Read Hmar DÂN PAHNINA 17 Bible Online

DÂN PAHNINA 17 - Hmar bible

DÂN PAHNINA 17

¹“Bâwngchal amanih, berâm amanih, demkâi le ṭhat nawna hrim hrim nei chun LALPA in Pathien kuomah in inthâwi ding a ni nawh; chu chu LALPA in Pathien ta dingin thil tirdakum a ni si a.

²Nangni laia LALPA in Pathienin a pêk cheu in umna khâwlai khawm, pasal amanih, nuhmei amani khawm, thuthlung bawse a, LALPA in Pathien mithmua thil ṭha naw thaw an um a,

³Pathien dang rawng va bâwl a, ka thupêk ni lo, nisa amanih, thla amanih, vâna mi hrim hrim bie an um a, an hril che a,

⁴nangin i lo hriet a, ṭhahnemngaitaka în dawn a; a lo indik ngeia, thu chu a chieng faka, chuong anga thil tirdakum Israel mihai laia thaw a lo ni chun,

⁵chu thil suol thawtu, pasal amanih, nuhmei amani ngei chu ṭhuoi suok in ta, lungin in dêng hlum ding a nih.

⁶Hretu pahni amanih, pathum amani bâua inthawkin thi ding chu sukhlum ding a nih, hretu pakhat chau bâua inthawk chun sukhlum ding a ni nawh.

⁷Sukhlumna dinga chun hretuhai chun kut thlâk hmasâng an ta, chu hnungah mipui po poin. Chuong ang chun nangni laia inthawkin thil ṭha naw chu in sukbo ding a nih.

⁸“Inthat thua dâm, sum le pai thua dâm, invuok thua dâm, in umnaa inkhingna thu hrim hrima dâm in ta dinga rêl intak taluo a hung um chun, LALPA in Pathienin hmun a la ruot dinga chun fêng in ta,

⁹chu huna thiempu Levi mi le rorêltuhai kuoma chun fêng in ta, anni râwn in ta; chun, anni chun thu sukthlûk dân ding an lo khîkhmu ding cheu a nih.

¹⁰LALPAIN hmun a la ruot dinga inthawka thu sukthlûk dân ding an lo khîkhmu ang cheu chun thâwng in ta, an inchûktir ang pei cheu chun fîmkhurtakin in thaw ding a nih.

¹¹An thu tlûkna an lo khîkhmu cheu chun changtienga manih, vawitienga manih in pêtsan ding a ni nawh.

¹²LALPA in Pathien hmaa rawngbâwla ṭhang hlak thiempu le rorêltu thu pawm lova, thawlui taphawt, chu mi chu sukhlum ding a nih, Israelhai laia inthawkin, chu thil ṭha naw chu in sukbo ding a nih.

¹³Chuongchun, mi po poin hrieng an ta, ṭîng an ta, thawlui nâwk ta naw ni hai.

¹⁴“LALPA in Pathienin ram a pêk cheu chu in va tlung a, in va hluo a, in va um a, ‘Ei vêla hnam po po ang bawkin lal nei ei tiu,’ in ti pha chun;

¹⁵LALPA in Pathienin a ithlang ngei chu lalah in nei ding a nih; in unau laia mi pakhat lalah in siem ding a nih; hnam dang mi, in unau ni lo chu nangni awptu dingin in siem ding a ni nawh.

¹⁶Amiruokchu, sakawr a hau ding a ni nawh, sakawr a hau theina dingin Aigupta mihai le chun inthuruol ding a ni bawk nawh. LALPA chun, ‘Tuta chen chu, chu tienga chun in kîr nâwk ding a ni ta nawh,’ a ti tlat si a.

¹⁷Chuong naw chun a lungril invâkhmang rawi a tih. Nuhmei khawm a hau ding a ni naw a, tangka le rângkachak khawm a hau bawk ding a ni nawh.

¹⁸Chun, a ram lalṭhungphaa a ṭhung pha chun, Levi thla thiempuhai hmaah dân bu chu a ta dingin inziek sâwngtir a ta,

¹⁹kawl a ta, a dam sûng chun a tiem rawp hlak ding a nih, hieng dân le hieng thuruothai po po hi pawma, zâwma thaw dinga LALPA a Pathien ṭi dân ân chûk theina dingin;

²⁰a lungril a unauhai chungah ân sie sâng nawna dingin le changtieng amanih, vawitieng amanih thupêk chu a pêtsan nawna ding le Israelhai lai chun ama le a thlahai a rama hin an dam sâwt phâna dingin.