Read Hmar DÂN PAHNINA 21 Bible Online

DÂN PAHNINA 21 - Hmar bible

DÂN PAHNINA 21

¹“LALPA in Pathienin hluo dinga a pêk cheu rama hin khawhnâwmah mî sukhlumin lo um sienla, a sukhlumtu hriet ni si naw sienla,

²in upahai le in rorêltuhai chu hung an ta, an sukhlumna khuoa inthawk chun inkhîng an ta;

³chun, a ruong umnaa inthawka khaw hnai tak, chu khaw upahai chun bâwng ruol laia bâwngla, la sawr lo, rîngkawl la bât lo kei an tih;

⁴chu khaw upahai chun bâwngla, chu tui luongna, hnuoi lân letna ngailo le iengkhawm la chîng ngai nawna ruomah kei thlâng an ta, ruoma chun bâwngla rîng chu tan an tih.

⁵Levi naupa thiempuhaiin hung pan an ta, anni chu LALPA in Pathienin a rawngbâwltu le LALPA hminga malsâwmtuhai dinga a ruot an ni si a; thubuoi le invuok thu chu an rêl ang ang nîng a tih.

⁶Ruong hnai tak khaw upahai po po chun ruoma an that bâwngla rîng an tan chunga chun an kut sâwp an ta, hieng hin an ti ding a nih;

⁷‘Kan kutin thisen hi ân suo naw a, kan mitin a suok lai a hmu bawk nawh.

⁸Aw LALPA, în tlan suok i mi Israelhai hi ngaidam la, i mi Israelhai lai hin pawitâwk lo thisen suokna hi a um phal naw la, thisen thua chun ngaidam lem rawh,’ tiin.

⁹Chuong ang chun LALPA mithmua thil ṭha thawin pawitâwklo thisen suokna chu in sukkieng ding a nih.

¹⁰“In hmêlmahai rûn dinga in fe suok a, LALPA in Pathienin in kutah a pêk cheu a, sala in ṭhuoi a,

¹¹sal laia nuhmei hmêl ṭhatak, in mi dit zâwngtak, nuhmei dinga in mi dit zâwngtak in hmu chun,

¹²in inah ṭhuoi in ta, an lu vâwng an ta, an tin tan an tih.

¹³An sal zakuo chu hlîp an ta, in inah um an ta, thla khat zet an nu le pa sûn an ta, chu hnunga chun inpâwlpui tâng in tih, an pasal nîng in ta, in nuhmei ni tâng an tih.

¹⁴Chun, in lung a awi naw chun an nuomna naah an fe in phal ding a nih, sum le paiah in zawr dêr ding a ni nawh, sal cheiin in chei ding khawm a ni bawk nawh, in sukhmingse ta si a.

¹⁵“Miin nuhmei pahni nei ang sienla, pakhat chu ditin pakhat dang chu theida sienla, a idit le a itheida chun nau neipêk ve ve hai sienla, chun, naupasal upa tak chu a itheidanu nau chu ni ta sienla,

¹⁶a ro nei chu a naupasalhai ân khâwmtir pha chun a idittak naupa chu a naupasal upa a itheidanu naupa nêka kha upa lema siem el ding a ni naw a,

¹⁷a itheidanu nau, a nau upa tak, a nei po poah chan hni hu a pêk ding a nih, a hrâtna bul a na, a naulutir nina chu ama chanpuol a nih.

¹⁸“Miin naupasal kâwmâwtak, hel hmangtak el nei sienla, a nu le pa thu awi lovin, an thununna pawm naw sienla,

¹⁹a nu le pa chun kei an ta, an khaw upahai kuomah an khaw kul kawtkhâr bulah ṭhuoi an tih.

²⁰An khaw upahai kuoma chun, ‘Hi kan naupa hi kâwmâwtak le helhmangtak a na, kan thu khawm a awi nuom naw a, insukthâm nuom mi le inrui hmang mi a na,’ an ti ding a nih.

²¹Chuongchun, khuoa mi po po chun lungin an dênghlum ding a nih; chuong ang chun nangni laia inthawk chun thil ṭha naw chu in sukbo ding a nih; chun, Israel mi po po chun hrieng an ta, ṭîng an tih.

²²“Chun, miin thina khawp suol a thaw a, sukhlum a ni a, thing lêra in khai chun,

²³a ruong chu thinga chun zânkhawvârin a um ding a ni naw a, chu ni le le chun in phûm ding a nih; thinga khai taphawt chu Pathien ṭawngsephur an ni sih a, LALPA in Pathienin hluo dinga a pêk cheu ram chu in sukpawrche nawna dingin.