Read Hmar DÂN PAHNINA 26 Bible Online

DÂN PAHNINA 26 - Hmar bible

DÂN PAHNINA 26

¹“LALPA in Pathienin rohluo ding le hluo dinga ram a pêk cheu in va hluo a, in va um pha chun;

²LALPA in Pathienin a pêk cheu in ram leilung ra hmasatak senghai chu hung lâng in ta; bâwmah sieng in ta, LALPA in Pathienin a hming inumtirna dinga a la ruot dinga chun in fe ding a nih.

³Chu huna thiempu kuoma chun fêng in ta, a kuomah, ‘Mi pêk dinga kan pi le puhai kuoma ṭawng a lo inkhâmna ramah kan hung tah ti vawisûn hin LALPA kan Pathien kuomah kan suklang a nih,’ tîng in ta.

⁴Thiempu chun in kuta inthawk chun bâwm chu lâng a ta, LALPA in Pathien maichâm bula chun inṭhut a tih.

⁵Chun, LALPA in Pathien hmaa chun, ‘Kan pu chu Suria mi, mi invai a na, Aigupta ramah a zu fe a, a zu um zing a, tlâwmte an na; chun, chutaka chun hnam ropuitak, thilthawtheitak, tamtak an hung ni ta a.

⁶Aigupta mihai chun an mi suknawmna a, an mi sukrimsi a, sin intaktakhai an mîn thawtir a.

⁷Chuongchun, LALPA kan pi le puhai Pathien chu kan ko a, LALPA chun kan râwl chu a lo hriet a, kan rimsikzie dâm, kan sin inrimzie dâm, nêksâwr kan nizie dâm a hriet a.

⁸ LALPA chun Aigupta rama inthawk chun kut hrâttak le, bân phar dâm, thil ṭiumtak dâm, inchiknahai dâm le thilmakhaiin a mi ṭhuoi suok a;

⁹hi hmuna hin a mi ṭhuoi lût a, hi ram, nênetui le khuoizu luongna ram hi a mi pêk a.

¹⁰Chun, ngai ta, aw LALPA, nangin i mi pêk leihnuoi ra hmasa takhai seng kan hung lâk hi,’ in va ti ding a nih. Chun, LALPA in Pathien hmaa chun inṭhut in ta, LALPA in Pathien hmaah chibai bûkin in kûn ding a nih.

¹¹ LALPA in Pathienin in sûngkuohai, nangni dâm, Levi mihai dâm, nangni laia ram dang mihai thil ṭha a pêk po po cheua chun hlimtakin in um ding a nih.

¹²“Kum thum kuma sâwmapakhat pêk kuma in thil rasuok po po sâwmapakhat in pêk zo chun, Levi mihai dâm, ram dang mihai dâm, pa neinawhai, hmeithaihaiin in umnaa chun an fâk a, an lo khawsak thei vena dingin in pêk ding a nih.

¹³Chun, LALPA in Pathien hmaah, ‘I thu mi pêk, i thupêk po po angin kan ina inthawkin thil inthienghai chu kan sie suok a, Levi mihai dâm, ram dang mihai dâm, pa nei nawhai dâm, hmeithaihai dâm kan pêk ta a; i thupêk chu a iengkhawm kan bawsiet naw a, kan theinghil bawk nawh.

¹⁴Kan lusûn laiin chutaka mi chu kan fâk naw a, kan pawrche laiin kan sukthâm bawk naw a, mithi puolah kan pêk bawk nawh; LALPA kan Pathien rawl chu kan ngai zing a, i thu mi pêk ang po po chun kan thaw a nih.

¹⁵I umna inthieng vâna inthawk chun hung en la, nênetui le khuoizu luongna ram, kan pi le puhai pêk dinga ṭawng i lo inkhâm tah ang khan i mi Israelhai le i leilung mi pêk hi malsâwm rawh,’ in ti ding a nih.

¹⁶“Vawisûn hin LALPA in Pathien chun hieng dân le rorêlhai hi zâwm dingin thu a pêk cheu a nih. Chuleiin, in lungril po po le in lungvar po poin in pawmin in zâwm ding a nih.

¹⁷Vawisûn hin LALPA chu a lampuihai hraw a, a dânhai le a thupêkhai le a rorêlhai chu zâwm a, a rawl chu ngai dingin in Pathien dingin in thlang ta a;

¹⁸chun, vawisûn hin a tiem ta cheu ang khan, a thupêkhai po po chu in zâwm a, ama chanpuol bîk ni ding le

¹⁹a lo hril ta anga LALPA in Pathien ta dinga mi inthieng in ni theina ding le hnam a siem po po laiah a bîka inpâk dâm, hming ṭhat dâm, chawimawi dâm hlaw dingin LALPAIN a thlang cheu a nih,” tiin.