Read Hmar DÂN PAHNINA 14 Bible Online

DÂN PAHNINA 14 - Hmar bible

DÂN PAHNINA 14

¹“LALPA in Pathien nauhai in ni a, mithi leiin in inât ding a ni naw a, in mit inkâr mithmul in vâw kawl ding a ni bawk nawh,

² LALPA in Pathien ta dingin hnam inthieng in ni si a, hnuoi chunga hnam po poa ama puol bik ni ding cheuin LALPAIN a thlang cheu in nih.

³“Thil tirdakum hrim hrim in fâk ding a ni nawh.

⁴Hieng sahai hi a nih in fâk thei ding chu; bâwngchal dâm, berâm dâm, kêl dâm,

⁵sakhi dâm, sangai dâm, rienu dâm, sasen dâm, sakêl dâm, ram bâwng dâm, ram berâm dâm hi.

⁶Chun, sa tinrêng tin inkâk, ir suok sawi, chu laia mi taphawt chu fa thei in tih.

⁷Amiruokchu, hieng irsuok khawm sawi a, an tin khawm nei bawk hieng chi hi in fâk ding a ni nawh; Sanghâwngsei dâm, mazupui dâm, râwl zupui dâm hi, ir suok chu an sawia chu, an tin ân kâk naw leiin in ta dingin tirdakum an nih.

⁸Chun, vawk hi a tin chu ân kâk dea chu irsuok a sawi naw leiin in ta dingin tirdak a um a nih, a sa in fâk ding a ni naw a, a ruong khawm in them ding a ni nawh.

⁹“Tuia chêng po po lai hieng hi fa thei in tih, pângpar le phuhlip nei taphawt chu fa thei in tih.

¹⁰Pângpar le phuhlip nei naw taphawt chu fa thei naw ti niu, in ta dingin a pawrche a nih.

¹¹Vate thieng po po chu fa thei in tih.

¹²Hienghai ruok hi chu in fâk ding a ni nawh; mupui dâm, musie dâm, mu-arla dâm,

¹³Mute dâm, muvânlai dâm, mute chi tinrêng dâm,

¹⁴Vaâk chi hrim hrim,

¹⁵Ostrik dâm, vabak dâm, tuipui pelêu dâm, muchi taphawt el hai chu,

¹⁶chingpirinu dâm, simbu dâm,

¹⁷mulukawl dâm, kaikuongrâl dâm,

¹⁸tuivaârngo dâm, awinu chi hrim hrim dâm, vakhawhri le bâk dâm.

¹⁹Thla nei kea lâwn chi po po dâm, in ta dingin thil tirdakum a na, fâk ding a ni nawh.

²⁰Thla nei ân thieng po po hai chu fa thei in tih.

²¹“Mania thi chu iengkhawm in fâk ding a ni naw a, in umpui ram dang mihai fâk dingin pe thei in tih; hnam dang mihai kuomah a zawrin zawr thei bawk in tih; nangni chu LALPA in Pathien ta dinga hnam inthieng in ni si a. Kêlte chu a pui nênetuiin in suong ding a ni nawh.

²²“Kum tin in loa thlai suok po po sâwmapakhat in sie hran ngei ngei ding a nih.

²³LALPA in Pathien ṭi nachâng in hung hriet rawp theina dingin in bu le, in uoin le in hrieka sawmapakhat le, in bâwng ruol le in berâm ruol laia pieng hmasa takhai chu LALPA in Pathien hmaah, a hming umna dinga a la ruotna dinga chun in fâk ding a nih.

²⁴LALPA in Pathienin mal a sâwm pha cheua, LALPA in Pathienin a hming umna ding a la ruot ding chu a hlat taluo leia in ta dingin lampui kâr a hla taluo a, in chawi thei naw chun,

²⁵pawisaah inchangtir in ta, pawisa chu chawi el in tih. LALPA in Pathien hmun ruota chun in fe ding a nih.

²⁶Chun, pawisa chu in lungrila in dittak, bâwngchal amanih, berâmchal amanih, uoin amanih, zupui amanih, in lungrila in châk zâwng taphawta dingin hmang in ta; chutaka chun LALPA in Pathien hmaah fâng in ta, hlimtakin in um ding a nih, nangni le in sûnghai leh.

²⁷Levi mihai in umnaa um vehai chu ngaitha hlek naw ro, nangni lai chanvo khawm, rochan khawm an nei ve si naw a.

²⁸“Kum thum ân vawi kum poah, chu kuma in lo thilsuok po poa sâwmapakhat chu la khâwm vawng in ta, in umnaah in sie ding a nih,

²⁹chun, in umnaa um Levi mihai khawm chu nangni laia chanvo, rochan khawm nei ve nawhai le ram dang mihai le pa nei nawhai le hmeithaihai chun fâng an ta, lo khawsa ve thei el an tih; chuongchun, LALPA in Pathienin in kutsuok po poa chun mal a sâwm ding cheu a nih.