Read Hmar DÂN PAHNINA 16 Bible Online

DÂN PAHNINA 16 - Hmar bible

DÂN PAHNINA 16

¹“Abib thla chu thla serah nei unla, LALPA in Pathien ta dinga Fekân ruoiṭhena dingin hmang ro; Abib thla hin a nih LALPA in Pathien chun Aigupta rama inthawka zâna a ṭhuoi suok cheu chu.

²LALPAIN a hming umna dinga a la ruot dinga chun LALPA in Pathien kuomah in berâm ruol laia mi le ran ruol laia miin Fekân Ruoiṭheah in inthâwi ding a nih.

³Chawl ṭhang bei leh in fâk ding a ni naw a; in dam sûng poa Aigupta rama inthawka in suok ni chu in hriet zing theina dingin ni sari sûng chawl ṭhanglo rinumna bei leh in fâk ding a nih, Aigupta rama inthawk khan inhmâwtaka suok in ni kha.

⁴In ram sûngah ni sari sûng chu chawl hrim hrim a um ding a ni naw a, chun, ni khat ni zântienga in inthâwina sa chu zânkhawvârin a zîng tûk chenin a iengkhawm a um ding a ni nawh.

⁵LALPA in Pathienin a pêk cheu in umna khuo nazawngah Fekân Ruoiṭhe inthâwinain inthâwi thei naw ti niu a.

⁶LALPA in Pathienin a hming umna dinga a la ruot dinga chun, chutaka ngei chun Aigupta rama inthawka in hung suok hun ang zântieng, nisa tlâkah Fekân Ruoiṭhe inthâwiin in inthâwi ding a ni lem.

⁷Chun, em hmin in ta, LALPAIN hmun a la ruot dinga chun fâng in ta; chun, a zînga chun kîr nâwk in ta, in puon inah in fe ding a nih.

⁸Ni ruk sûng chu chawl ṭhanglo bei in fâk ding a nih. Chun, ni sari ni chu LALPA in Pathien ta dinga inkhâwmpui inthieng nîng a ta, sin in thaw ding a ni nawh.

⁹“Châwlkâr sari tiem in ta; in bu sîk ṭan nia inthawkin châwlkâr sari chu tiem in tih.

¹⁰LALPA in Pathienin mal a sâwm cheu ang peiin in themsuoka mi mâni thua nuomthua thilinhlân dingin LALPA in Pathien ta dingin châwlkâr ruoiṭhe in nei ding a nih.

¹¹LALPA in Pathienin a hming umna dinga a la ruot dinga chun nangni leh in naupasalhai leh, in naunuhmeihai leh, in suokpahai, in suoknuhai leh in umnaa um Levi mihai, nangni laia um ram dang mihai, pa nei lo hai dâm, hmeithaihai dâm leh LALPA in Pathien hmaah hlimtakin in um ding a nih.

¹²Chun, Aigupta rama khan suok in nih ti in hriet zing ding a nih; chun, hieng dânhai hi fîmkhurtakin in zâwm ding a nih.

¹³“In hrizâwla mi le in uoin sâwrna khura mi in sîk khâwm zo pha ni sari sûng chu bâwkte ruoiṭhe in nei ding a nih.

¹⁴In ruoiṭhenaa chun nangni leh, in naupasalhai, in naunuhmeihai leh, in suokpahai, in suoknuhai leh, in umnaa Levi mihai leh, ram dang mihai, pa neilo le hmeithaihai dâm leh hlimtakin in um ding a nih.

¹⁵LALPAIN hmun a la ruot dinga chun LALPA in Pathien ta dingin ni sari ruoi in ṭhe ding a nih; LALPA in Pathienin in thil rasuok po poa le in kutsuok po poah mal sâwm a ti cheu a, lâwmtak sengin in um ding a nih.

¹⁶Kum tin nangni laia pasal po po chu vawi thum LALPA hmaa hmun a la ruot dinga chun an inlang ding a nih. Chawlṭhanglo bei ruoiṭhea dâm, châwlkâr ruoiṭhea dâm, bâwkte ruoiṭhea dâm.

¹⁷Chun, tukhawm LALPA hmaah kutruokin an in lang ding a ni naw a, LALPA in Pathienin malsâwmna ân dawngtir cheu ang peiin mi tinin an thei ang tâwk an pêk ding a nih.

¹⁸“LALPA in Pathienin a pêk cheu in kul kawtkhâr po poah in hnam ang peiin rorêltuhai le hotuhai insiem pei in ta; mipuihai ro feltakin an rêlpêk ding a nih.

¹⁹Indik nawtakin ro in rêl ding a ni nawh, tukhawm ditsak bîk in nei ding a ni nawh; thilpêk in lâk ding a ni bawk nawh; thilpêk chun mi varhai mit a sukdelpêk a, mi felhai thu a sukkhawhlopêk hlak si a.

²⁰LALPA in Pathienin a pêk cheu ram chu dama in hluo theina dingin a fel chau chu in zâwm ding a nih.

²¹“LALPA in Pathien maichâm in lân ngîr ding sîra chun thing ieng chi khawma Asera in inngîr ding a ni nawh.

²²LALPA in Pathienin a theida zâwng lung khawm in phun ding a ni nawh.