po tuta ka pêk cheu hi in zâwm phawt chun.