Read Hmar DÂN PAHNINA 15 Bible Online

DÂN PAHNINA 15 - Hmar bible

DÂN PAHNINA 15

¹“Chun, kum sari ân vawi kum poah ngaidamna in siem ding a na.

²Ngaidam dân chu hieng ang hi nîng a tih; leiba neitu taphawtin an tuolbâwmhai an lo inpûktir ta chu a ngaidam ding a nih; a tuolbâwm khawm, a unau khawm a ṭhîn lui ding a ni nawh, LALPA ngaidamna chu puong a ni ta leiin.

³Hnam dang mi chu ṭhîn lui thei in ta; nisienlakhawm, in ta iengkhawm in unauhai lo hmang ta chu in ngaidam ding a nih.

⁴Mi rimsi hrim hrim um dêr naw ti niu, (LALPA in Pathienin hluo dinga a pêk cheu rama chun LALPAIN mal a sâwm ngei ngei ding cheu a nih,)

⁵hieng thupêk, tuta ka thupêk po po cheu hi pawm dinga LALPA in Pathien râwl chu ṭhahnemngaitaka in zâwm phawt chun.

⁶LALPA in Pathien chun a tiem ta cheu angin mal sâwm a ti cheu a, hnam tamtak inpûktir in ta, nangni ruok chun chu pûk naw ti niu; hnam tamtak chungah ro rêl in ta, in chunga ruok chun ro rêl ve naw ni hai.

⁷“LALPAIN ram a pêk cheua in umnaa in unauhai lai rimsi an um chun in unau rimsihai kâwla chun in lungril sukngar naw unla, tiksie bawk naw ro.

⁸An kuoma chun in tiktlai ngei ding a nih, an tlâksamnaa an mamaw phuhrûkna tâwk in inpûktir ding a nih.

⁹‘Ngaidam kum, kum sarina chu a hung tlung ding a ni tah,’ tiin in unauhai chu hmu nuom lovin, iengkhawm pe nuom lovin in lungrila indik nawtaka ngaituona um lo dingin fîmkhur ro; chuong naw chun, ama chun in chungchâng thuah LALPA ko a ta, i ta dingin suol hung ni rawi a tih.

¹⁰In pêk ngei ngei ding a nih, chun, in pêk pha khawm in lungril ân hmûr dêr ding a ni nawh, chuong ang thil lei chun a nih LALPA in Pathienin in thil thaw po poa le in kutsuok po poah mal a sâwm ding cheu chu.

¹¹Chu rama chun mi rimsihai um naw lai a um âwm si naw a; chuleiin, ‘In rama in unauhai chunga dâm, tlasamhai chunga dâm, in mirimsihai chunga dâm, in tiktlai ngei ngei ding a nih,’ tiin thu ka pêk cheu a nih.

¹²“In unau Hebrai pa amanih, Hebrai nu amanih in kuomah an zawr a, kum ruk in rawng an bâwl chun kum sari kum chun in insuo ding a nih.

¹³Chun, in insuoktir pha chun kutbenthekin in insuoktir ding a ni nawh;

¹⁴in berâm ruol laia mi dâm, in hrizâwla mi dâm, in uoiin sâwrna khura mi dâm chu inrolotakin in pêk ding a nih; LALPA in Pathienin mal a sâwm dân ang pei cheuin in pêk ding a nih.

¹⁵Aigupta rama khan suok in ni ta a, LALPA in Pathienin ân tlan cheu ti kha in hriet zing ding a nih; chu lei chun a nih, hieng thu hi tuhin ka pêk cheu chu.

¹⁶Nangni le in sûngkuo an ngainat lei le in inpâwlthiem leia in kuomah,

¹⁷‘Suoksan naw ning cheu,’ an ti tlat chun, thîr zum lâng in ta, kawtkhâr sana chun an na ver in tih, chuongchun, kumkhawtluongin in suok ni tâng an tih, in suoknu khawm chu chuong ang bawk chun in thaw ding a nih.

¹⁸Insuoktir chu thil harsaah in ngai ding a ni nawh, inhlawfa ruoina zâtve chauin kum ruk sûng in rawng an bâwlpêk ta si cheu a; chun, LALPA in Pathienin in thilthaw taphawtah malsâwmpêk pei a ti cheu.

¹⁹“In ran ruol dâm, in berâm ruolhai laia pieng hmasatak a chal taphawt chu LALPA in Pathien kuomah inthiengah in pêk ding a nih; in bâwngchal pieng hmasatak chu sinthawah in sawr ding a ni naw a, in berâm ruolhai laia pieng hmasatak hmul chu in vâw ding a ni nawh.

²⁰LALPAIN hmun a la ruot dinga chun in fâk ding a nih, nangni le in sûnghai leh.

²¹Nisienlakhawm, ran chu hmêlhemna nei, a ke inbai amanih, a mit indel amanih, hmêlhemna ieng ang khawm nei a ni chun LALPA in Pathien kuomah inthâwina dingin in hmang ding a ni nawh.

²²In khaw sûnghaia in fâk el ding a nih; sangaihai, sakhihai in fâk ang bawkin mi inthienghai le mi inthieng nawhai khawmin fa thei in tih.

²³A thisen ruok chu in fâk dêr ding a ni nawh, tui angin hnuoiah in bunthlâk el ding a nih.