Read Hmar DÂN PAHNINA 22 Bible Online

DÂN PAHNINA 22 - Hmar bible

DÂN PAHNINA 22

¹“In unauhai bâwngchal amanih, an berâm amanih inhmang chu in hmuin in tosan el ding a ni naw a, in unauhai ina chun in ṭhuoipêk ngei ding a nih.

²Chun, in unauhai chu in kâwl hnaia um an ni naw a, a neitu chu in hriet naw amanih a ni chun, in in tieng ṭhuoi el in ta, in kuomah um zing a ta, in unauin a hung zawng pha pha in lo pêk nâwk ding a nih.

³An sabengtung khawm chuong ang bawk chun in thaw ding a nih, chuong ang bawk chun an silfênhai khawm in thaw ding a nih, chuong ang tak chun in unau thil inhmang in hmu taphawt chu in thaw ding a na, in tobopui el ding a ni nawh.

⁴“In unauhai sabengtung amanih, an bâwngchal amanih, lampuia tlu in hmuin in tosan el ding a ni naw a, in keithopui ngei ding a nih.

⁵“Nuhmei chun pasal thuomhnaw an inbel ding a ni naw a, pasalin nuhmei silfên an inbel ding a ni bawk nawh; tukhawm chuong anga thaw chu LALPA in Pathien ngaiin mi tirdakum a nih.

⁶“Lampuia vate bu, thinga manih, hnuoia manih, a te amanih, a tui amanih um, a te amanih, a tui amanih a puiin a awp lai in hmu chun a te chu a pui pumin in lâk ding a ni nawh.

⁷A pui chu insuo ngei ngei ding a nih, a te ruok chu la thei in ta, chuongchun, in ta dingin ṭhâng a ta, dam sâwt in tih.

⁸“In thar in bâwl chun, chutaka chun mi dâm an tla a, in in chu thisen insuona in a hung ni nawna dingin in inchung chu in inhuon ding a nih.

⁹Chun, in grêp huona chun thil chi hni in chîng ding a ni nawh; chuong naw chun, in chi tu le in grêp huona thil rasuok po po chu LALPA chanpuol ni el a tih.

¹⁰Bâwngchal le sabengtung hnuoi in inlet hmunkhattir ding a ni nawh.

¹¹Sahmul le pat khâwng pawl in inbel ding a ni bawk nawh.

¹²“In inthuomna puon chu a hmawr paliah a hmawrkai in inneitir ding a nih.

¹³“Miin nuhmei a nei a, a pâwl zet a, a theida nâwk si a,

¹⁴‘Hi nuhmei hi ka nei a, ka pâwl a, nunghâk inthieng a nina ka hmu naw a,’ tia muolphotaka a siem a, a hming a suksiet chun,

¹⁵nunghâk nu le pa chun kul kawtkhârah chu khaw upahai kuomah nunghâk inthieng a nina chu an hung suklang ding a nih.

¹⁶Nunghâk pa chun upahai kuomah, ‘Hi mi hi ka naunu kân neitir a, amiruokchu, a hnâm nâwk si a; ngai ta,

¹⁷I naunu hi nunghâk inthieng a nina ka hmu nawh, tiin muolphotakin a siem a, nisienlakhawm, hieng hi ka naunu chu nunghâk inthieng a nina chu annâwm,’ tîng a ta.

¹⁸Chuongchun, chu khaw upahai hmaa chun puon chu phâng an ta. Chu khaw upahai chun a pasal chu ṭhuoi an ta, hrem an tih.

¹⁹Israel nunghâk inthieng a sukhmingsiet leiin tangka shekel za inchawitir an ta, nunghâk pa chu an pêk ding a nih; ama chu a nuhmei nîng a ta, a dam sûngin ṭhe thei naw nih.

²⁰Amiruokchu, chu thu chu a lo indik a, nunghâk chu nunghâk inthieng a nina ân lang naw chun,

²¹nunghâk chu a pa kawtkhâra chun ṭhuoi suok an ta, a umna khuoa mihai chun lungin dêng hlum an tih, a pa ina nawchizawra Israelhai laia thil suol invêtthlâktak el a thaw lei chun chuong ang chun nangni laia inthawkin thil ṭha naw chu in sukbo ding a nih.

²²“Miin pasal nei nuhmei a zâlpui hmu a ni chun, an pahni chun an thi ding a nih, a zâlpuitu pasal le nuhmei chu; chuong ang chun Israelhai laia inthawkin thil ṭha naw chu in sukbo ding a nih.

²³“Nunghâk inthieng, mi nuhmei huol, miin khuoah a hmu a, a zâlpui chun,

²⁴an pahniin khaw kul kawtkhârah ṭhuoi suok in ta, lungin in dêng hlum ding a nih; nuhmei chu khuoa um si a, a khêk naw leiin; pasal chu a tuolbâwm nuhmei a sukhmingsiet leiin; chuong ang chun nangni laia inthawkin thil ṭha naw chu in sukbo ding a nih.

²⁵“Amiruokchu, miin ramhnuoiah nunghâk, mi ihuol a hmu a, a manlui a, a zâlpui chun a zâlpuitu pasal chau chu sukhlum ding a na,

²⁶a nunghâk chu iengkhawm law ding a ni nawh, nunghâk chunga chun thina khawp suol a um nawh; hieng ang hi chu mi a tuolbâwm thaw a, that ang a na;

²⁷ramah a va tâwk fûk a, mi ihuol nunghâk chu a khêk a, santu an um si naw a.

²⁸“Miin nunghâk inthieng huol lo a hmu a, a man a, a zâlpui an hmu chun,

²⁹a zâlpuitu pasal chun nunghâk pa chu tangka shekel sâwmnga a pêk ding a nih; chun, ama chu a nuhmei nîng a ta, a sukhmingsiet ta leiin; a dam sûngin ṭhe thei naw nih.

³⁰Miin a pa nuhmei zâlpuiin a pa a sukmuolpho ding a ni nawh.