Read Hmar DÂN PAHNINA 18 Bible Online

DÂN PAHNINA 18 - Hmar bible

DÂN PAHNINA 18

¹“Thiempu Levi mihai, Levi hnam po po chun Israel mihai lai chanvo le rochan an nei ding a ni naw a; LALPA kuoma meia thilinhlân le a chana mi chu an fâk ding a nih.

²An unauhai laia chun rochan an nei ding a ni naw a, an rochan chu an kuoma a hril angin LALPA a ni si a.

³Inthâwina inhlântu mipuihaia inthawka thiempu chanpuol ding chu hieng hi nîng a tih: bâwngchal khawm, berâm khawm a dâr le bekbawr khing hni le a phîngpui chu thiempu an pêk ding a nih.

⁴In bu le bâlhai, in uoinhai le in hriek sâwrhai a hmasa takhai le in berâm hmul vâw hmasa tak dâm chu in pêk ding a nih.

⁵LALPA in Pathienin LALPA hminga rawngbâwla um kumkhuo dingin in hnam po po laia inthawka a thlang an ni si a, anni le an naupasalhai leh.

⁶“Chun, Levi mi tukhawm a umna Israel ram in umna khâwlai hmun khawm suoksana, a lungrila inhâwktaka LALPAIN a la ruot ding hmuna hung chu,

⁷chutaka LALPA hmaa um hlak Levi mihai, a unauhai ang bawkin LALPA a Pathien hmingin rawng a bâwl ding a nih.

⁸An thiempu man bâkah mi dang chanpuol ang fâk ding chu chang ve tho an tih.

⁹“LALPA in Pathienin a pêk cheu ram in va tlung pha chun chuong hnamhai thil tirdakum thaw hai ang chu in chîng ve ding a ni nawh.

¹⁰A naupa amanih, a naunu amanih, meia infethlengtir dâm, aisân chîng dâm, aien chîng dâm, mitvaidawi hmang dâm, dâwithiem dâm,

¹¹dâwi invêt thiem dâm, khawhri zâwl ruoi dâm, thiemrâu dâm, mithi biek chîng mihai dâm chu nangni lai an um ding a ni nawh.

¹²Hieng thil thaw mi taphawthai chu LALPA ngaiin mi tirdakum an ni si a; hieng thil tirdakumhai lei hin a nih, LALPA in Pathien chun anni a hnawtsuokpêk cheu chu.

¹³ LALPA in Pathien hmaa chun demkailo in ni ding a nih.

¹⁴Chuong in va hluo ding rama hnamhai chun aisân le aien dâm an chîng hlak a, an pawm bawk a, nangni ta ding chun LALPA in Pathienin chuong ang thaw chu a phal naw a nih.

¹⁵“LALPA in Pathienin keima ang hi in unauhai laia mi, zâwlnei siempêk a ti cheu; a thu chu in zâwm ding a nih.

¹⁶‘LALPA kan Pathien râwl chu mîn hriettir ta naw, hi mei nasatak hi mîn hmutir nâwk ta naw rawh, chuong naw chun thi rawi kan tih,’ tiha Horeb tlânga pungkhâwm niha LALPA in Pathien in dit dân ang khan.

¹⁷Chun, LALPA chun ka kuomah, ‘An thuhril chu an hril ṭha hle a.

¹⁸An unauhai laia inthawkin nangma ang zâwlnei siempêk ka ta; a bauah ka thuhai sieng ka ta, a kuoma thu ka pêk taphawt chu an kuomah hril a tih.

¹⁹Chun, ka hminga ka thu a hril pawm naw taphawt chu ngaituong ka tih.

²⁰Ka hminga hril dinga ka pêk naw hril luitu zâwlnei amanih, pathien danghai hminga thuhriltu zâwlnei amanih, chu zâwlnei chu sukhlum ding a nih,’

²¹Chun, in lungrilah, ‘Iengtin am thu chu LALPA hril a ni nawh ti hrieng ei ta?’ in ti a ni chun,

²²zâwlneiin LALPA hminga thu a hril a, a thu hril chu a hung tlung naw a, a hlawtling naw chun, chu chu a nih LALPA ihril naw chu; zâwlnei chun uongtakin a hril mei mei a ni lem, ama chu in ṭi ding a ni nawh.